Skákkeppni við skákdeild eldri borgara.

laugardagur 6.jún.09

Heimsókn skákdeild eldri borgara til Akureyrar 2005.

 Norðlenskir öldungar unnu nauman sigur gegn Ásum í skákkeppni eldri borgara. Í dag fór fram á Hótel Blönduós skákkeppni eldri borgara úr Skákfélagi Æsir í Reykjavík við keppendur úr Skákfélagi Akureyrar sem eru komnir yfir sextugt.  Akureyringar fengu 31 vinning en Ásarnir fengu 30 vinninga. Teflt var í tveim riðlum, fimmtán mínútna skákir. Í a - riðli var tefld á sex borðum og fengu norðanmenn 18,5 vinning, en sunnanmenn 17,5 vinning. Í B - riðli var tefld á fimm borðum og fóru leikar jafn 12,5 : 12,5 v. Flesta vinninga Akureyringa í a - riðli hlutu: Ólafur Kristjánsson og Þór Valtýsson 4,5 v. af 6., og Haki Jóhannesson 3,5 v. Fyrir Ása fékk Björn Víkingur flesta vinninga 4 af 6., Björn Þorsteinsson og Jóhann Örn Sigurjónsson 3 v. Í  b - riðli fékk Karl Steingrímsson flesta vinninga norðanmanna 4 v. af 5., og Ari Friðfinnsson 3 v.  Á morgunn fer fram hraðskákkeppni á Hótel Blönduós og má búast við að Ásar verði í hefndarhug.

Bikarmót Skákfélags Akureyrar.

mánudagur 1.jún.09

Gylfi Þórhallsson varð Bikarmeistari Skákfélags Akureyrar 2009, en

Bikarmót félagsins lauk í gær. Gylfi fékk 9 vinninga af 11. Mikael Jóhann Karlsson varð í öðru sæti með 8 v., og þriðji varð Ari Friðfinnsson með 5,5 v. Gylfi vann Mikael í lokaumferðinni, eftir smá ónákvæmi hjá Mikael, en Mikael vann Gylfa í umferðinni á undan (10umf.) með laglegri mannsfórn. En Mikael var i miklum ham í mótinu og sló m.a. út Sigurð Eiríksson, Karl Steingrímsson og Ara Friðfinnsson. Það munaði ekki miklu að hann hampaði bikarnum í leikslok. Mikið stökk hjá honum frá síðasta Bikarmóti félagsins þegar hann féll út í þriðju umferð.

           Lokastaðan:

		Vinningar.
1.	Gylfi Þórhallsson	9 af 11.
2.	Mikael Jóhann Karlsson	8
3.	Ari Friðfinnsson	5,5
4.	Karl Steingrímsson	4
5.	Tómas Veigar Sigurðarson	3
6.	Sigurður Arnarson	2
7.	Sigurður Eiríksson	2
8.	Haukur Jónsson	0,5
9.	Hersteinn Heiðarsson	0

Keppandi féll úr mótinu eftir að hafa tapað þrem vinningum. Keppt var um nýjan farandbikar.

Næsta mót er Skákþing Norðlendinga 12. - 14. júní.

Minning

þriðjudagur 19.maí.09

Margeir Steingrímsson skákmeistari lést þann 9. maí.  

Margeir Steingrímsson fæddur 4. október 1921 á Borgarhóli í Eyjafirði.  Dáinn 9. maí 2009.

Margeir flutti til Akureyrar 7 ára og lærði skömmu siðar mannganginn.

Hann tefldi fyrst með Taflfélagi Alþýðu á Akureyri 1936 - 1938, en fyrsta mót hans hjá Skákfélagi Akureyrar var Skákþing Akureyrar 1939. Þar tefldi hann  í 1. flokki og varð í  6. - 9. sæti.

 Hann sigraði  í 2. flokki á Skákþingi Akureyrar 1940 og einnig á Haustmótinu sama ár.

 Árið 1941 varð hann í 2.-3 sæti í 1. flokki á Skákþingi Íslands og tefldi í meistaraflokki á Skákþingi Íslands 1942 og 1944.

Hann tefldi í landliðsflokki  á Skákþingi Íslands 1950, og í opnum flokki á Skákþingi Norðurlanda 1981  í Reykjavík og varð þar í 3.-4. sæti.

Margeir varð Skákmeistari Akureyrar 1952, Skákmeistari Norðlendinga 1950 og 1955.

Hann sigraði á Haustmóti S.A. 1949, varð efstur ásamt Jóni Þorsteinssyni 1953 og 1959 ásamt Gunnlaugi Guðmundssyni. Hann sigraði á III minningarmótinu  um Júlíus Bogason 1979 og vann þar allar skákirnar sjö. Margeir tefldi til úrslita á Skákþingi Norðlendinga 1960 og varð þriðji.                      Hann varð efstur á Haustmóti félagsins 1978 ásamt Gylfa Þórhallssyni, en beið ósigur í einvígi.

Loks tefldi hann í landsliði Íslands á móti Færeyingum 1978.

Margeir tefldi 36 skákir með S.A. í 1.deild Deildakeppni Skáksambands Íslands og hlaut úr þeim 17,5 v.      Margeir helt mikið uppá riddaranna á skákborðinu, og var oft ill viðráðinn þegar þar bar á garði, en hann töfraði  fram úr erminni margar vinningsstöður. Kosin í stjórn 1952-1953.

Margeir hefur unnið mikið starf við Skákfélagsblaðið í rúm fjörutíu ár frá 1952.

Margeir var kjörinn heiðursfélagi Skákfélags Akureyrar 1989.

Margeir starfaði fjölda mörg ár  hjá Kaupfélagi Eyfirðinga.

Síðustu ár dvaldi Margeir á Dvalarheimilinu Hlíð á Akureyri.

Útför Margeirs fer fram í dag.

 Blessuð sé minning hans.