Max 5000 sveitakeppnin

Sunnudaginn 15. janúar kl. 13 mun Skákfélag Akureyrar í annað sinn standa fyrir hinni skemmtilegu Max-5000 sveitakeppni.

Þetta er liðakeppni, þriggja manna sveitir þar sem samanlagður stigafjöldi hvers liðs má ekki fara umfram 5.000 stig. Stigalausir teljast með 1.000 stig. Miðað er við alþjóðleg hraðskákstig.

Umhugsunartími er 10 mínútur á skákina og að sjálfsögðu er teflt í aðstöðu Skákfélagsins í íþróttahöllinni.

Áhugasömum án liðs er bent á að hafa samband við Rúnar Sigurpálsson.

Æfingar fyrir börn og unglinga að hefjast

Æfingar verða með sama hætti og á haustmisseri, eða því sem næst:

Almennur flokkur/byrjendur:   föstudagar kl. 16.30
Framhaldsflokkur:             mánudagar kl. 17.30 og fimmtudagar kl. 15.30.

Ný tímasetning á fimmtudagsæfingum er til skoðunar, enda virðast margir iðkendur vera uppteknir við annað á þessum tíma. Til greina kemur að færa tímann yfir á miðvikudaga eða byrja fyrr á fimmtudögum. Ef af breytingu verður mun það verða auglýst sérstaklega. 

Fyrir utan almennt mótahald (s.s. Skákþing Akureyrar í yngri flokkum) er ráðgert að setja upp syrpu mánaðarmóta á vormisseri, eitt mót í mánuði. Fyrsta mótið verður laugardaginn 14. janúar kl. 10.

Norðanmenn unnu Hverfakeppnina.

Hin hefðbundna hverfakeppni SA var tefld næstsíðasta dag ársins eins og stundum áður. Þátttaka nú var í linara lagi og spurning hvort ekki þurfi að huga að breytingu á fyrirkomulaginu. 
En sumsé: skipt var í lið eftir búsetu og í þetta sinn var línan dregin um Hrafnagilsstræti - ögn sunnar en áður. Sunnanmegismenn tefldu fram fimm köppum, en Norðlingar fjórum. Tefld var bændaglíma - tvöföld umferð.

Leikar fóru þannig að norðrið vann sögulegan sigur, 28 vinningar gegn 12. Reyndar ber að taka fram að ekki var sérstaklena leitað að fjarskiptatækjum eða titrandi kúlum í innviðum keppenda áður en mótið hófst. Kann að vera að þetta hafi haft nokkur áhrif á niðurstöðuna, en úr því verður ekki skorið nú. Hans Niemann var hinsvegar titlaður "sérlegur aðstoðarmaður" sigursveitarinnar. Ekkert meira um það.

Af norðarsveitarmönnum fékk Rúnar Sigurpálsson (öðru nafni "Shaking Steven") flesta vinninga, eða 9 af 10. Bestur sunnanmanna var Mikael Jóhann Karlsson (öðru nafni "Mighty Mickey") með 4.5 vinning af 8. 

Svona var þessu nú misskipt.

Næsta mót verður svo á morgun nýjársdag og hefst kl. 14.00.