Meistarar í kröppum dansi

Í dag var tefld fjórða umferð á Skákþingi Akureyrar (sem skv. nýjustu útreikningum er hið 81. í röðinni!). Þrjár baráttuskákir voru á dagskrá. Fyrsta skal nefna viðureign bekkjarbræðranna Símonar Þórhallssonar og Benedikts Stefánssonar úr Hörgárdal. Þrátt fyrir lipurlega taflmennsku Bensa framan af skákinni sá hann ekki við brögðum Símonar og mátti játa sig sigraðan. Þá er komið að meisturunum. Rúnar Sigurpálsson, Akureyrarmeistari 2010, lenti í mikilli nauðvörn gegn fulltrúa sýslumanns í mótinu, Sigurði Eiríkssyni. Þrátt fyrir alldrjúgan stigamun, Rúnari í hag, náði Sigurður grimmilegu steinbítstaki á stöðunni og virtist ætla að sigla heilum vinningi í höfn. Honum fataðist þó málsmeðferðin á síðustu metrunum og lék sig í mát. Þá er ógetið viðureignar Akureyrarmeistara síðustu tveggja ára, Jóns Kristins og meistarans frá 2013, Haraldar nokkurs stýrimanns.

Þar mátti búast við sigri stigahæsta keppendans, sem reynar hafði unnið allar skákir sínar til þessa, en Haraldur tapað sínum. Nú brá hinsvegar svo við að Haraldur náði undirtökum og hélt þeim fast. Jokko reyndi allt hvað hann gat til að grugga vatnið - reyndar mjög tímanaumur - og á endanum féll ungi maðurinn á tíma, en þá var staða hans eiginlega orðin óverjandi. Óvæntustu úrslit mótsins til þessa. 

Nú eru þeir enn efstir, Jón Kristinn og Andri Freyr og á sá síðarnefndi skák til góða. Rúnar nálgast þá félaga, sem hafa þrjá vinninga, en hann hálfum minna.

Sjá Chess-results

Skákþing Reykjavíkur

Þessa daganna er Skákþing Reykjavíkur í gangi og eru 34 keppendur skráðir til leiks. Teflt er tvísvar í viku, á sunnudögum og miðvikudögum og líkur mótinu þann 7. febrúar. Meðal keppenda eru tveir félagar í Skákfélagi Akureyrar. Það eru þeir Óskar Long og Stefán Bergsson. Má segja að hingað til hafi Óskar verið nánast á pari við skákstigin en Stefán er stjarna mótsins hingað til. Að loknum fimm umferðum er hann einn í efsta sæti með fullt hús vinninga! Fyrir neðan hann eru m.a. tveir alþjóðlegir meistarar, þrír FIDE-meistarar og einn alþjóðlegur stórmeistari kvenna.

Fréttaritari óskar Stefáni innilega til hamingju með frábæra taflmennsku hingað til og óskar honum alls hins besta í framtíðinni.
Árangur Stefáns má sjá hér.

TM-mótaröðin: Jokkó lætur hendur standa fram úr ermum

Í gær fór fram önnur umferð TM-mótaraðarinnar. Alls mættu 12 þátttakendur og öttu kappi í hraðskák, allir við alla. Umferðirnar urðu því 11. Mótið var einkar spennandi. Lengi framan af leiddi Símon Þórhallsson og var einn með fullt hús eftir fimm umferðir. Fyrir lokaumferðina var Jón Kristinn orðinn einn efstur, hálfum vinningi á undan Símoni. Þeir tefldu þá úrslitaskák um sigurinn í mótinu en aðrir áttu þá ekki möguleika á sigri. Í úrslitaviðureigninni sigraði Jón Kristinn og þar með varð hann efstur og Símon varð annar. Þeir félagar höfðu því sætaskipti frá fyrstu umferðinni. Í heildarstöðunni er Jón hálfum vinningi á undan Símoni en Áskell Örn Kárason fylgir fast á eftir.
Stöðuna má sjá hér að neðan.

	11.1.2018	25.1.2018	Samtals
Jón Kristinn Þorgeirsson	9	10	19
Símon Þórhallsson	10	8,5	18,5
Áskell Örn Kárason	8	8	16
Sigurður Arnarson	8	7	15
Smári Ólafsson	7	7,5	14,5
Sigurður Eiríksson	7	7	14
Haraldur Haraldsson	6	5	11
Ólafur Kristjánsson	8		8
Elsa María Kristínardóttir	8		8
Haki Jóhannesson		6	6
Karl Egill Steingrímsson	3	2	5
Kristinn P. Magnússon		4	4
Hjörtur Steinbergsson	2	1	3
Arnar Smári Signýarson	2	0	2
Hilmir Vilhjálmsson	0		0