Dagskrá næstu vikna

Það er nóg um að vera hjá okkur skákmönnum þessa dagana. Fyrir utan eigin taflmennsku fylgjumst við með okkar manni á erlendri grund, en Markús Orri Óskarsson teflir nú í u-14 ára flokki á heimsmeistaramóti unglinga sem fer fram á Ítalíu. Bestu hunglinga heimsins eru víst engin lömb að leika sér við; Markús tapaði tveimur fyrstu skákunum gegn mjög stigaháum andstæðingum, en vann sigur í þriðju umferð. Mjög gott er að fylgjast með framvindunni á mótinu á Skak.is.

En aftur hingað heim, dagskráin næstu daga:

Í kvöld, fimmtudaginn 16. nóv kl. 20.00   Hraðskák í Skákheimilinu.
Laugardag 18. nóv kl. 13.00               Mánaðarmót barna fyrir nóvember
Mánudag 20. nóv kl. 15.00                 Æfing í framhaldsflokki/boðsmót fyrir unglinga 
Fimmtudag 23. nóv kl. 20.00               Hraðskák í Skákheimilinu.
Sunnudag 26. nóv kl. 13.00                4/5. umferð boðsmóts SA. 30-30 skákir.
Fimmtudag 30. nóv kl. 18.00               Akureyrarmót í atskák, 1-3. umferð.
Sunnudag 3. des kl. 13.00                 Akureyrarmót í atskák, 4-7. umferð.

Æfingar eru svo á hefðbundnum tímum, í almennum flokki á föstudögum (kl. 16.45) og í framhaldsflokki á mánudögum og föstudögum kl. 15.

  

Nýjung; boðsmót fyrir u-1800

Nú erum við að efna til móts sem er nýjung í starfi Skákfélagsins, við köllum það boðsmót. Mótið verður nokkuð frjálslegt í útfærslu, en það er opið öllum með 1799 stig og minna. Mótið hófst reyndar sl. mánudag, en skráning þátttakenda stendur ennþá yfir. Mótsgjald er ekkert.

Við vonumst til þess að mót þetta auðgi skáklífið hér í höfuðstað Norðurlands með því að gefa áhugasömum kost á að spreyta sig í kappskák. Eitt aðalmarkmiðið með mótshaldinu er að gefa lítt reyndum og upprennandi skákmönnum kost á að tefla við reyndari menn og skákmenn með alþjóðleg stig. 

Fyrirkomulagið er eftirfarandi:
Umhugsunartími á skák er 30-30.
Hver þátttakandi teflir að lágmarki eina skák og að hámarki sjö. Yfirsetur eru sumsé leyfðar án takmarkana. 
Engir keppendur geta mæst oftar en einu sinni á mótinu.
Dregið verður um það hverjir tefla saman í upphafi hverrar umferðar. 
Fyrsta umferð hófst sumsé sl. mánudag og verður mótinu fram haldið nú á sunnudaginn kl. 13.00 og þarnæst mánudaginn 13.nóvember. Við gerum ráð fyrir að teflt verði næstu mánudaga kl. 15.00 (þá sameinað æfingu í framhaldsflokki),  en munum skjóta inn umferðum á öðrum tímum einnig eftir hentugleikum og óskum keppenda. 

Skráning: Hægt er að skrá sig með því að láta vita á Facebook eða í tölvupósti til formanns, í [e-mail]. Einnig með því að mæta á skákstað nú á sunnudaginn eða nk. mánudag. Eftir það verður ekki hægt að taka við nýskráningum. 

Dagsetning lokaumferðar liggur ekki fyrir, en þarf að ákveðast bráðlega. Eins og er má giska á lokadag 10. eða 11. desember. 

Íslandsmót ungmenna (8-16 ára); fimm SA-iðkendur tóku þátt!

Íslandsmót ungmenna var háð í Miðgarði í Garðabæ þann 4. nóvember sl. Teflt var um Íslandsmeistaratitla í fimm aldursflokkum. Frá okkur komi fimm keppendur, sem er prýðisþátttaka, enda vorum vuið norðanmenn líklega einu þátttakendurnir utan Stór-Reykjavíkursvæðisins. 
Allir okkar keppendur stóðu sig með sóma og þrír af fimm voru nálægt verðlaunasætum. Lítum á úrslitin:
Í yngsta flokknum (u-8) tefldu Gabríel Máni Jónsson og Skírnir Sigursveinn Hjaltason. Skírnir byrjaði vel en fataðist aðeins flugið þegar á leið og endaði með þrjá vinninga af sjö. Hann á örugglega meira inni. Gabríel tapaði fyrstu skák sinni, en náði sér vel á strik eftir það og fékk þegar upp var staðið, fimm vinninga, jafn marga og sá sem lenti í þriðja sæti. Hann átti vissulega möguleika á enn hærra sæti, þar sem hann tapaði skák sinni í næstsíðustu umferð eftir að hafa leikið tveumur ólöglegum leikjum en var þá með unna stöðu á borðinu.

Enginn keppandi var frá okkur í u-10 flokknum, en í næsta flokki fyrir ofan (u-12) voru þeir Valur Darri Ásgrímsson og Sigþór Árni Sigurgeirsson mættir til leiks.  Valur Darri, sem er yngra ári í flokknum átti við ramman reip að draga, en náði þó þremur vinningum í hús af sjö mögulegum, sem verður að teljast a.m.k. viðunandi árangur. Hann á líka mikið inni fyrir seinna árið. Sigþór er heldur sjóaðri á þessum vettvangi og hafnaði í skiptu fjórða sæti með fimm vinninga.

Markús Orri Óskarsson var okkar keppandi í u-14 flokknum. Hann byrjaði á því að vinna þrjár fyrstu skákir sínar og barðist á toppnum allt mótið. Þegar fimm umferðum að sjö var lokið var hann í toppbaráttunni með fjóra vinninga, en var ófarsæll í lokaumferðunum báðum og tapaði þeim skákum, (naumlega þó). Þótt Markús yrði að sætta sig við fjóra vinninga af sjö sýndi hann engu að síður að hann er í hópi öflugust skákmanna okkar í þessum aldursflokki. Í run mátti ekki miklu muna svo hann væri að tefla um Íslandsmeistaratitilinn í lokaumferð mótsins. Nu er bara að hamra járnið meðan það er heitt!