Haustmótið: Þrír með fullt hús eftir þrjár umferðir

Í dag fór þriðja umferð haustmótsins fram. Var að vanda hart barist og enn hefur ekkert jafntefli litið dagsins ljós.
Fyrstu skákinni lauk frekar fljótt eftir að Símon hafði unnið nokkurt lið af Hilmi. Símon sigldi skákinni þægilega í örugga höfn með svörtu mönnunum og hafði sigur.
Meiri dramatík var í skák Andra og Bensa. Andri tefldi byrjunina ónákvæmt og Benedikt nýtti sér það til fulls og vann mann og peð. Eftir það linaði hann tökin og Andra tókst að snúa laglega á Benedikt og snúa taflinu sér í vil og hafði að lokum sigur.
Í skák Sigurðar og Áskells kom upp staða sem Áskell hafði skoðað sérstaklega. Hann jafnaði taflið frekar auðveldlega með svörtu og náði frumkvæðinu. Í miðtaflinu missti Sigurður af millileik sem hefði getað flækt taflið töluvert með færum fyrir báða. Eftir það fórnaði Áskell skiptamun og fékk gjörunna stöðu. Úrvinnslan varð ekkert vandamál og Áskell vann sannfærandi.
Í skák Elsu og Smára varð Smári fyrir því að leika af sér peði í byrjuninni. Elsa hirti það og hafði að auki frumkvæðið. Hún tefldi af festu og jók pressuna jafnt og þétt uns staðan hjá Smára hrundi.

Úrslit urðu því þannig:

Sigurður – Áskell 0-1
Andri – Benedikt 1-0
Símon – Hilmir 1-0
Elsa – Smári 1-0

Staðan er þá þannig að Andri, Áskell og Símon eru efstir og jafnir með fullt hús vinninga eftir þrjár umferðir. Sigurður hefur tvo vinninga, Elsa María einn en Hilmir, Benedikt og Smári eru ekki enn komnir á blað þrátt fyrir góð tækifæri.

Næsta umferð verður tefld á fimmtudag. Þá eigast við:
Áskell og Smári
Hilmir og Elsa
Benedikt og Símon
Sigurður og Andri.

Haustmótið, fjórir og fjórir!

"Fjórir hanga, fjórir ganga" segir í gamalli þulu. Kannski má segja það sama um stöðuna á haustmótinu eftir tvær fyrstu umferðinar. Frestaðri skák úr fyrstu umferð milli Andra og Smára lauk með sigri þess fyrrnefnda. Í annari umferð sem lauk í kvöld urðu úrslit þessi: 

Benedikt-Sigurður   0-1

Smári-Símon         0-1

Hilmir-Andri        0-1

Áskell-Elsa         1-0

Skv. heimildamanni fréttasíðunnar átti Smári góða vinningsmöguleika en lék sig óvart í mát í tímahraki. Með þessum úrslitum er helmingir keppenda með fullt hús ("fjórir ganga"), þ.e. Andri, Áskell, Sigurður og Símon, en þau Benedikt, Elsa, Hilmir og Smári eru enn á vinninga. Í þriðju umferð, sem háð verður nk. sunnudag munu þessi leiða saman hross sín:

Andri og Benedikt,

Sigurður og Áskell

Símon og Hilmir

Elsa og Smári.

 

Haustmótið hófst í dag

Keppendur eru átta í þetta sinn og því tefldar sjö umferðir allir-við-alla. Mótið hófst í dag og er þremur skákum lokið:

Benedikt Stefánsson-Áskell Örn Kárason          0-1

Sigurður Eiríksson-Hilmir Vilhjálmsson          1-0

Símon Þórhallsson-Elsa María Kristínardóttir    1-0

Skák þeirra Andra Freys Björgvinssonar og Smára Ólafssonar var frestað til þriðjudags. Önnur umferð verður tefld á fimmtudags og hefst kl. 18. Þá eigast þessi við:

Benedikt og Sigurður

Hilmir og Andri

Smári og Símon

Áskell og Elsa

Sjá nánar á Chess-results.