Hverfakeppni SA:

Öruggur sigur Norðurbandalagsins

Hin árlega hverfakeppni SA var háð á næstsíðasta dagi ársins sem nú er senn á enda. Eins og undanfarin ár leidduþar tvö lið fram hesta sína; annað var skipað sk. Þorpurum sem fengu til liðs við sig þá sem í hálfkringi hafa verið nefndir Eyrarpúkar, enda búsettir á Oddeyri.  Þá styrktu þeir sveit sína með einum liðsmanni sem nýlega er fluttur suður yfir Glerá, en þar sem hann getur horft yfir Þorpið úr eldhúsglugganum hjá sér þótti það nægileg ástæða til að hann fylgdi þeim að málum í þetta sinn. Hitt liðið var skipað skákmönnum búsettum í suðurhluta bæjarins; allir sunnan Glerár og reyndar allir á Brekkunni,uppnefndir Brekkusniglar af andstæðingunum.

Sama liðsskipting var í keppninni í fyrra og unnu þá Brekkusniglar nauman sigur. Í þetta sinn fór á annan veg. Teflt var á 13 borðum og var keppnin tvískipt. Fyrst tefldi hver maður tvær 15 mín skákir við sama andstæðing. Í fyrri umferðinni neyttu norðlingar aflsmunar og unnu stórsigur: 8.5-4.5 Þeir slökuðu svo örlítið á í seinni umferðinni og Brekkusniglar mörðu nauman sigur: 7-6. Samtals unnu því Þorparar&co 15 mín. skákirnar 14.5-11.5.

Þá var tekið til við hraðskák skv. bændaglímufyrirkomulagi; hver liðsmaður tefldi við alla í hinu liðinu; alls 13 skákir. Norðurbandalagið vann fyrstu umferðina 9-4 og leit aldrei til baka eftir það. Sunnanmenn unnu aðeins sigur í tveimur umferðum af 13 og í einni var jafnt. Þeim gekk einkum illa í fyrri hluta keppninnar, en söxuðu á forskot andstæðinga sinna í síðustu 5 umferðunum, sem þeir unnu með 5 vinninga mun. Það dugði þó ekki til og öruggur sigur 92-77 var staðreynd. Bestum árangri norðanmanna náð Ólafur Kristjánsson, sem fékk 10,5 vinning í 13 skákum og næstur var Tómas Veigar Sigurðarson með 9,5.  Af sunnanmönnum bar Jón Kristinn Þorgeirsson af og vann allar sínar skákir, 13 að tölu. Rúnar Sigurpálsson fékk 11 vinninga og Andri Freyr Björgvinsson 10. Aðrir voru lakari.

Þar með lauk síðasta skákmóti ársins. Fyrsta skákmót nýs árs er þó skammt undan; árlegt NÝJÁRSMÓT hefst kl. 14 á fyrsta degi ársins 2014. 

Óskum við svo félögum okkar landsmönnum öllum gleðilegs nýs árs! 

 

Áskell jólasveinn SA

Jólahraðskákmót SA var háð í gær, 29. desember. Þrátt fyrir afbragðs skíðaveður mættu 15 keppendur til leiks og tefldu innbyrðis 14 skákir hver. Allt fór mótið vel fram, nema hvað einn keppandi gleymdi að sitja yfir og annar gerði það tvisvar - sem er óvenjulegt. Þetta var þó allt leiðrétt að lokum og allir fóru bærilega sáttir heim.  Úrslit mótsins leiddu í ljós hver hafði etið minnst af óhollum mat yfir jólin og hverjir voru enn að ná sér eftir ofátið. Ekki meira um það að sinni, en úrslit urðu sem hér segir:

1		Áskell Örn Kárason		13½
2		Jón Kristinn Þorgeirsson		12
3		Sigurður Eiríksson		11½
4		Smári Ólafsson		11
5		Sigurður Arnarson		10½
6		Andri Freyr Björgvinsson		8
7		Haraldur Haraldsson		7
8		Ólafur Kristjánsson		6½
		Karl Egill Steingrímsson		6½
10		Sveinbjörn Sigurðsson		5½
11		Kristinn P Magnússon		4
12		Jón Aðalsteinsson		3
13		Sveinn Arnarson		2½
		Einar Guðmundsson		2½
15		Stefán Júlíusson		1

11	Kristinn P Magnússon		4
12	Jón Aðalsteinsson		3
13	Sveinn Arnarson

 

Gleðilega jólahátíð!

Jólanefnd Skákfélags Akureyrar óskar félögum nær og fjær, svo og skákvinum öllum, gleðilegrar jólahátíðar.  Nefndin hefur í heiðri friðarboðskap jólanna, en minnir á að hann nær þó ekki til reitanna 64ra. Þar skulu menn halda áfram að vega hvern annan, þó í fullri vinsemd. Hún vonar að enginn fari í jólaköttinn og að allit geti mætt sáttir og saddir sunnudaginn 29. desember nk. kl. 13 þegar JÓLAHRAÐSKÁKMÓT félagsins fer fram.   Næsta dag, þann 30. desember kl. 20 verður hin magnaða HVERFAKEPPNI svo háð. Þá takast á norður- og suðurhlutamenn og er þá öllu til tjaldað.

GLEÐILEG JÓL!