Vormót og uppskeruhátíð

Lokaveisla skáktíðar á vormisseri var haldinn föstudaginn 28. maí. Kl. 16 hófst vormót yngri iðkenda. Að því loknu var slegið upp pizzuveislu í boði Sprettsins og verðlaun afhent fyrir helstu mót vetrarins. Starfsemin hefur vissulega dregið dám af takmörkunum á samkomuhaldi sem einkum hefur komið niður á mótahaldi. Æfingar voru einnig færri en venjulega af þessum sökum.

Vormótið var skemmtilegt og toppbaráttar afar hörð. Tefldar voru sex umferðir og fyrir lokaumferðina voru fjórir keppendur efstir með fjóra vinninga, Emil, Róbert, Sigþór og Tobias. Eftir æsispennandi skákir stóðu bekkjarfélagarnir Emil og Tobias efstir með fimm vinninga og tefldu til úrslita um sigurinn.  Sú skák var lengi í jafnvægi en á dramatísku augnabliki seildist Emil í eitrað peð og tapaði drottningunni. Eftir það voru úrslitin ráðin og Tobias landaði sigrinum. 

Lokastaðan í mótinu:

röð	nafn	vinn
1	Tobias	5
	Emil	5
3	Sigþór	4½
4	Róbert	4
	Caius	4
6	Brimir	3½
7	Gunnar Logi	3
	Damian	3
	Jökull Máni	3
10	Stella	2
	Valur	2
	Alexía	2
13	Arnór	1

 

Á myndinni má sjá verðlaunahafa vetrarins. 

Æfingar munu nú liggja niðri til ágústloka. Skákmótahald verður með hefðbundnu sumarsniði; aðeins fá mót. Þau verða auglýst sérstaklega hér á síðunni.

Glæsilegt minningarmót! Davíð Kjartansson bar sigur úr býtum á minningarmóti um Gylfa Þórhallsson.

Um hvítasunnuhelgina fór fram minningarmót Gylfa Þórhallsson skákmeistara og forystumann í norðlensku skáklífi um áratuga skeið, en Gylfi féll frá þann 29. mars á síðasta ári.

Mótið hófst föstudaginn 21. maí og lauk á annan dag hvítasunnu. Tefldar voru tólf umferðir og meðal þátttakenda voru tveir stórmeistarar og þrír alþjóðlegir meistarar, keppendur alls 58.

Það var alþjóðlegi meistarinn Davíð Kjartansson sem bar sigur úr býtum með 10 vinninga.  Stórmeistarinn Þröstur Þórhallsson var í öðru sæti með 9 vinninga og alþjóðlegi meistarinn Jón Viktor Gunnarsson varð þriðji með 8.5 vinning.   Þrír Akureyringar deildu svo fjórða sætinu með Jóhanni Hjartarsyni stórmeistara, þeir Jón Kristinn Þorgeirsson, Símon Þórhallsson og Rúnar Sigurpálsson. Fengu þeir allir 8 vinninga.

Áskell Örn Kárason vann sigur í öldungaflokki (+65) og Elsa María Kristínardóttir í kvennaflokki. Í flokki skákmanna með færri en 2000 atskákstig varð Mikael Jóhann Karlsson efstur og í flokki skákmanna með færri en 1600 sigraði Benedikt Þórisson. 

Mótið var í alla staði vel heppnað. Teflt var í Hömrum í Menningarhúsinu Hofi, en aðstæður þar eru e.t.v. þær bestu sem bjóðast fyrir skákmót af þessu tagi.

Margir af keppendum og aðstandendum mótsins lýstu yfir áhuga á því að efna til nýs móts að ári.

Stóra myndin er frá verðlaunaafhendingunni. Á minni myndunum má sjá annarsvegar sjá sigurvegarann Davíð Kjartansson að tafli og hinsvegar Akureyrarmeistarann Rúnar Sigurpálsson og að baki honum Jóhann Hjartarson stórmeistara. 

Sigurður Arnarson tók myndirnar.

Öll úrslit og staðan á Chess-results.

 

Minningarmót um Gylfa Þórhallsson um hvítasunnuna!

Skákfélag Akureyrar efnir til minningarmóts um Gylfa Þórhallsson, fyrrverandi formann félagsins og margfaldan meistara. Mótið verður haldið í Menningarhúsinu Hofi.

Tímamörk og fyrirkomulag:

Tefldar verða atskákir (tímamörk 20+5), alls tólf umferðir.

 

Dagskrá:

Föstudaginn 21. maí kl.  19:00     1-2. umferð

Laugardaginn 22. maí kl. 11:00   3-6. umferð

Sunnudaginn 23. maí kl.  13:00    7-10. umferð

Mánudaginn 24. maí kl. 10.00     11-12. umferð

Verðlaunaafhending  að lokinni 12. umferð.

 

Verðlaun:

Fyrstu verðlaun: 120.000

Önnur verðlaun:   70.000

Þriðju verðlaun:   45.000

Fjórðu verðlaun:   30.000

Fimmtu verðlaun:   25.000

Kvennaverðlaun:    30.000

Öldungaverðlaun (+65)     30.000

Stigaverðlaun (undir 2000) 20.000

Stigaverðlaun (undir 1600) 20.000

Verðlaun skiptast samkvæmt Hort-kerfinu milli keppenda sem eru jafnir að vinningum. Oddastig verða reiknuð samkvæmt reglunni 1. Buchholz-2; 2. Flestar unnar skákir.

Mótið verður reiknað til alþjóðlegra atskákstiga.

Ekki verða innheimt þátttökugjöld, en þeim sem vilja heiðra minningu Gylfa Þórhallssonar er frjálst að leggja hóflega upphæð inn á reikning mótsins, 0302-26-015909, kt. 590986-2169.

 

Skráning:

Skráningarform í gula kassanum á skak.is mun birtast á næstu dögum. Skráningu þarf að vera lokið fyrir kl. 15:00 þann 21. maí.