Hraðskákkeppni taflfélaga:

Naumur sigur á Mátum 

Það var sannkölluð Akureyrarveisla þegar Skákfélagið mætti hinu norðlenska stórveldi Mátum í 16 liða úrslitum í hraðskákkeppni taflfélaga nú í kvöld, 16. ágúst. Teflt var í húsakynnum Skáksambandsins við Faxafen í Reykjavík. Eins og venja er var keppnin háð í sex borðum, tvöföld umferð með bændaglímufyrirkomulagi, alls 72 skákir.  Fyrstu umferðirnar unnu Mátar með nokkrum yfirburðum og höfðu 8 vinninga forystu eftir þrjár umferðir af 12. Smám saman jafnaðist keppnin og þegar flautað var til hálfleiks var forysta Mátanna komin niður í 1 vinning, 18.5-17.5.  Allt stóð svo í járnum fram eftir síðar hálfleik og fyrir lokaumferðina stóðu liðin jöfn, 33-33. Skákfélagsmenn unnu svo síðustu umferpina 4-2 og viðureignina 37-35. Lauk þar með afar skemmtiloegri og drengilegri viðureign með allsherjarsigri Akureyrska skákskólans. Sveit Skákfélagsins skipuðu þeir Halldór B. Halldórsson, Áskell Örn Kárason, Stefán Bergsson, Gylfi Þórhallsson, Jón Kristinn Þorgeirsson og Óskar Long. Fékk Halldór flesta vinninga okkar manna. Mátarnir telfdu fram þeim Arnari Þorsteinssyni, Pálma Péturssyni, Þorleifi Karlssyni, Arngrími Gunnhallssyni, Jakobi Þór Kristjánssyni, Lofti Baldvinssyni og Magnúsi Teitssyni og eru þeir allir vel kunnir skákáhugamönnum norðan heiða, afsprengi Akureyrska skákskólans. 

 

Skák á Skeljahátíð

 Skákfélag Akureyrar gengst fyrir skákmóti á Skeljahátíðinni í Hrísey laugardaginn 14. júlí kl. 14. Teflt verður á hátíðarsvæðinu og mun Hjörleifur Halldórsson stjórna herlegheitunum. Um er að ræða opið hraðskákmót og er öllum heimil þátttaka. Upplýsingar um ferjusiglingar og aðra viðburði á Skeljahátíðinni má finna á slóðinni hrisey.is

Áskell jónsmessuálfur

Á jónsmessunótt fara álfar og vættir á kreik. Í hóp þeirra bættust níu skákálfar gærkveldi og efndu til útiskákmóts í Kjarnaskógi í samvinnu við Skógræktarfélag Eyfirðinga. Þar var kátt á hjalla; ketilkaffi í boði að hætti skógarmanna og kynjaverur á sveimi eins og fyrr segir. Hjá skákálfum varð þetta niðurstaðan:

Áskell Örn Kárason  7

Haki Jóhannesson 6

Tómas Veihar Sigurðarson 5

Sigurður Eiríksson og Rúnar Ísleifsson 4

Sigurður Arnarso og Karl Steingrímsson 3

Sveinbjörn Sigurðsson 2,5

Andri Freyr Björgvinsson 1,5

Að skákunum loknum hugðust keppendur baða sig nakta í dögginni og óska sér um leið skákstigahækkunar upp á 300 stig. Þetta var þó stöðvað af viðstöddum, enda börn á svæðinu.