Dagskrá næstu vikna

Eins og lesendum er sjálfsagt kunnugt stendur nú yfir Skákþing Akureyrar-Landsbankamótið. Það setur mestan svip á dagskrá næstu vikna.

Eins og ævinlega eru skákæfingar fyrir börn og unglinga á mánudögum og miðvikudögum auk þess sem æskan og ellin eigast við á þriðjudögum.

Í kvöld, fimmtudaginn 6. febrúar fer fram 7. umferð skákþingsins. Hefst umferðin kl. 18.00

Sunnudaginn 9. feb. fer 8. umferðin fram og hefst hún kl. 13.00

Mánudaginn 10. febrúar er afmælisdagur Skákfélags Akureyrar. Þá verður opið hús frá kl. 20 þar sem skákfélagsmenn og velunnarar eru boðnir velkomnir. Líklegt er að slegið verði upp hraðskákkeppni með einhverju sniði. Þann sama dag verða tefldar tvær skákir í skákþinginu og hefjast þær kl. 18.00.

Fimmtudaginn 13. febrúar verður opið hús kl. 20. Þá verður fluttur skákfyrirlestur. Tvö þemu koma til greina. Annað hvort verður fjallað um skiptamunsfórnir eða um að fleyga borðið í tvennt með peðaframrás. Þetta verður nánar auglýst þegar nær dregur.

Sunnudaginn 16. feb. fer lokaumferð Skákþings Akureyrar - Landsbankamótsins fram og hefst umferðin kl. 13.00  

Sunnudaginn 23. febrúar fer fram Hraðskákmót Akureyrar. Mótið hefst kl. 20.00

Síðan styttist í seinni hluta Íslandsmóts skákfélaga sem hefst 28. febrúar.

 

Súkkulaðiskák

Eitt af þeim skákmótum sem nú eru í gangi er Nóa Siríus mótið 2014 sem er gestamót GM Hellis og Breiðabilks. Þar eru 70 keppendur og þar af þrír úr Skákfélagi Akureyrar. Það eru þeir Halldór Brynjar Halldórsson, Stefán Bergsson og Mikael Jóhann Karlsson. Gengi okkar manna og annarra má sjá á slóðinni http://chess-results.com/tnr121026.aspx?lan=1&art=0&fed=ISL&turdet=YES&flag=30&wi=821

Halldór Brynjar er að tefla í sínu fyrsta einstaklingsmóti í háa herrans tíð og á í næstu umferð að kljást við félaga sinn Stefán Bergsson.

 

Skákþing Akureyrar - Landsbankamótið

Jón Kristinn heldur forystunni

Aðeins voru tefldar þrjár skákir af fimm í 6. umferð mótsins í dag. Hinum tveimur er frestað til þriðjudags.   Í toppbaráttunni dró þó til tíðinda. Yngsti keppandinn, Jón Kristinn Þorgeirsson, hélt efsta sætinu eftir sigur í vandaðri skák gegn Sigurði Eríkssyni - sem nú hefur tapað tveimur skákum í röð eftir fantagóða byrjun. Sigurður fórnaði peði heldur ógætilega í miðtaflinu. Jón þá peðið og skipti svo upp sem mest hann mátti. Endataflið var heldur þvælingslegt, en þó hillti ávallt undir sigur ungstirnisins, sem varð staðreynd eftir 61. leik. Jón er það með kominn með fimm og hálfan vinning eftir sex skákir. Þó er ekki langt í næsta mann; Haraldur meistari fyrra árs bítur líka grimmilega frá sér og lagði í þetta sinn Hjörleif að velli í magnaðri skák. Þar lék Öxndælingur af sér skiptamun snemma tafls, en staðan var ákaflega lokuð og seintelfd. Að mati Sveinbjörns skáskýranda (sjá mynd), fór Stýrimaður svo hægt í sakirnar að skömm var að. Hann vann þó að lokum, nokkuð sannfærandi að mati áhorfenda. Þriðja skákin var einnig sviptingasöm. Í rólegri stöðu fórnaði Andri tveimur mönnum fyrir hrók og vonir um góða framrás í endatafli. Tókst honum að þjarma nokkuð að Jakobi Silgfirðingi og komst í hróksendatafl peði yfir. Var Jakob í skuggalegu tímahraki að vanda. Hann kunni þó vel að verjast í þessari stöðu og sættust kapparnir á skiptan hluteftir 50 leiki. Hefur Andri þar með tekið glæsilega forystu í keppninni um jafntefliskónginn - með fimm í sex skákum. 

Ljóst er að þeir Jón Kristinn og Haraldur berjast öðrum fremur um titilinn þetta árið.  Eru þeir á góðri leið með að stinga aðra keppendur af, sá fyrrnefndi hefur aðeins leyft eitt jafntefli og hinn er með tvö. Sigurður er svo vinningi á eftir Haraldi. Aðrir hafa eitthvað færri vinninga en staðan óljós vegna frestaðra skáka. Annars má berja öll herlegheitin augum á Chess-Results að venju.