Hausthraðskákmótið á sunnudag

Nú að loknu haustmótinu - Arion bankamótinu þar sem Sigurður Arnarson hreppti meistaratitilinn í þriðja sinn og mun því  varðveita næsta árið hinn forkunnarfagra bikar sem Mjólkursamsalan gaf á sínum tíma (fjölskyldu hans og nágrönnum til ómældrar gleði), er komið að meistaramóti félagsins í hraðskák. Það nefnum við hausthraðskákmótið og hefst það með pompi og prakt sunnudagin 27. október kl. 13.   Heyrst hefur að hinn aldraði meistari síðustu þriggja ára muni enn freista þess að verja meistaratitilinn í hamagangi og klukkubarningi. Ýmsir eru hinsvegar kallaðir til að leggja stein í götu hans. Þeir sem vilja taka þátt í því -  eða a.m.k. fylgjast með spennandi skákum - eru boðnmir velkomnir í Skákheimilið á sunnudaginn. Að venju verður heitt á könnuni og glatt á Hjalla.  

Anand og Carlsen

Fimmtudaginn  24. október munu félagar í Skákfélaginu hita upp fyrir heimsmeistaraeinvígi þeirra Anands og Carlsens sem hefst í næsta mánuði. Nýkrýndur skákmeistari Skákfélagsins mun segja frá viðureignum þeirra hingað til, fara yfir tölfræði og renna yfir nokkrar skákir. Herlegheitin hefjast kl. 20.00 í húsakynnum félagsins.

Allir velkomnir meðan húsrúm leyfir.

SA skákmeistari SA

Rétt í þessu var að ljúka haustmóti Skákfélags Akureyrar - Arion bankamótinu. Mótið var teflt í tveimur lotum; á þremur dögum fyrir Íslandsmót skákfélaga og svo aftur nú að því ágæta móti loknu. Magister Sigurður Arnarson tók snemma forystuna og notaði til þess fremur einföld meðöl - hann vann allar skákirnar. Kvað svo rammt að þessu að þegar í áttundu umferð - þá hafði Sigurður teflt sjö skákir og setið yfir einu sinni - var hann með sjö vinninga og meistaratitillinn í höfn. Aðrir ógnuðu ekki forystu hans verulega - Smári Ólafsson hélt lengi í humátt á eftir Sigurði, en missti af lestinni þegar hann tapaði fyrir Símoni Þórhallssyni í sjöundu umferð. Símon þessi kom hvað mest á óvart í mótinu og hreppti þriðja sætið nokkuð örugglega, á eftir Sigurði og áðurnefndum Smára. Aðrir fengu heldur minna. Allt fór mótið vel fram og drengilega - um það getur siðameistari Sveinbjörn Óskar vitnað. Úrslit tveggja síðustu umferða urðu sem hér segir:

8. umferð
Sigurður-Karl         1-0

Rúnar-Hjörleifur     0-1

Sveinbjörn-Logi     0-1

Haraldur-Smári      0-1

9. umferð

Smári-Sigurður      1/2

Símon-Haraldur     0-1

Hjörleifur-Sveinbjörn 1-0

Karl-Rúnar             0-1

Lokastaðan er þessi:

k.		Name	Rtg	FED	1	2	3	4	5	6	7	8	9	Pts.	TB1	TB2	TB3
1		Arnarson Sigurdur	2028	ISL	*	½	1	1	1	1	1	1	1	7.5	25.50	0.0	7
2		Olafsson Smari	1984	ISL	½	*	0	½	1	1	1	1	1	6.0	19.00	0.0	5
3		Thorhallsson Simon	1588	ISL	0	1	*	1	½	0	1	½	1	5.0	17.00	0.0	4
4		Halldorsson Hjorleifur	1936	ISL	0	½	0	*	1	0	1	1	1	4.5	12.50	0.0	4
5		Isleifsson Runar	1857	ISL	0	0	½	0	*	1	1	1	1	4.5	11.00	0.0	4
6		Haraldsson Haraldur	0	ISL	0	0	1	1	0	*	0	1	½	3.5	11.75	0.0	3
7		Sigurdsson Sveinbjorn	1807	ISL	0	0	0	0	0	1	*	1	0	2.0	5.00	0.0	2
8		Steingrimsson Karl Egill	0	ISL	0	0	½	0	0	0	0	*	1	1.5	4.00	0.0	1
9		Jonsson Logi Runar	0	ISL	0	0	0	0	0	½	1	0	*	1.5	3.75	0.0	1

 Svo minnum við á fyrirlestur fimmtudaginn 24. október þar sem innstu rök væntanlegs heimsmeistareinvígis verða rannsökuð og loks lok haustmótsins sunnudaginn 27. október þar sem hausthraðskákmótið fer fram og verðlaun veitt fyrir haustmótið - Arion bankamótið. Þar mun margt bera til tíðinda.