Haustmótið, fjórða umferð

Í kvöld fór fram fjórða umferð Haustmótsins.
Úrslit urðu sem hér segir:
Áskell – Smári 1-0
Hilmir – Elsa 0-1
Sigurður – Andri 0-1
Benedikt – Símon frestað til mánudags.

Í skák Áskells og Smára kom upp staða þar sem hvítur hafði frumkvæðið en svarta staðan virtist traust. En þegar Smári lék ónákvæmum drottningaleik fékk hvítur töluvert frumkvæði sem leiddi til liðsvinnings og sigurs. Öruggur sigur hjá alþjóðlega meistaranum.

Hilmir tefldi vel framan af gegn Elsu en tefldi of hratt og lék illa af sér í miðtaflinu og fékk gjörtapað.

Í skák Sigurðar og Andra fékk svartur betra út úr byrjuninni þar sem ákveðnir samgönguerfiðleikar mynduðust í hvítu stöðunni. Andri tefldi fyrri hluta miðtaflsins kröfuglega og vann peð. Eftir það var eins og honum tækist ekki að fylgja eftir góðri byrjun og svartur vann peðið til baka og stóð til efnilegrar sóknar. Hvítur var full ákafur í sókninni og gar svörtum færi á mótspili sem varð til þess að hvíta staðan hrundi.

Vakin er athygli keppenda á því að næsta umferð fer fram á laugardaginn kl. 13 en ekki á sunnudag eins og venjan er. Ástæða þessa er íþróttakappleikur með bolta í Höllinni á sunnudaginn. Þá eigast meðal annars við þeir Andri og Áskell sem báðir hafa fjóra vinninga eftir fjórar umferðir.

Nýtt A4-mót á laugardaginn

A4 mótaröðin hófst laugardaginn 22. september. Tíu börn mættu til leiks og tefldu sex skákir. Urðu úrslit sem hér segir:

	f.ár	vinn.
Fannar Breki Kárason	2005	6
Jökull Máni Kárason	2010	4,5
Bergur Ingi Arnarsson	2010	3,5
Anton Bjarni Bjarklason	2008	3,5
Örvar Þór Þorbergsson	2009	3,5
Sigurgeir Bjarki Sigurðsson	2007	3,5
Alexí Lív Hilmisdóttir	2011	2,5
Ólafur Steinþór Ragnarsson	2010	2
Logi Már Ragnarsson	2012	1
Jasmin Lóa Hilmisdóttir	2012	0

Næsta mót verður nú á laugardaginn. Eins og áður er mótið opið öllum börnum á grunnskólaaldri sem kunna mannganginn. Einkum eru þau sem þegar eru að æfa skák hjá félaginu hvött til að mæta. Taflið hefst kl. 10 um morguninn og lýkur rétt fyrir kl. 12.