Áskell einn efstur. Fyrirlestur á morgun

Í dag fór 5. umferð Haustmótsins fram. Allar skákirnar voru spennandi og enn hafa engin jafntefli litið dagsins ljós.
Mesta spennan var í skák Andra og Áskels en þeir voru jafnir og efstir fyrir umferðina með 4 vinninga af 4 mögulegum.  Í byrjun miðtaflsins náði Andri peði af alþjóðlega meistaranum en Áskell hafði nokkrar bætur. Þegar leið á miðtaflið þótti fréttaritara sem Andri stæði betur en Áskell náði gagnárás á kóngsvæng sem kostaði Andra biskup fyrir nokkur peð. Þá missti Andri af þrátefli og Áskell sigldi sigrinum í hús.

Áskell er því einn efstur eftir fimm umferðir en fast á hæla honum kemur Símon sem einnig hefur fullt hús en á eina frestaða skák. Verður hún tefld á mánudag.

Yfir skákunum gæddu keppendur sér á súkkulaðikökum í boði Ólafs Kristjánssonar sem er að flytja í burtu af svæðinu. Runnu þær ljúflega ofan í keppendur.

Úrslit dagsins urðu:
Andri – Áskell 0-1
Símon – Sigurður 1-0
Elsa – Benedikt 1-0
Smári – Hilmir 1-0

Næsta umferð verður tefld á fimmtudag. Þá mætast
Áskell – Hilmir
Benedikt – Smári
Sigurður – Elsa
Andri – Símon.

Á morgun, sunnudag kl. 13, mun Áskell Örn Kárason segja okkur frá Evrópumóti eldri leikmanna sem haldið var í Drammen í ágúst. Þar endaði Áskell í 2. sæti og hlaut að launum alþjóðlegan meistaratitil. Áskell mun segja frá mótinu og fara yfir valdar skákir.
Frásögnin verður í norðursalnum.