Gleðilegt nýtt ár!

Um leið og við óskum félagsmönnum og skákunnendum öllum farsældar á hinu nýbyrjaða ári viljum við minna á það sem framundan er á næstu mánuðum, sem einkennast munu af hátíðahöldum í tilefni af aldarafmæli félagsins.  Byrjum samt á fysta móti ársins, hinu hefðbundna nýjársmóti sem að venju er efnt til fyrsta dags nýs árs. Í þetta sinn mættu sex nýslegnir túskildingar til leiks og urðu lyktir þessar:

		1	2	3	4	5	6
1	Áskell Örn Kárason		1 ½	0 0	1 1	1 1	1 1	7½
2	Sigurður Eiríksson	0 ½		1 1	1 0	1 0	1 1	6½
3	Tómas Veigar Sigurðarson	1 1	0 0		0 0	1 1	1 1	6
4	Karl Steingrímsson	0 0	0 1	1 1		0 1	1 1	6
5	Hjörtur Steinbergsson	0 0	0 1	0 0	1 0		0 0	2
6	Kristinn P Magnússon	0 0	0 0	0 0	0 0	1 1		2

Stærstu viðburðir afmælisársins nú á vormisseri eru þessir:

13. janúar hefst Skákþing Akureyrar, hið 82. í röðinni. Sjá sérstaka auglýsingu hér á síðunni.

26. janúar (á skákdaginn) verður haldið stórt barnamót í sal Brekkuskóla.

9. febrúar, skemmtikvöld. Þá komum við saman í Skákheimilinu og teflum okkur til gamans og gerum eitthvað fleira skemmtilegt til að koma okkur í réttan gír fyrir afmælisveisluna  

10. febrúar, á afmælisdaginn sjálfan, verður veisla í Íþróttahöllinni. 

22-24. mars verður Skákþing Norðlendinga, hið 85. í röðinni haldið í Skákheimilinu.

25.maí-1. júní verður svo stóra afmælismótið haldið í Hofi, alþjóðlegt skákmót sem jafnframt verður Íslandsmót í skák. Þar munu okkar fremstu meistarar verða meðal keppenda, auk erlendra stórmeistara. 

Mótaáætlunina má annars finna hér neðst á síðunni - hún opnast þegar tvísmellt er á hana.

 

Skrár tengdar þessari bloggfærslu:

• janúar-mars

Hverfa eða ekki hverfa?

Suður og norður tókust á að venju í árlegri hverfakeppni akureyrskra skákmanna sem háð var þann 29. desember. Hverfaskipting var nokkuð óregluleg þetta árið - en í grunnin byggðist hún þó á því að norðlægum sjónarmiðum var att gegn suðrænum áherslum. Lína var dregin um Þingvallastræti, en þá voru hóparnir misstórir, svo flytja þurfti tvo af norrænu kyni um set og var til þess beitt tilviljunaraðferð sem viðurkennd er í vísinda- og fræðastarfi um allan heim. 

Fyrst var tefld atskák á sex borðum og þar reyndust norðanmenn mun farsælli í jöfnum og tvísýnum skákum. Þeirra sveit var skipuð þeim Jóni Kristni, Símoni, Tómasi Veigari, Karli Agli, Hirti Steinbergs og Grétari Eyþórssyni. Unnu þeir fimm skákir en töpuðu einni. Í tapliðinu voru þeir Áskell, Andri Freyr, Smári, Haki, Hjörleifur og Benedikt frá Bægisá.

Þá var tekin hraðskákrimma með bændaglímufyrirkomulagi og bættist nú Rúnar Sigurpálsson við í syðri hlutann, en Jakob Þór Kristjánsson í þann norðanverða. Var tefld tvöföld umferð með örlitlum forföllum þegar að seinni umferðinni kom. Í þessum rimmum kom styrkur suðrænu sambasveitarinnar í ljós sem vann fyrri umferðina 27-22 og þá síðari 21-15. Fóru þar fremstir þeir Rúnar og Áskell með 11 vinninga af 13, en fremstur í nettu norðansveitinni var Jón Kristinn með 9,5. 

Lauk þar með tafldagskrá ársins 2018. Þráðurinn verður tekinn upp að nýju strax á fyrsta degi næsta árs með nýjársmótinu alkunna. Það hefst kl. 14 á nýjársdag, enda margir enn syfjaðir um eittleytið. 

Jón Kristinn vann jólahraðskákmótið

Hátíð ljóss og friðar tilheyrir jólahraðskákmót Skákfélagsins og fór það fram í gærkveldi, 27. desember. Var bæði fjölmennt og góðmennt á mótinu og alls 15 keppendur settust að tafli og tefldu allir við alla. Eins og endranær skáru nokkrir keppendur sig fljótlega úr í baráttunni um sigurinn, sem að lokum féll í skaut Jóni Kristini Þorgeirssyni, sem varla gat komið á óvart. Mótið er reiknað til alþjóðlegra hraðskákstiga og má fletta því upp á Chess-results.

Mótstöfluna má sjá hér: