Skákæfingar að hefjast!

Æfingadagskrá fyrir haustmisserið 2020 liggur nú fyrir. Hún er að sjálfsögðu birt með fyrirvara um ófyrirsjáanlegar breytingar, m.a. vegna hugsanlegra sóttvarnaraðgerða. Eins og er ættu þær þó að geta farið fram með hefðbundnum hætti, nema ef svo ólíklega vilji til að viðhafa þurfi sérstaka hópaskiptingu vegna mikillar þátttöku. Þá er mælst til þess að foreldrar og aðrir fylgdarmenn snúi við í dyrunum meðan núverandi ástand varir. Æfingar verða eins og áður í Íþróttahöllinni, gengið inn að vestan (nyrðri dyrnar sem vita út að Þórunnarstræti).

 

Í þetta sinn er dagskráin nokkuð breytt frá því sem var í vor. Eftir sem áður verður iðkendum skipt í tvo flokka eftir aldri (með ákveðnum sveigjanleika þó). Nú bjóðast öllum tveir æfingatímar á viku, en val um einn eða tvo tíma er þó frjálst. Æfingatímar eru þessir:

 

Mánudagar kl. 17:30-19:00  Yngri börn og byrjendur (f. 2011 og síðar)

Þriðjudagar kl. 16:00-17:30  Framhaldsflokkur (f. 2010-2005)

Miðvikudagar kl. 16:00-17:30  Opinn tími fyrir báða flokka

Föstudagar kl. 16:00-17:30  Framhaldsflokkur (f. 2010-2005)

 

Æfingagjald fyrir haustmisseri verður kr. 8.000 fyrir þau börn sem æfa einn dag í viku, en kr. 14.000 fyrir þau sem ætla að nýta sér tvo daga.

Skráning á staðnum eða í netfangið [e-mail]

 

Þau Elsa María Kristínardóttir og Hilmir Vilhjálmsson munu sjá um æfingarnar á mánudögum, en Andri Freyr Björgvinsson og Áskell Örn Kárason um hina dagana. Aðrir leiðbeinendur koma til skjalanna eftir þörfum.

 

Æfingar hefjast strax í næstu viku, 31. ágúst. Síðasta æfing fyrir jólafrí er áformuð 16. desember.

Upphaf nýs skákárs á tímum Covid-19

Þótt margt sé nú öðruvísi en áður var er nýtt skákár að hefjast nú að loknu sumri. Óvissa er um framvinduna, en útlitið er þetta:

1. Meðan tveggja metra reglan gildir mun almennt skákmótahald liggja niðri. Ekki verður hægt að halda skákmót nema með sérstökum útbúnaði og tilfæringum sem við ráðum ekki við sem stendur. Startmótið verður auglýst strax og við sjáum okkur færi á því.
2. Æfingar fyrir börn og unglinga, svo og mót fyrir þau sem eru fædd 2005 og síðar, geta farið fram óhindrað. Við stefnum á að byrja æfingar í kringum mánaðarmót – nánar auglýst eftir næstu helgi.
3. Til skoðunar er að koma á sérstökum æfingum fyrir stúlkur (f. 2005 og síðar!) sem byrja munu með helgarnámskeiði seint í september undir stjórn landliðskvenna í skák.
4. Á dagskrá eru unglingamót á landsvísu (væntanleg öll á höfuðborgarsvæðinu):
5. a) Meistaramót Skákskóla Íslands og 6. september. Stefnt er því að þetta mót verði að          hluta til undankeppni fyrir EM í netskák í flokkum U12/U14 sem fram fer 18.-20. september.
6. b) Íslandsmót ungmenna (8-16 ára) 17. október.
7. c) Íslandsmót unglingasveita október.

Þetta eru allt skemmtileg mót þar sem okkar iðkendur geta fengið tækifæri á að reyna sig við jafnaldra annarsstaðar af landinu. Skákfélagið mun verða áhugasömum innanhandar um ferðir og þátttöku.

 

5. Íslandsmót skákfélaga er fyrirhugað dagana 9-11. október í Egilshöll í Reykjavík. Þar er Skákfélagið með fjórar sveitir skráðar. Mikil óvissa er þó um það hvort þessi dagsetning standist en það mun skýrast bráðlega.

 

6. Eins og þegar hefur verið tilkynnt mun öll starfsemi félagsins færast í Norðursalinn í Íþróttahöllinni, þar sem Samfélagssvið hefur flutt hluta af starfsemi sinni í Suðursalinn vegna tilfærslna sem gripið er til vegna lokana í Lundarskóla sem verið hafa í fréttum. Okkur er lofað Suðursalnum að nýja í síðasta lagi haustið 2022. Sömuleiðis munum við geta komist í aðstöðu hjá skólum bæjarins fyrir stærri mót, ef með þarf.

 

Þetta eru óvenjulegir tímar þar sem reglur vegna smitgátar munu setja ákveðið mark á skáklífið. Við munum þó reyna okkar besta til að halda skákgyðjunni við efnið, m.a. halda mót á Netinu ef önnur færi gefast ekki. Við hlökkum til hin nýja skákárs sem hefst nú í sumarlok 2020!

 

 

 

Skákhátíð á Akureyri 11-12. júlí

Í samvinnu Skákfélagsins og Miðbæjarskákar verður efnt til skákhátíðar í bænum nú um helgina og er hún hluti af Listasumri. Á laugardag kl. 14 hefst skákmót í Listasafninu. Þar verður telfld hraðskák, 11 umferðir. Þátttökugjald nemur aðgangseyri að safninu (en þó ókeypis fyrir börn). Verðlaunafé a.m.k. 65 þús kr, þar af 25 þús. í fyrsta sæti. Á sunnudag kl. 12 verður svo haldið 9 umferða mót í Skákheimilinu, þátttökugjald 500 kr. Margir skákmenn af höfuðborgarsvæðinu hafa boðað komu sína, þ.m.t. a.m.k. einn stórmeistari. Bæði mótin eru að sjálfsgöðu öllum opin meðan húsrúm leyfir. 

Sjá nánar á skak.is: https://skak.is/2020/07/10/hradskakmot-midbaejarskakar-og-skakfelags-akureyrar/