Hverfakeppnin - Þorpið náði öðru sæti!

Hin árlega hverfakeppni akureyrskra skákmanna fór fram nú milli jóla og nýjárs, nánar tiltekið 28. desember. Til leiks voru mætt stórliðin Brekkan - öðru nafni The Brekka Bastards og Þorpið, á vesturheimsku íþróttamáli, The Village Villains. Voru Villingarnir skipaðir skákmönnum utan ár, af eyrinni, ásamt einstaka liðhlaupum af Norðurbrekku. Bastarðar voru af ofan- og sunnanverðri brekku, velflestir, a.m.k.

Fyrst reyndu liðin með sér í atskák. 

Brekkan-Þorpið

Jón Kristinn-Stefán Bergsson    1-0

Áskell-Sigurður Arnarson        0-1

Símon-Tómas Veigar              1-0

Andri Freyr-Smári               1-0

Haki-Sigurður Eiríksson         0-1

Karl Egill-Hjörleifur           1-0

Kristinn P-Sveinn Pálsson       1-0

Benedikt Stef-Grétar Eyþórs     1/2

Arnar Smári-Heiðar Ólafs        1-0

Rak menn í rogastans við þessi úrslit, 6.5-2.5 Bastörðum í vil. Voru Villingarnir þó ódrukknir að því er séð varð. 

Þvínæst var efnt til hraðskákkeppni á 10 borðum, bændaglímufyrirkomulag og tefldi þá hver eina skák við alla úr liði andstæðinganna. Tónninn ver gefinn strax í fyrstu umferð þegar syðra liðið fékk 8 vinninga, en hinir aðeins færri. Eftir þetta var jafnt í flestum umferðum, 5-5 eða 6-4 (fyrir Brekku). Í næstsíðust umferð varð nyrðra liðið fyrir öðru stóráfalli, fékk einungis 1,5 vinning. Þeir hefndu sín svo í lokaumferðinni og unnu þá viðureign með minnsta mun. Lokaúrslit urðu 60,5-39,5.

Í liði sigurvegaranna munaði mest um Jón Kristin sem vann allar sínar skákir. Rúnar og Andri fengu 9 vinninga af 10 og Símon hálfum minna. Í silfurliðinu stóðu þeir Tómas Veigar, Sigurður Arnarson og Stefán sig best; fengu sex vinninga af tíu. 

Var þetta síðasta mót á vegum Skákfélagsins á árinu sem er að líða, en nýju ári verður heilsað með nýársmóti á fyrsta degi ársins og hefst það kl. 14.00, stundvíslega. Athygli er vakin á tímasetningunni.  

 

Jón Kristinn jólasveinn SA annað árið í röð!

Jólahraðskákmót SA var háð í kvöld, 21. desember. Tólf keppendur mættu til leika og var toppbaráttan jöfn og spennandi. Sigurvegari síðsta árs, Jón Kristinn Þorgeirsson, tapaði fyrstu skák sinni á mótinu, en vann næstu 10 viðureignir og kom einum vinningi undan helstu keppinautum sínum í mark. Mótstaflan sem hér segir:

Jón Kristinn Þorgeirsson		0	1	1	1	1	1	1	1	1	1	1	10
Áskell Örn Kárason	1		1	1	1	0	1	1	0	1	1	1	9
Símon Þórhallsson	0	0		1	1	1	1	1	1	1	1	1	9
Haraldur Haraldsson	0	0	0		1	1	½	½	1	1	1	1	7
Sigurður Eiríksson	0	0	0	0		½	1	1	1	1	1	1	6½
Elsa María Kristínardóttir	0	1	0	0	½		0	0	1	1	1	1	5½
Andri Freyr Björgvinsson	0	0	0	½	0	1		1	0	1	1	1	5½
Hjörtur Steinbergsson	0	0	0	½	0	1	0		1	1	1	1	5½
Karl Egill Steingrímsson	0	1	0	0	0	0	1	0		0	1	1	4
Haki Jóhannesson	0	0	0	0	0	0	0	0	1		1	1	3
Heiðar Ólafsson	0	0	0	0	0	0	0	0	0	0		1	1
Hilmir Vilhjálmsson	0	0	0	0	0	0	0	0	0	0	0		0

Næsta mót Skákfélagsins verður hin árlega hverfakeppni sem háð verður milli jóla og nýjárs, nánar tiltekið 28. desember nk. 

Jóla jóla jóla

Tveir höfuðviðburðir skákársins verða nú um jólin - allt samkvæmt hefð. Nú fimmtudaginn 21. desember - á stysta degi ársins verður hið árlega JÓLAHRAÐSKÁKMÓT - aðalhraðskákmót ársins. Við byrjum kl. 18 - munið það. Hvetjum alla félaga til að mæta og ekki væri verra að taka með sér áhugasaman vin. Stefnum á 20 þátttakendur! Núverandi jólahraðskákmeistari er Jón Kristinn Þorgeirsson. Við skorum ekki síst á ungu kynslóðin að láta nú sjá sig!

Viku seinna - þann 28.desember er HVERFAKEPPNIN svo á dagskrá - þá ræðst hvort Þorparar eru Brekkusniglum harðsnúnari - eða öfugt. Og hvort liðsinni Eyrarpúka eða Fjörulalla sé líklegt til eð hafa úrslitaáhrif í þessu samhengi. Þenna dag byrjum við líka kl. 18 berjumst til síðsta manns.