Íslandsmót skákfélaga - stuttur pistill

Í Rimaskóla í Reykjavík fór um helgina fram Íslandsmót skákfélaga 2023-24, fyrri hluti. Þetta mót er hið stærsta og fjölmennasta sem haldið er á landinu á hverju ári. Fjöldi félaga sendir lið til keppni á mótinu og má ætla að u.þ.b. 300 manns taki þátt í mótinu á hverju ári. Teflt er í fimm deildum, úrvalsdeild og svo deildum 1-4.  Keppnin er tvískipt; fyrri hlutinn fer fram að hausti og síðari hlutinn síðla vetrar, yfirleitt í mars.

Skákfélagið sendi að þessu sinni þrjár sveitir til keppni. Ætlunin var að senda fjögur lið, en vegna forfalla þurfti að fækka þeim í þrjú. Skemmt er frá því að segja að allar sveitirnar náðu góðum árangri og berjast um sigur, hver í sinni deild.

A-sveit félagsins teflir í 1. deild (þeirri næstefstu). Sveitin vann þrjár viðureignir af fjórum og gerði jafnt í einni; er í öðru sæti á hælunum af forystusveitinni frá Breiðabliki. Líklegt er að viðureign þessara sveita í síðari hlutanum í vor skeri úr um það hvor sveitin fær að tefla í úrvalsdeild á næsta tímabili.

B-sveitin teflir í annarri deild og hefur tekið forystuna þar, unnið þrjár viðureignir og gert jafnt í einni. Flestir sigrar mjög öruggir og bar hæst sigur á b-sveit KR-inga í fjórðru umferðinni. Hér eru góðir möguleikar á sigri, eða a.m.k. öðru af tveimur efstu sætunum og þá stökk upp í fyrstu deild að ári. B-sveit SA hefur löngum verið mjög öflug og vann meira að segja A-sveitina einusinni í deildakeppninni!

C-sveitin var að mestu skipuð ungum iðkendum, en þó tefldi nestor Sigurður Eiríksson tvisvar á fyrsta borði með góðum árangri. Sveitin vann þrjár fyrstu viðureignir sínar en laut í lægra haldi fyrir langlangsterkustu sveit deildarinna, Dímoni, í fjórðu umferð.  Náði þó að vinna eina skák af Dímonunum (Markús Orri!), sem annars unnu allar aðrar skákir sínar á mótinu.  

Í þeim deildum sem hér ræðir um eru sveitir skipaðar sex mönnum í hverri umferð og þarf 3,5 vinninga til sigurs í hverri viðureign, sem þá gefur tvö stig.

Allnokkur stigagróði rann inn í akureyrska stigahagkerfið um helgina; flest komu hjá C-sveitarmönnum. Af sigursælustu liðsmönnum má nefna þá Markús Orra Óskarsson, sem vann allar fjórar skákir sínar og þá Andra Frey Björgvinsson, Harald Haraldsson og Sigurð Eiríksson, sem fengu þrjá og hálfan vinning af fjórum.  Björn Ívar Karlsson tefldi þrjár skákir og vann allar og Jón Kristinn Þorgeirsson fékk þrjá vinninga af fjórum. Þórleifur Karlsson vann tvær skákir og hlaut þriðja vinninginn þegar andstæðingur hans mætti ekki til leiks. Þessir allir eru taplausir (og reyndar nokkrir fleiri). Drýgst var stigaöflunin hjá Markúsi Orra sem hækkar um rúm 50 stig fyrir frammistöðuna.  

Að venju verður síðari hlutinn háður á vormánuðum 2024. Við bíðum öll spennt eftir síðustu þremur umferðunum!

Haustmótið heldur áfram!

Eftir hlé sem gert var á haustmóti félagsins vegna Evrópumóts skákfélaga og svo Íslandsmóts skákfélaga sem var háð um nýliðna helgi, tökum við nú til við mótið á nýjan leik. Fimm umferðum af sjö er lokið og verða tvær síðustu umferðirnar tefldar á næstu dögum. Sjötta umferðin er á dagskrá á miðvikudag 18. október og hefst kl. 18. 
Stöðuna á mótinu má finna á chess-results, en mjög jafnt er á toppnum að tveimur umferðum óloknum. 
Þeir Andri Freyr Björgvinsson, Arnar Smári Signýjarson og Sigurður Eiríksson hafa náð í fjóra vinninga í fimm skákum, Eymundur Eymundsson hefur þrjá og hálfan og Markús Orri Óskarsson, Hreinn Hrafnsson og Gabríel Freyr Björnsson hafa þrjá vinninga. Einhver af þessum mun hampa meistaratitlinum að mótinu loknu. 

Í sjöttu umferð tefla þessir saman:
Eymundur og Sigurður (þessi skák er þegar tefld og lauk með sigri Eymundar).
Gabríel og Andri
Markús og Arnar Smári
Hreinn og Valur Darri
Natan og Sigþór
Stefán og Goði
Damian og Jökull Máni
Helgi Valur situr hjá.

Lokaumferðin verður svo tefld á sunnudag.

Durrës; góð úrslit í fimmtu umferð.

Í fimmtu umferð mættum við liði sem skrráð er í Lúxemburg; með tvo sterka alþóðlega meistara innarborðs. Þrír liðsmanna í dag skráðir sem þjóðverjar. Þeir ærri á öllum borðum og því ljóst að við yrðum að taka á honum stóra okkar (og hann er býsna stór!). 

Skákirnar fóru nokkuð rólega af stað og stöðurnar tóku ekki strax á sig skýra mynd. Sérstaklega voru töflin á öðru og þriðja borði flækjuleg og óvíst um úrslit. Fljótlega eftir að 30-leikja markinu var náð (þá má semja), datt hinsvegar allt í dúnalogn og jafntefli samið í þessum tveimur skákum. Fyrsti púnktur Halldórs Brynjars og áfranmhald á góðri frammistöðu Andra Freys sem þurfti að klóra sig fram úr óvenjulegur afbrigði í Benköbragði (sem hann beitti með svörtu) og andstæðingur hans virtist nokkuð vel heima í. 

Góð úrslit þetta, enda andstæðingarnir einum 2-300 stigum hærri en okkar menn. Kannski hafa þeir viljað treysta á að þetta ynnnist á hinum borðunum, en því var ekki að heilsa. Mikael tefldi af mikilli dirfsku á fjórða borði, kannski full djarflega að smekk þess sem þetta ritar, gegn einhverkonar hollensku sulli andstæðingsins, en skákin hófst með 1.c4 b6 og svo kom f7-f5 skömmu seinna hjá svörtum. Mikki fórnaði manni fyrir þrjú peð og umtalsverða pressu, en kóngur hans var ekki vel varinn og mótspil andstæðingsins dugði til vinnings. Þá voru þeir komnir í forystu og svona heldur líklegra að við myndum tapa viðureigninni. 

Áskell var þó með traust tafl á fimmta borði sem kom upp úr nimzoindverskri vörn hans. Eins og títt er fékk hvítur biskupaparið en vissi ekkert hvernig hann átti að nýta það og skipti hægt og rólega upp í heldur verri stöðu. Fullkomin var úrvinnslan ekki hjá aldursforsetanum en þó nægilega vöndu' til að fá heilan vinning.

Á sjötta borði beitti Haraldur stýrimaður hliðarafbrigði gegn franskri vörn lúxemborgarans sem vandaði sig greinilega mikið í framhaldinu. Halli fékk rúma og þægilega stöðu en svartur undirbjó gegnumbort eftir c-línunni sem leit ekki vel út fyrir okkar mann. Í sviptingum í lokin þar sem tíminn var naumur (einkum hjá Halla) ætlaði lúxarinn að koma með óverjandi sleggju, en missti af snjallri drottningarfórn hvíts sem hótaði máti. Þurfti hann ekki að kemba hærurnar eftir þetta.  

Er þá ósagt frá viðureigninni á efsta borði þar sem Rúnar Sigurpálsson stýrði svörtu mönnunum gegn IM upp á 2532 stig. Upp kom drottningarbragð og aðeins þrengri staða á svartan sem tefldi þó vörnina skínandi vel. Endatafl með hrókum og öflugum hvítum riddara gegn aðeins lakari biskupi svarts. Rúnar virtist lengi vel ætla að klóra í jafntefli, en hafði lítið mótspil. Á endan brustu varnirnar og hvítur náði að sigla sigrí í höfn. 

Engu að síður frábær úrslit og sveitin þegar búin að toppa árangurinn í fyrra. Við bíðum spenntir eftir lokaumferðunum tveimur.