Bikarmótið hafið!

Bikarmótið er útsláttarmót þar sem keppendur ganga af skaptinu eftir þrjú töp. 
Fimm umferðir voru tefldar í gær og fækkaði um fjóra í hópi þeirra tíu sem hófu mótið. 
Rúnar Sigurpálsson stendur best að vígi að þessum umferðum loknum, alveg taplaus. Sigurður Eiríksson er með eitt tap, en þau Andri Freyr Björgvinsson, Elsa María Kristínardóttir, Markús Orri Óskarsson og Áskell Örn Kárason hafa öll tapað tveimur skákum. 

Mótinu verður fram haldið eftir viku og hefst taflmennskan kl. 18. Að venju verður dregið um það hverjir eigast við í sjöttu umferð og gildir þá einu hvort keppendur hafi mæst áður eða ekki.

Áskell vann nauman sigur á mótaröðinni.

Mótaröðin á vormisseri samanstóð af átta hraðskákmótum þar sem þátttakendur reyndu hvað þeir gátu að safna sem flestum vinningum. 
Áttunda og síðasta nótið fór fram þann 27. apríl og þar vann Andri Freyr Björgvinnson nauman sigur, fékk 8 vinninga af 10 mögulegum. Áskell Örn Kárason varð hálfum vinningi á eftir Andra og Smári Ólafsson varð þriðji með sex vinninga, en Sigurður Eiríksson fjórði með fjóra. 
Þegar allt var gert upp var mjótt á munum milli þeirra sem náðu flestum vinningum í hús. Heildarúrslit (efstu menn):

	12.jan	19.jan	23.feb	2.mar	9.mar	23.mar	20.apr	27.apr	alls
Áskell	6	14		8,5	8	5		7,5	49
Sigurður	4	8	9	7,5	6,5	3	6,5	4	48,5
Stefán G		9	6	6	3,5	4	4,5	3	36
Smári	3	8,5		8	6,5			6	32
Hjörtur		8	4	4					16
Rúnar	5			10		8			23
Karl Egill			6,5	5	4			1,5	17
Helgi Valur	2	2	3,5	2	4,5	0			14

Bikarmótið hefst á morgun

Hið margumtalaða bikarmót Skákfélagsins hefst á morgun kl. 18.00 (ath. tímasetningu!). Að venju er öllum heimil þátttaka meðan húsrúm leyfir. Fyrirkomulagið er sem hér segir:

Hlutkesti ræður því hverjir tefla saman, ræður einnig litaskiptingu. Um er að ræða útsláttarkeppni; keppandi er sleginn út eftir þrjú töp (jafntefli= hálft tap). Engin takmörk á því hver oft einstakir keppendur mætast (hlutkestið ræður) eða hvernig litir skipast. Líklegt að mótið þurfi a.m.k. tvö kvöld til að klárast; næst verður teflt fimmtudaginn 11. maí. 

Umhugsunartími 10-3 (atskák)

Mótsgjald kr. 1000. Að venju eru yngri iðkendur sem greitt hafa æfingagjald undanþegnir mótsgjaldi.