Okkar menn sunnan heiða

Þótt frísklega sé teflt hér í Eyjafirði má ekki gleymast að margir okkar ágætu félagsmanna hafa (a.m.k. um hríð) valið sér að heyja orrustur sínar annarsstaðar, einkum á því margumtalaða höfurborgarsvæði. Þar sýna þeir andstæðingum sínum oftar en ekki í tvo heimana. Nýlega lauk Skákþingi Garðabæjar í þvísa bæjarfélagi og var annar sigurvegara mótsins gamall félagi okkar og nýr, Loftur Baldvinsson. Loftur hefur verið manna virkastur undanfarna mánuði og greinilega í mikilli framför. Nánar má skoða árangur hans HÉR. Eins og menn rekur augun í náði hann einmitt að leggja fyrrverandi formenn félagsins okkar og höfuðpaur þess til margra ára, Gylfa Þórhallsson, að velli. Það sýnir betur en nokkuð annað hvaða framförum Loftur hefur tekið.

En þótt Gylfi hafi mátt játa sig sigraðan í lokaumferð Skákþings Garðabæjar verður að telja harla ólíklegt að hann láti það gerast í öðru móti þar sem hann hefur staðið í fremstu víglínu, Vetrarmóti öðlinga hjá TR. Þar er Gylfi í baráttunni um efsta sætið (eins og HÉR má sjá) og lýkur henni nú á miðvikudag. Ef allt gengur eftur munu Skákfélagsmenn því hampa tveimur gullum í mótum þar syðra á nokkrum dögum! Við sendum þeim félögum, svo og öðrum sunnanmönnum í SA okkar bestu baráttukveðjur!

Jón Kristinn vann haustmót yngri flokka

Tíu keppendur mættu til leiks á haustmóti yngri flokka - Sprettsmótinu sem háð var í gær, sunnudaginn 7. desember.  Keppendur voru á öllum aldri - ef svo má segja, sá yngsti 6 ára og sá elsti 14. Í elsta flokknum, 15 ára og yngri voru mættir bekkjarbræðurnir tveir úr Lundarskóla og reyndist innbyrðis skák þeirra vera úrslitaskák mótsins. Aðrir keppendur áttu allir heima í flokki 11 ára og yngri. Þar vann Óliver Ísak Ólason öruggan sigur. Annar varð Gabríel Freyr Björnsson og bronsi skiptu á milli sín þeir Sigurður B. Þórisson, Garðar Þórisson og Auðunn Elfar Þórarinsson. Heildarúrslit sem hér segir:

 

Jón Kristinn Þorgeirsson (1999)     9

Símon Þórhallsson (1999)              8

Óliver Ísak Ólason (2002)              7

Gabríel Freyr Björnsson (2004)      5

Sigurður B. Þórisson (2004), Garðar Þórisson (2004) og Auðunn Elfar Þórarinsson (2003) 4

Sunna Þórhallsdóttir (2002)        3

Victor Örn Garðarsson (2004)      1

Tómas L. Tanska (2007)              0

Mótið fór vel fram í hvívetna og nutu keppendur jafnt og aðstoðarmenn ljúffengra veitinga frá Jóni Spretti í hléi. Skákstjórar létu þar sitt ekki eftir liggja. 

 

Haustmót yngri flokka - Sprettsmótið

Laugardaginn 7. desember verður haustmót yngri flokka SA háð í  Skákheimilinu.

Þangað eru allir krakkar fæddir 1998 og síðar boðnir velkomnir. Teflt verður í um meistaratitil skákfélagsins í unglingaflokki og í þremur eftirtöldum aldursflokkum:

·        Í flokki 11 ára og yngri (fædd 2002 og síðar)

·        Í flokki 12-13 ára (fædd 2000 og 2001)

·        í flokki 14-15 ára (fædd 1998 og 1999

Tefldar verða 7 umferðir með 15 mín. umhugsunartíma, en mótshaldari áskilur sér þó rétt til að breyta fjölda umferða og umhugsunartíma lítillega ef það hentar betur þegar fjöldi keppenda liggur fyrir.

Hitt er þó víst að áður en síðasta umferð hefst verða bornar á borð pizzur í boði Spretts-inn, sem löngum hefur verið okkur skákmönnum innan handar í pizzumálum. Svaladrykkur býðst með pizzunum og herma heimildir okkar að þær verði óvenju ljúffengar að þessu sinni.

Þátttaka er með öllu ókeypis og hefst mótið kl. 13 laugardaginn 7. desember 

Ath. að teflt verður í suðursal félagsins – ekki þar sem æfingarnar eru venjulega