Sigurður einn efstur á Skákþinginu

Í kvöld fór fram 4. umferð Skákþings Akureyrar. Allar skákirnar voru frá 32 til 38 leikir. Fyrstir til að ljúka sinni skák voru Símon Þórhallsson og Tómas Veigar. Hafði Símon hvítt og upp kom kóngindversk vörn. Tómas fór í vafasamt drottningaflan og át eitrað peð í 17. leik. Við það lokaðist drottningin inni og varð hann að gefa hana fyrir hrók. Úrvinnslan var fumlaus hjá Símoni og gafst Tómas upp í 32. leik.

Í skák Andra og Sigurðar var þung undiralda. Andri lék ónákvæmt í seinni hluta miðtaflsins og það nýtti Sigurður sér vel. Peðastaða Andra var viðkvæm og þau tóku að falla hvert á fætur öðru uns Andri gafst upp í 38. leik.

Hjörleifur hafði hvítt gegn Jóni og tefldu þeir lokaða afbrigðið af Sikileyjavörn. Hjörleifur tefldi nokkuð passíft og nýtti Jón sér það vel. Hann skipti upp á virku mönnum hvíts og bætti stöðu sína jafnt og þétt. Að lokum reiddi hann hátt til höggs og hvíta staðan hrundi.  Hvítur gafst upp í 36. leik. Mjög vel teflt hjá Jóni.

Í skák Rúnars og Haraldar kom einnig upp lokaða afbrigði Sikileyjavarnar eða kóngindversk árás. Svartur náði frumkvæðinu og tefldi stíft til vinnings en Rúnar stóðst atlöguna vel og þeir sættust á skiptan hlut í 37. leik.

Skák Loga og Jakobs var í jafnvægi allan tímann. Þeir sömdu jafntefli í 37. leik þegar sýnt þótti að hvorugur kæmist neitt áfram.

Eftir úrslit dagsins leiðir Sigurður Eiríksson mótið með fullt hús stiga og hálfan vinning í forskot á Jón Kristinn og Harald.

Chess-results

 

 

Dagur eldri mannanna

Þriðja umferð Skákþings Akureyrar 2014 fór fram í dag. Úrslit urðu þau að Sigurður vann nýskipaðan skógarvörð á Norðurlandi Rúnar Ísleifsson eftir grófan afleik þess síðarnefnda. Þá þegar hafði hann reyndar slæma stöðu. Haraldur sigraði Loga nokkuð sannfærandi . Hjörleifur sigraði Símon einnig sannfærandi eftir ónákvæmni þess síðarnefnda. Mikil spenna var í skemmtilegri skák Jakobs og Tómasar. Svo fór að lokum að Jakob, sem hélt upp á afmæli sitt í dag með því að bjóða upp á köku og konfekt, lék af sér í tímahrakinu og tapaði. Síðastir til að ljúka sinni skák voru Jón Kristinn og Andri. Þar teygði Jón sig býsna langt til sigurs en Andri varðist af kappi. Í lokinn teygði Jón sig of langt í tímahraki og fékk tapað tafl. Þá bauð hann jafntefli sem Andri þáði.

Staða efstu manna eftir þrjár umferðir eru þeir Sigurður og Haraldur með fullt hús vinninga.

Chess-results

Skákþing Akureyrar - Landsbankamótið:

Þrír efstir með fullt hús

Annarri umferð skákþingsins lauk í gærkveldi á þennan hátt:

Andri-Hjörleifur            jafntefli

Símon-Jakob Sævar         1-0

Rúnar-Jón Kristinn           0-1

Logi-Sigurður                  0-1

Tómas-Haraldur              0-1

Þá er lokið með jafntefli skák þeirra Hjörleifs og Rúnars úr fyrstu umferð.

Þrír keppendur hafa unnið báðar skákir sínar á mótinu, þeir Sigurður Eiríksson, Haraldur Haraldsson og Jón Kristinn Þorgeirsson. Næstur þeim með 1,5 vinning kemur svo Símon Þórhallsson. 

Þriðja umferð mótsins fer fram á sunnudaginn og þá leiða saman hesta sína Jón Kristinn og Andri, Hjörleifur og Símon, Sigurður og Rúnar, Haraldur og Logi, Jakob og Tómas. Umferðin hefst kl. 13.

Chess-results