23 keppendur á Jóla(pakka)móti

Hið árlega jólamót barna var haldið föstudaginn 15. desember. Í þetta sinn var teflt í þremur aldursflokkum. Elstu börnin - framhaldsflokkurinn byrjuðu kl. 15. Sex mættu til leiks og tefldu allir-við-alla. Sigþór Árni Sigurgeirsson vann allar sínar skákir og hreppti því gullið. Í næstu sætum komu þeir Goði Svarfdal Héðinsson og Valur Darri Ásgrímsson með þrjá og hálfan vinning og hreppti Goði annað sætið eftir aukakeppni. Vegna ungs aldurs átti Valur Darri líka keppnisrétt í flokki fyrir börn f. 2012 og 2013, en það mót hófst rétt fyrir kl. 17 og var sameinað mótinu fyrir yngstu iðkendurna (f. 2014 og síðar). Þar voru keppendur alls átján talsins og heildarúrslit þessi (tefldar voru fimm umferðir): 

röð	nafn	vinn	stig
1	Valur Darri	5	14	2012-2013
2	Vjatsjeslav	4	13½	2012-2013
3	Skírnir	4	12½	yngri
4	Óliver	4	11	yngri
5	Baltasar Bragi	3	16	2012-2013
6	Gabríel Máni	3	15½	yngri
7	Dominik	3	15
8	Rósant	3	9
9	Þröstur	2½	12½
10	Dima	2½	12
11	Alexandru	2	13
12	Iraklis	2	12½
13	Kristófer	2	12½
14	Unnur Erna	2	10
15	Ísabella	1½	9½
16	Hrafnheiður	1	14
17	Steinunn	½	11
18	Unnur Birna	0	11½

Svo lesið sé rétt út úr töflunni, þá vann Valur Darri mótið með fullu húsi eftir úrslitaskák við Slava í lokaumferðinni. Þriðji í þessum aldursflokki varð svo Baltasar Bragi. Skírnir og Óliver urðu efstir yngri barnanna og Gabríel Máni varð þriðji.
Athygli vakti að nokkarar stúlkur úr Lundarskóla og Brekkuskóla tóku þátt í mótinu. Þær eru áhugasamar en hafa litla (sumar enga!) reynslu af því að tefla í móti af þessu tagi. Vonandi halda þær þó áfram af sama áhuga og hafa í huga hið fornkveðna, að æfingin skapar meistarann. 
Myndirnar sýna glaðhlakkalega keppendur hampa pökkunum. Myndina af stóra hópnum (yngri krökkunum) tók Anastasia Kramarenko.

Atskákmótið; Áskell hékk á titlinum.

Atskákmóti Akureyrar lauk nú í dag. Eins og sjá má á lokastöðunni var baráttan um titilinn jöfn og tvísyn.  Stigahæsti keppandinn átti titil að verja, en sú vörn gekk erfiðlega. Hann náði þó að hanga á jafntefli gegn báðum helstu keppinautum sínum og það nægði í þetta sinn. Gegn Smára þáði hann jafnteflisboð í lakari stöðu og gegn Sigurði sat hann uppi með tapað tafl eftir mistök í byrjun sem kostuðu mann. Sigurður gerði sjálfum sér þá þann óleik að flækja taflið að óþörfu og taka á sig veikingar. Áskell náði svo að skipta upp í endatafl þar sem ógnvekjandi framsækin peð hans næðu til jafnteflis. Eftir þetta var Smári með Pálmann í höndunum (afsakaðu PRP!) en tapaði illa fyrir Markúsi í næstsíðustu umferð og þá má segja að úrsltini væri ráðin. Í baráttunni um unglingameistaratitilinn hafði Sigþór betur gegn Markúsi Orra eftir sigur í innbyrðis skák þeirra í lokaumferðinni. E.t.v. hefur sá síðarnefndi verið aðeins móður eftir skákina við Smára.  Þessir tveir voru þeir einu sem hækkuðu á stigum á mótinu.
Efstu menn:
Áskell      6 af 7
Smári og Sigurður 5,5 
Sigþór      4
Öll úrslit og lokastöðuna er að finna á chess-results. 

Atskákmót Akureyrar hefst 30. nóvember, kl. 18.00.

Tefldar verða sjö umferðir á mótinu.
Umhugsunartími 15-10.
Mótið er reiknað til alþjóðlegra atskákstiga.
mótsgjald er kr. 1500 (en frítt fyrir börn sem greiða æfingagjald). 

Dagskrá:
1-3. umferð, fimmtudag 30. nóvember kl. 18.00.
4-7. umferð, sunnudag 3. desember kl. 13.00.

Keppt er um titilinn "Atskákmeistari Akureyrar", svo og um samhljóða titil í unglingaflokki (f. 2007 og síðar).

Núverandi atskákmeistari er Áskell Örn Kárason.