Haustmótið hafið

Haustmót Skákfélagsins hófst í gær 17. september og lauk fyrstu umferð nú í dag með einni skák sem fresta þurfti um sólarhring. Útslit:

Sigurður-Markús 1-0
Fiachetto-afbrigði Grünfeldsvarnbar þar sem Markús fékk snemma þrönga stöðu og veikleika á c6 og a6 sem erfitt reyndist að verja. Í miðtaflinu fórnaði hann skiptamun fyrir peð í von um mótspil, en gat ekki staðist atlögu Sigurðar að kóngi sínum. Vel tefld skák hjá Sigurði, sem ætlar að fara vel af stað í þetta sinn.

Gabríel-Stefán 0-1
Gabríel tefldi c3-afbrigðið (Alapin) gegn Sikileyjarvörn Stefáns og fékk vænlega stöðu í byrjun. Hann tefldi mjög hvasst til sóknar og fórnaði peðum í tilraun sinni til að knekkja á svarta kónginum. Stefán kann flestum betur þá list að halda sér fast og stóðst atlöguna. Þegar sóknarmáttur hvítu stöðunnar dvínaði náði hann svo gagnsókn sem gerði út um taflið. Hressilega tefld skák hjá Gabríel en kannski tefld af fullmkilli bjartsýni.

Eymundur-Jökull Máni 1-0
Máni hefur hvílt sig á skákinni um hríð, en tekur nú til við taflið á nýjan leik. Hann gleymdi sér aðeins í byrjuninni í þessari skák; gleymdi að taka á d4 í Sikileyjarvörn og lenti þí fljótlega í afar kröppum dansi. Eymundur gaf engin grið, braust upp e-línuna og tókst að vefa mátnet um svarta kónginn. Nokkuð auðveldur sigur hjá Eymundi, sem ekki steig feilspor í sókninni.

Sigþór-Hreinn 0-1
Sigþór beitti að venju Grand-Prix árásinni gegn Sikileyjarvörn Hreins. Snemma skiptist upp á drottningum en riddarar Hreins voru ógnandi, hvor á sínum vængnum og Sigþóri gekk illa að virkja menn sína. Hreinnbraust svo upp d-línuna með hrók og svo fylgdu léttu mennirnir eftir. Kóngur Sigþórs hraktist út á g5 þar sem hann varð mát. 

Helgi Valur-Damian 1-0
Reyðfirðingurinn beitti Trompowski leikaðferðinni í byrjun gegn Þelamerkurpiltinum og fékk snemma nokkuð þægilega stöðu. Kóngur Damians átti lítið skjól á vinstri vængnum og kaus að flýja til hægri með 0-0-0. Þar öryggið þó lítið betra og hvíta drottning og svartreita biskup hvíts hjálpuðust að við að máta svarta þjóðhöfðingjann. 

Arnar Smári-Natan 1-0
Natan Koziarski er 14 ára piltur sem er nýfluttur til Íslands frá Póllandi og tefldi nú sína fyrstu kappskák á ævinni. Hann er nýlega farinn að æfa skák og sýnir strax umtalsverðar framfarir.  Hann á þó margt ólært, ekki síst í byjunum og sá ekki við göldrum andstæðingsins eftir 1.e4 e5 2.Rf3 Rc6 3.Bc4 Bc5 4.0-0 Rf6 5.d4?!?. Nú er svarta staðn vel teflandi eftir 5. - Bxd4, en óteflandi eftir 5.- exd4? 6.e5, sem var einmitt það sem gerðist og reyndist hvítum eftirleikurinn auðveldur. 

Goði Svarfdal-Valur Darri 0-1
Goði var líka að tefla hér sína fyrstu kappskák, en Valur Darri á a.m.k. eitt mót að baki þótt hann sé ungur að árum, en hann er yngstur keppenda á þessu móti, fæddur 2012. Þeir félagar tefldu skák sem lengi vel var gallalítil ogn án áberandi afleikja, enda var staðan lengi hnífjöfn og virtist ekkert nema jafntefli blasa við. Fífldjarft konungsferðalag Goða í jöfnu hróksendatafli varð honum þó að fjörtjóni að þessu sinni, kóngur hans lokaðist í mátneti og mátti játa sig sigraðan. Nokkuð óvæntur sigur yngsta keppandans, en fyllilega verðskuldaður. 

Önnur umferð mótsins verður tefld á miðvikudaginn og hefst kl. 18. Þá kemur Andri Freyr til leiks, en hann tók yfirsetu í fyrstu umferðinni (af tillitssemi við KA). Þá tefla saman:
Hreinn og Sigurður
Stefán og Helgi Valur
Valur Darri og Eymundur
Andri og Arnar Smári
Markús og Sigþór
Natan og Gabríel
Jökull Máni og Goði

 

Aðalfundur; fyrri stjórn endurkjörin. Símon vann startmótið.

Aðalfundur félagsins var haldinn 7. september sl. Engin stórtíðindi gerðust á fundinum, en dagskrá hans var hefðbundin skv. lögum félagsins. Fram kom að rekstur félagsins er í góðu jafnvægi og starfsemin á síðasta ári blómleg í hófi, en þó vaxandi kraftur í barna- og unglingastarfi. Húsnæðisvandi félagsins kom til umræðu, enda núverandi húsnæði farið að láta á sjá og þrengsli nokkur. Hefur leigusalinn - Akureyrarbær - frestað því að fara í endurbætur sem allir telja nokkuð brýnar. Mun ný stjórn reyna að koma því máli í betri farveg. 

Fráfarandi stjórn bauð sig öll fram til endurkjörs og var einróma kjörin. Formaður er því áfram Áskell Örn Kárason og aðrir í stjórn Rúnar Sigurpálsson, Smári Ólafsson, Andri Freyr Björgvinsson, Stefán Bergsson og Óskar Jensson. Stjórnin á eftir að skipta formlega með sér verkum, en því er spáð að lítt verði hróflað við verkaskiptingu fyrra árs.

Að loknum fundinum var sest að tafli og hið árlega Startmót háð. Því lauk svona:

		1	2	3	4	5	6	7	8	9
1	Símon Þórhallsson		0	1	1	1	1	1	1	1	7
2	Rúnar Sigurpálsson	1		½	0	1	1	1	1	1	6½
3	Áskell Örn Kárason	0	½		0	1	1	1	1	1	5½
4	Andri Freyr Björgvinsson	0	1	1		0	½	½	1	1	5
5	Sigurður Eiríksson	0	0	0	1		1	1	0	1	4
6	Smári Ólafsson	0	0	0	½	0		½	1	1	3
7	Markús Orri Óskarsson	0	0	0	½	0	½		1	1	3
8	Stefán G Jónsson	0	0	0	0	1	0	0		1	2
9	Karl Steingrímsson	0	0	0	0	0	0	0	0		0

 

Haustmótið hefst á sunnudaginn

Haustmót Skákfélagsins sunnudaginn 17. september kl. 13.00.

 

Tefldar verða sjö umferðir eftir svissneska kerfinu. Fjöldi umferða og fyrirkomulag getur þó komið til endurskoðunar þegar fjöldi þátttakenda liggur fyrir.  Möguleiki verður gefinn á yfirsetu, sem þá gefur ½ vinning.

Dagskrá:
1. umferð sunnudag 17. september kl. 13.00
2. umferð miðvikudag 20. september kl. 18.00
3. umferð fimmtudag 21. september kl. 18.00
4. umferð sunnudag 24. september kl. 13.00
5. umferð miðvikudag 27. september kl. 18.00
Hlé verður gert á mótinu vegna Evrópumóts skákfélaga og Íslandsmóts skákfélaga.
6. umferð miðvikudag 18. október kl. 18.00
7. umferð sunnudag 22. október kl. 13.00

Umhugsunartími 60-30.

Skráning er hjá formanni félagsins í [e-mail], með skilaboðum á Facebook síðu félagsins eða á skákstað, í síðasta lagi 15. mínútum fyrir upphaf fyrstu umferðar. 

Þátttökugjald á mótið er kr. 3.500 fyrir félagsmenn, kr. 5.000 fyrir aðra. Börn sem greiða æfingagjald eru undanþegin þátttökugjaldi.

Mótið reiknast til alþjóðlegra skákstiga.  Haustmótið er meistaramót Skákfélags Akureyrar.