Hverfa eða ekki hverfa?

Suður og norður tókust á að venju í árlegri hverfakeppni akureyrskra skákmanna sem háð var þann 29. desember. Hverfaskipting var nokkuð óregluleg þetta árið - en í grunnin byggðist hún þó á því að norðlægum sjónarmiðum var att gegn suðrænum áherslum. Lína var dregin um Þingvallastræti, en þá voru hóparnir misstórir, svo flytja þurfti tvo af norrænu kyni um set og var til þess beitt tilviljunaraðferð sem viðurkennd er í vísinda- og fræðastarfi um allan heim. 

Fyrst var tefld atskák á sex borðum og þar reyndust norðanmenn mun farsælli í jöfnum og tvísýnum skákum. Þeirra sveit var skipuð þeim Jóni Kristni, Símoni, Tómasi Veigari, Karli Agli, Hirti Steinbergs og Grétari Eyþórssyni. Unnu þeir fimm skákir en töpuðu einni. Í tapliðinu voru þeir Áskell, Andri Freyr, Smári, Haki, Hjörleifur og Benedikt frá Bægisá.

Þá var tekin hraðskákrimma með bændaglímufyrirkomulagi og bættist nú Rúnar Sigurpálsson við í syðri hlutann, en Jakob Þór Kristjánsson í þann norðanverða. Var tefld tvöföld umferð með örlitlum forföllum þegar að seinni umferðinni kom. Í þessum rimmum kom styrkur suðrænu sambasveitarinnar í ljós sem vann fyrri umferðina 27-22 og þá síðari 21-15. Fóru þar fremstir þeir Rúnar og Áskell með 11 vinninga af 13, en fremstur í nettu norðansveitinni var Jón Kristinn með 9,5. 

Lauk þar með tafldagskrá ársins 2018. Þráðurinn verður tekinn upp að nýju strax á fyrsta degi næsta árs með nýjársmótinu alkunna. Það hefst kl. 14 á nýjársdag, enda margir enn syfjaðir um eittleytið. 

Jón Kristinn vann jólahraðskákmótið

Hátíð ljóss og friðar tilheyrir jólahraðskákmót Skákfélagsins og fór það fram í gærkveldi, 27. desember. Var bæði fjölmennt og góðmennt á mótinu og alls 15 keppendur settust að tafli og tefldu allir við alla. Eins og endranær skáru nokkrir keppendur sig fljótlega úr í baráttunni um sigurinn, sem að lokum féll í skaut Jóni Kristini Þorgeirssyni, sem varla gat komið á óvart. Mótið er reiknað til alþjóðlegra hraðskákstiga og má fletta því upp á Chess-results.

Mótstöfluna má sjá hér:

Glæsileg uppskeruhátíð - flott vinaskákmót

Eins og undanfarin ár var efnt til uppskeruhátíðar nú um miðjan desember þar sem verðlaun voru afhent fyrir haustmisserið meður ljúflegri næringu á sál og líkama. Við byrjuðum á móti fyrir börnin kl. 11 á sunnudaginn og nefndum "vinamót" enda þau sem æfa með okkur hvött til að taka með sér vin. Það gerðu að vísu fáir, en mæting var þó með ágætum og alls tóku 17 börn þátt í mótinu. Þar var hart barist og drengilega. Lokastaðan:

röð	nafn	vinn
1	Ingólfur Bjarki Steinþórsson	6
2	Jökull Máni Kárason	5
3	Markús Orri Óskarsson	4
	Ingólfur Árni Benediktsson	4
	Hákon Bjarnar Eiríksson	4
	Sigþór Árni Sigurgeirsson	4
7	Birnir Eiðar Eiríksson	3½
8	Arna Dögg Kristinsdóttir	3
	Hulda Rún Kristinsdóttir	3
	Bergur Ingi Arnarsson	3
11	Mikael Darri Eiríksson	2½
	Ólafur Steinþór Ragnarsson	2½
	Elvar Ingi Sigurðsson	2½
14	Viktor Jens Gunnarsson	2
15	Alexía Lív Hilmisdóttir	2
16	Jasmin Lóa Hilmisdóttir	2
17	Stella Kristín Júlíusdóttir	1

Að þessu loknu var boðið upp á veitingar í suðursal þar sem þau heiðurshjón Pia Sigurlína Vinikka og Þórhallur Másson buðu upp á vöfflur og heitt súkkulaði. Afhent voru verðlaun fyrir helstu mót haustsins sem voru þessi:

Startmót      Ólafur Kristjánsson

Haustmót      Áskell Örn Kárason, Símon Þórhallsson og Andri Freyr Björgvinsson

Hausthraðskákmót og Atskákmót  Áskell Örn Kárason

Mótaröðin     Jón Kristinn Þorgeirsson, Andri Freyr Björgvinsson og Símon Þórhallsson

A4-mótaröð fyrir börn:

Nr. 1 samanlagt og efstur barna f. 2010              Jökull Máni Kárason

Nr. 2 samanlagt og efst barna f. 2008 og fyrr        Arna Dögg Kristinsdóttir

Nr. 3 samanlagt og efstur barna f. 2008 og síðar     Sigþór Árni Sigurgeirsson

Efstur barna f. 2009                                 Margús Orri Óskarsson

Þá fékk Jökull Máni viðurkenningu fyrir besta ástundun í haust.

Alls mættu um 40 manns í vöfflukaffið sem var mjög vel heppnað eins og áður segir. 

Myndir sem Pia tók má sjá á Facebook