Úrslit Nýársmótsins

Þau voru tíu sem mættu fersk til leiks á Nýársmótið á fyrsta degi ársins. Meðan einhverjir sátu heima að borða afganga og jafna sig eftir áramótaskaupið og flugeldana var háð mikil barátta í húsakynnum S.A. Tefldar voru hvorki fleiri né færri en 18 umferðir, sem sagt allir við alla tvisvar sinnum. Ljóst var að þau sem voru mætt voru skákþyrst þrátt fyrir mikla jóladagskrá hjá félaginu. Svo fór að lokum að Andri Freyr hafði sigur úr býtum með 16,5 vinning. Næstur á eftir honum kom Jon Olav Fivelstad sem dvaldi hér í bæ yfir áramótin með 15,5 vinning. Jafnir í 3.-4. sæti voru þeir Karl Egill Steingrímsson og Sigurður Eiríksson með 13 vinninga. Heildarstaðan var svohljóðandi:

 

1. Andri Freyr Björgvinsson 16,5/18

2. Jon Olav Fivelstad 15,5

3.-4. Karl Egill Steingrímsson og

Sigurður Eiríksson 13

5. Hjörtur Steinbergsson 11,5

6. Arna Dögg Kristinsdóttir 6,5

7. Jón Magnússon 5,5

8.-9. Markús Orri Óskarsson og

Ólafur Jens Sigurðsson 4

10. Sigþór Árni Sigurgeirsson 0,5

Þorpið/Efri Brekkan sigurvegari Hverfakeppninnar 2019

Í hinni árlegu Hverfakeppni var, líkt og síðustu ár, skipt í tvær sveitir. Að þessu sinni tefldu saman annarsvegar Þorpið og efri Brekkan (ofan Mýrarvegs)og neðri Brekkan, Eyrin og Innbærinn hinsvegar. Fyrst var gripið til atskákar og fóru leikar svo:
(Lið Þorpsins og efri Brekunnar - neðri Brekkan, Eyrin og Innbærinn)

 

Jón Kristinn Þorgeirsson - Rúnar Sigurpálsson 1-0

Sigurður Arnarson - Símon Þórhallsson 0-1

Smári Ólafsson - Andri Freyr Björgvinsson 0-1

Haki Jóhannesson - Sigurður Eiríksson 0-1

Benedikt Stefánsson - Hjörleifur Halldórsson 1-0

Jon Olav Fivelstad - Gunnar Logi Guðrúnarson 1-0

Eymundur Eymundsson - Baldur Thoroddsen 1-0

Arna Dögg Kristinsdóttir - Tobias Þórarinn Matharel 1-0

Jón Magnússon - Sigþór Árni Sigurgeirsson 0-1

 

Naumur sigur Þorpsins/efri Brekkunnar 5-4.


Að atskákinni lokinni tók við hraðskák, bændaglíma, þar sem Þorpið/efri Brekkan hafði einnig sigur, 45-36. Hlutskarpastur í því liði var Jón Kristinn sem hlaut 8,5 vinning af 9. Smári Ólafsson vann sér inn 6 og Sigurður, Benedikt og Jon Olav hlutu allir fimm vinninga. Í liði neðri Brekkunnar, Eyrinnar og Innbæjarins fékk Símon flesta vinninga, 8,5. Andri hlaut 8, Rúnar 7,5 og Sigurður 7. Að þessu sinni var breiddin heldur meiri í sigurliðinu en tapliðinu voru margir ungir drengir sem eiga eftir að láta til sín taka á nýju starfsári.

Andri Freyr jólasveinn SA 2019

Nú er sú tíð að Andri Freyr Björgvinsson vinnur flest af stærri mótum hér í höfuðstað Norðurlands. Nú var það Jólahraðskákmótið sem haldið var annan í jólum. Tólf keppendur mættu til leiks og var baráttan hörð og tvísýn um sigurinn milli Andra, Símonar Þórhallssonar, Sigurðar Arnarsonar og Stefáns Bergssonar. Aðrir komu í humátt þar á eftir. Lokastöðuna í mótinu má sjá hér.

Þess má geta að mótið var reiknað til alþjóðlegra hraðskákstiga.

Næst verpur blásið til hverfakeppninnar gamalkunnu þann 29. des. og svo brestur nýjársmótið á kl. 14 á fyrsta degi komandi árs.