Haustið er tíminn!

Það má með sanni segja að skáktíðin nú í sumarlok byrji með látum! Skákfélagsmenn láta víða til sín taka í öðrum sóknum og nú styttist í að þeir geri það líka heimafyrir. Í Reykjavíkurhreppi stendur Haustmót TR nú yfir, öðru nafni Gagnaveitumótið. Þar tefla í efsta flokki félagar Stefán Bergsson og Gylfi Þórhallsson. Gylfi byrjaði fremur treglega, en er að sækja í sig veðrið, en Stefán hefur átt meira láni að fanga hingað til. Þeir félagar tefla frestaða skák sína úr fimmtu umferð einmitt í kvöld. Fylgjast má með árangri þeirra hér.

Nú um helgina hélt hið nýsameinaða félag GMH - eða öllu heldur Þingeyjararmur þess - hið árlega Framsýnarmót á Breiðumýri í Reykjadal. Þar voru keppendur alls 29 og mótið allt hið ánægjulegasta.  Skákfélagsmenn áttu nokkurn þátt í því og stóðu fyllilega undir væntingum aðdáenda sinna. Áskell Ö(ldungur) Kárason var þar efstur við annan mann, en þeir Sigurður Eiríksson (5 af 7), Logi Rúnar Jónsson (4,5), Andri Freyr Björgvinsson (4) og Símon Þórhallsson (3,5) bættu allir við sig skákstigum með árangri sínum. Haraldur Haraldsson (4,5) var um það bil á pari og endaði í fjórða sæti. Aðeins Stefán Bergsson (4) tapaði nokkrum stigum, en bætti það tap upp með afrekum á öðrum sviðum. Hann átti unnið á Áskel í lokaskákinni, en kaus að fylgja því ekki eftir. Allt má sjá um úrslit mótsins hér.  Myndum er stolið af skák.is.

Þá má ekki gleyma okkar mönnum suður með sjó, (þ.e. suður með Adríahafi - þar heitir Svartfjallaland), en þeir Mikael Jóhann Karlsson og Jón Kristinn Þorgeirsson, ungstirni okkar, etja þar kappi við helstu ungmenni Evrópu á skáksviðinu í EM ungmenna, sem hófst í gær, 29. sept. Þá náði Jón jöfnu við mun stigahærri menn, en Mikael mátti játa sig sigraðan gegn öðru ofurefli.Fylgjast má með framgangi þeirra félaga í dag hér.

En þá er komið að aðalmálinu, HAUSTMÓTI SKÁKFÉLAGS AKUREYRAR, sem hefst nú á fimmtudaginn. Dagskrá verður sem hér segir:

Fimmtudagur 3. október kl. 20.00 1-2. umferð

Föstudagur 4. október kl. 20.00 3. umferð

Laugardagur 5. október kl. 13.00 4.umferð

Sunnudagur 6. október kl. 13.00 5. umferð

(Hlé vegna Íslandsmóts Skákfélaga)

Laugardagur 19. október kl. 13.00 6. umferð

Sunnudagur 20. október kl. 13.00 7. umferð

Fyrirkomulag mótsins er áformað þannig, að fyrst verða tefldar tvær atskákir, en síðan fimm skákir með umhugsunartímanum 60 mínútur á skákina, auk þess sem 30 sekúndur bætast við fyrir hvern leik. Þó áskilur mótsstjórn sér rétt til að gera á þessu fyrirkomulagi minniháttar breytingar ef nauðsyn muni krefjast þess þegar fjöldi þátttakenda liggur fyrir.    Skráning er hjá formanni félagsins í [e-mail], eða á skákstað, í síðasta lagi 15. mínútum fyrir upphaf fyrstu umferðar. 

Fræðslu- og skemmtikvöld á fimmtudag

Opið hús verður hjá Skákfélaginu á morgun, fimmtudaginn 26. september, kl. 20.00.  Tvö skemmtiatriði eru þegar komin á dagskrá:

1.Norðurlandamót öldunga á Borgundarhólmi 7-16. september. Áskell segir ferðasögu og sýnir nokkrar skákir. Litskyggnusýning.

2. Íslandsmót Skákfélaga 10-13. október nk. Fjallað um væntanlegt mót og þátttöku Skákfélagsins.  Þeir sem hyggja á þátttöku eru sérstaklega hvattir til að mæta og láta til sín taka. M.a. verður rætt um ferða- og gistitilhögun. 

Fjórðungsmót á morgun

Fyrsta 15 mínútna mót á þessari skáktíð verður haldið á morgun, sunnudaginn 23. september. Opið öllum sem vettlingi geta veldið og hinum líka.

Sjáumst í skákheimilinu kl. 13

Stjórnin