Lokaspretturinn á vormisseri.

Síðasta mótið á vormisserinu verður fimmtudaginn 25. maí, BSO-mótið. Tefld hraðskák að venju; mótið hefst kl. 20.
Þá eru síðustu barnaæfingar fyrir sumarfrí á fimmtudag (framhaldsflokkur).
Á föstudaginn sláum við upp úppskeruhátíð á æfingatíma í almennum flokki kl. 16.30. Þangað eru allir velkomnir. Eitthvað verða töflin dregin fram, svo er verðlaunaafhending og pizzuveisla.

Svæðismótið í skólaskák; Vjatsjeslav, Sigþór og Markús sigruðu.

Mótið var teflt í þremur aldursflokkum í samræmi við þá skiptingu sem ákveðin hefur verið af skáksambandinu í nýrri reglugerð. Teflt var laugardaginn 13. maí í Skákheimilinu hér á Akureyri. Alls mættu 32 keppendur til leiks, frá 10 skólum á svæðinu.

Yngsti flokkurinn hófst fyrstur, kl. 11.00. Árgangarnir 2013-2016, 15 keppendur mættir. Lokastaðan eftir 6 umferðir:

röð	nafn	f.ár	skóli	vinn	stig
1	Vjatsjeslav Kramarenko	2013	Lundar	6	19½
2	Skírnir Sigursveinn Hjaltason	2015	Þelamerkur	4½	21½
3	Bjarki Leó Vignisson	2013	Lundar	4	23½
4	Gabríel Máni Jónsson	2016	Oddeyrar	4	19½
5	Dimitro Hodun	2013	Oddeyrar	4	16
6	Iraklis Hrafn Theodoropoulos	2016	Oddeyrar	3½	18
7	Alexandru Rotaru	2016	Oddeyrar	3	23
8	Reynir Bjarnason	2016	Grenivíkur	3	18
9	Guðni Snær Daníelsson	2013	Síðu	3	16
10	Eyjólfur Árni Ingimarsson	2013	Brekku	3	18½
11	Kristbjörn Gísli Kristbjörnsson	2014	Glerár	2½	13½
12	Marínó Kristjánsson	2013	Glerár	2½	13½
13	Ísak Andri Jóhannsson	2014	Oddeyrar	2	14
14	Kristbjörn Magnússon	2013	Brekku	1½	18
15	Emil Rafn Bjarkason	2013	Brekku	1½	17½

Vjatsjeslav "Slava" Kramarenko, piltur sem flutti hingað frá Úkraínu með fjölskyldu sinni sl. haust, vann allar skákir sínar nokkuð örugglega og mun því verða fulltrúi okkar norðlendinga á Landsmótinu þann 10-11. júní nk. Allir stóðu keppendurnir sig með sóma, en greinilegt var að reynsla þeirra sem stundað hafa reglulegar æfingar í vetur skilaði sér. 
myndirnar sýna sigurvegarann með bikarinn og keppendahópinn að móti loknu.

 

 

 

 

 

 

 

Þá var komið að miðstiginu, börn í árgöngunum 2010-2012. Hér mættu 10 keppendur til leiks og tefldu einnig sex umferðir. Lokastaðan:

röð	nafn	f.ár	skóli	vinn
1	Sigþór Árni Sigurgeirsson	2011	Oddeyrar	5
2	Einar Ernir Eyþórsson	2011	Brekku	4½
	Jesper Tói Tómasson	2011	Brekku	4½
4	Valur Darri Ásgrímsson	2012	Brekku	4
5	Jón Orri Ívarsson	2011	Síðu	3
	Alexander Þorbergsson	2011	Brekku	3
	Kristófer Darri Birgisson	2012	Grenivík	3
8	Kristian Már Bernharðsson	2011	Síðu	2
9	Eiríkur Snær Guðmundsson	2011	Gilja	1
10	Sigurður Arnfjörð Barðason	2010	Grenivík	0

Hér mátti fyrirfram búast við sigri Sigþórs Árna, sem er þegar kominn með mikla keppnisreynslu og hefur æft af kappi undanfarin ár. Hann gerði óvænt jafntefli við Einar Erni í fyrstu umferð og síðan við Jesper Tóa í þeirri næstsíðustu. Þá stóð Einar með pálmann í höndunum í lokaumferðinni, en honum voru mislagðar hendur í skák sinni við bekkjarbróðurinn Tóa og tapaði slysalega. Þetta tækifæri lét Sigþór ekki ónotað og tryggði sér sigur í flokknum og sæti á landsmótinu í næsta mánuði. Framfarir þeirra Brekkuskólapilta eru þó augljósar.
Fyrri myndin er tekin í lokaumferðinni. Tói býður Einari jafntefli og réttir fram hendina brosandi. Einar hugsaði sig um dágóða stund en hafnaði svo boðinu. Á hinni myndinni má sjá verðlaunahafana, f.v. Sigþór, Tói og Einar.

 

 

Í elsta flokknum, árganganna 2007-2009 voru sjö keppendur of tefldu allir við alla. Þar urðu úrslitin þessi: 

röð	nafn	f.ár	skóli	1	2	3	4	5	6	7	vinn
1	Markús Orri Óskarsson	2009	Síðu	*	1	1	1	1	1	1	6
2	Kristján Ingi Smárason	2008	Borgarhóls	0	*	1	1	1	1	1	5
3	Tobias Matharel	2009	Brekku	0	0	*	1	1	1	1	4
4	Ýmir Logi Óðinsson	2007	Hrafnagils	0	0	0	*	1	1	1	3
5	Emil Andri Davíðsson	2009	Brekku	0	0	0	0	*	1	1	2
6	Jón Friðrik Ásgeirsson	2009	Valsár	0	0	0	0	0	*	1	1
7	Damian Jakub Kondracki	2008	Þelamerkur	0	0	0	0	0	0	*	0

Fyrirfram mátti búast við því að baráttan um sigurinn og landsmótssætið stæði milli þeirra Kristjáns Inga, Markúsar og Tobiasar. Allt gekk skv. bókinni í tveimur upphafsumferðunum og þá mættust Markús og Kristján í þeirri þriðju. Sá fyrrnefndi fékk fljótlega aðeins rýmri stöðu og virtist vera að knýja fram sigur í endatafli þegar tími Kristjáns rann út. Í næstu umferð mætti hann Tobiasi og eftir tvísýnar flækjur missti Markús tökin á stöðunni og virtist vera að tapa, en Tobias var orðinn tæpur á tíma og féll þegar hann var að leita að vænlegustu mátleiðinni. Markús átti fyrsta sætið tryggt þegar kom að lokaumferðinni; hann hafði þá lokið sínum skákum og unnið allar, en Kristján og Tobias börðust um annað sætið í innbyrðis skák.  Þar kunni sá fyrrnefndi að stýra betur tímanotkuninni og aftur féll Tobias á tíma. Í þetta sinn voru þeir enn í miðtafli og liðsafli jafn, en staða Tobiasar lakari. 
Á myndinni má sjá verðlaunahafana, f.v. Kristján Ingi, Markús og Tobias.

Öruggur sigur Rúnars á bikarmótinu.

Bikarmótið, sem hófst 4. maí, var til lykta leitt viku síðar, þann 11. Tíu skákmenn hófu þátttöku og hafði fækkað um fjóra eftir fyrri daginn - en keppandi er sleginn út eftir þrjú töp. Flestir þeirra sem eftir lifðu voru nokkuð laskaðir þegar sest var að tafli seinni daginn. Aðeins Rúnar Sigurpálsson var taplaus. Þrír gengu svo af skaptinu þegar í fyrstu umferð þann 11 og voru þá þrír eftir, Rúnar, Sigurður Eiríksson (með eitt tap) og Áskell Örn Kárason (með tvö). Áskell var svo úr leik eftir tap fyrir Rúnari og þá stóðu þeir Sigurður einir eftir. Rúnar vann fyrri skák þeirra og fór þá að halla á Sigurð. Hann mátti einnig játa sig sigraðan í næstu skák og þá voru úrslitin ljós: Rúnar Sigurpálsson vann mótið taplaus, með fullu húsi vinninga. Mjög sannrærandi sigur hjá Akureyrarmeistaranum.