Skáktíðin að hefjast; börn og unglingar.

Nú líður að hausti og skákæfingar barna fara að hefjast. Helstu tíðindi eru þessi:

Mánudaginn 30. ágúst kl. 17.30 fyrsta æfing FYRIR ALLA. Öll börn sem hafa áhuga á að æfa skák í vetur eru velkomin. Tekið verður við skráningum á skákæfingar í almennum flokki (f. 2012 og síðar) og framhaldsflokki. Æfingar verða svo sem hér segir:

Föstudaginn 3. september kl. 16.15 fyrsta æfing í framhaldsflokki (f. 2011 og fyrr)

Æfingar í framhaldsflokki verða svo áfram á þriðjudögum og föstudögum á þessum tíma. 

Æfingar í almennum flokki verða á mánudögum kl. 17.30. 

Sameiginlegar æfingar/mót fyrir báða flokka verða haldin a.m.k. mánaðarlega, auglýst sérstaklega.

Það er svo fleira sem bíður ungra iðkenda:

Íslandsmót skákfélaga í Reykjavík 1-3. október. Send verður ein barnasveit (6-8 keppendur) ef næg þátttaka fæst.

6. nóvember: Íslandsmót ungmenna (að 16 ára aldri), HALDIÐ Á AKUREYRI! Flokkaskipt mót, u8-u10-u12 o.s.frv.

4. desember Íslandsmót unglingasveita haldið í Garðabæ. 

Auð þess opið fyrir börn og unglinga á öll almenn mót félagsins.  

 

Vormót og uppskeruhátíð

Lokaveisla skáktíðar á vormisseri var haldinn föstudaginn 28. maí. Kl. 16 hófst vormót yngri iðkenda. Að því loknu var slegið upp pizzuveislu í boði Sprettsins og verðlaun afhent fyrir helstu mót vetrarins. Starfsemin hefur vissulega dregið dám af takmörkunum á samkomuhaldi sem einkum hefur komið niður á mótahaldi. Æfingar voru einnig færri en venjulega af þessum sökum.

Vormótið var skemmtilegt og toppbaráttar afar hörð. Tefldar voru sex umferðir og fyrir lokaumferðina voru fjórir keppendur efstir með fjóra vinninga, Emil, Róbert, Sigþór og Tobias. Eftir æsispennandi skákir stóðu bekkjarfélagarnir Emil og Tobias efstir með fimm vinninga og tefldu til úrslita um sigurinn.  Sú skák var lengi í jafnvægi en á dramatísku augnabliki seildist Emil í eitrað peð og tapaði drottningunni. Eftir það voru úrslitin ráðin og Tobias landaði sigrinum. 

Lokastaðan í mótinu:

röð	nafn	vinn
1	Tobias	5
	Emil	5
3	Sigþór	4½
4	Róbert	4
	Caius	4
6	Brimir	3½
7	Gunnar Logi	3
	Damian	3
	Jökull Máni	3
10	Stella	2
	Valur	2
	Alexía	2
13	Arnór	1

 

Á myndinni má sjá verðlaunahafa vetrarins. 

Æfingar munu nú liggja niðri til ágústloka. Skákmótahald verður með hefðbundnu sumarsniði; aðeins fá mót. Þau verða auglýst sérstaklega hér á síðunni.

Glæsilegt minningarmót! Davíð Kjartansson bar sigur úr býtum á minningarmóti um Gylfa Þórhallsson.

Um hvítasunnuhelgina fór fram minningarmót Gylfa Þórhallsson skákmeistara og forystumann í norðlensku skáklífi um áratuga skeið, en Gylfi féll frá þann 29. mars á síðasta ári.

Mótið hófst föstudaginn 21. maí og lauk á annan dag hvítasunnu. Tefldar voru tólf umferðir og meðal þátttakenda voru tveir stórmeistarar og þrír alþjóðlegir meistarar, keppendur alls 58.

Það var alþjóðlegi meistarinn Davíð Kjartansson sem bar sigur úr býtum með 10 vinninga.  Stórmeistarinn Þröstur Þórhallsson var í öðru sæti með 9 vinninga og alþjóðlegi meistarinn Jón Viktor Gunnarsson varð þriðji með 8.5 vinning.   Þrír Akureyringar deildu svo fjórða sætinu með Jóhanni Hjartarsyni stórmeistara, þeir Jón Kristinn Þorgeirsson, Símon Þórhallsson og Rúnar Sigurpálsson. Fengu þeir allir 8 vinninga.

Áskell Örn Kárason vann sigur í öldungaflokki (+65) og Elsa María Kristínardóttir í kvennaflokki. Í flokki skákmanna með færri en 2000 atskákstig varð Mikael Jóhann Karlsson efstur og í flokki skákmanna með færri en 1600 sigraði Benedikt Þórisson. 

Mótið var í alla staði vel heppnað. Teflt var í Hömrum í Menningarhúsinu Hofi, en aðstæður þar eru e.t.v. þær bestu sem bjóðast fyrir skákmót af þessu tagi.

Margir af keppendum og aðstandendum mótsins lýstu yfir áhuga á því að efna til nýs móts að ári.

Stóra myndin er frá verðlaunaafhendingunni. Á minni myndunum má sjá annarsvegar sjá sigurvegarann Davíð Kjartansson að tafli og hinsvegar Akureyrarmeistarann Rúnar Sigurpálsson og að baki honum Jóhann Hjartarson stórmeistara. 

Sigurður Arnarson tók myndirnar.

Öll úrslit og staðan á Chess-results.