Brekkuskólastelpur gerðu góða ferð til Reykjavíkur

Íslandsmót gunnskólasveita stúlkna fór fram í Reykjavík laugardaginn 30. janúar. Sveit brekkuskólastúlkna sem er að æfa hjá Skákfélaginu skellti sér suður um morguninn og tók þátt í flokki 3-5. bekkjar ásamt 14 öðrum sveitum. Sveitin var í toppbaráttu allan tíman og hafnaði að lokum í fjórða sæti, sem verður að teljast mjög gott. Sveitina skipuðu Alexía Lív Heimisdóttir, Stella Kristín Júlíusdóttir og Ingibjörg Urður Ögludóttir Dowling. Liðstjóri var Elsa María Kristínardóttir. Lokastöðuna má sjá hér.

Sannarlega gott framtak og vonandi ekki í síðasta skipti sem stúlkasveit héðan að norðan lætur til sín taka á þessum vettvangi.

Mynd af sveitinni ásamt liðstjóranum var sótt á skak.is. Mynd af stúlkunum að tafli var tekin af Elsu Maríu.

Skákþing Akureyrar hófst í dag

Keppendur eru 18 og tefla í tveimur flokkum. Úrslit í A-flokki:

Sigurður Eiríksson-Rúnar Sigurpálsson              0-1

Karl Egill Steingrímsson-Hjörleifur Halldórsson    1/2

Andri Freyr Björgvinsson-Stefán G. Jónsson         1-0

Gunnlaugur Þorgeirsson-Eymundur Eymundsson         frestað.

Sigurvegari í A-flokki verður Skákmeistari Akureyrar árið 2021. Fráfarandi meistari er Andri Freyr Björgvinsson, en stigahæsti keppandinn að þessu sinni er Rúnar Sigurpálsson, Akureyrarmeistari árið 2019.

 

Keppendur í B-flokki eru allir á grunnskólaaldri og tefla um tvo meistaratitla,  í unglingaflokki (f. 2005-2009) og í barnaflokki (f. 2010 og síðar). 

Úrslit fyrstu umferðar í B-flokki (fæðingarár í sviga)

Tobias Matharel(2009)-Brimir Skírnisson(2009)                  1-0

Markús Orri Óskarsson(2009)-Mikael Máni Jónsson(2007)          1-0

Gunnar Logi Guðrúnarson(2009)-Sigþór Árni Sigurgeirsson(2011)  0-1

Emil Andri Davíðsson(2009)-Alexía Lív Hilmisdóttir(2011)       1-0

Jökull Máni Kárason(2010)-Jóhann Valur Björnsson(2008)         1-0

 

Í báðum flokkum tefla allir-við-alla, sjö umferðir í A-flokki og níu í B-flokki. 

Sjá má úrslit og röðun í öllum umferðum á Chess-results.com:

A-flokkur  

B-flokkur

Önnur umferð verður tefld fimmtudaginn 4. febrúar og hefst kl. 18.00

 

Skákþing Akureyrar að hefjast

Skákþing Akureyrar, hið 84. í röðinni, hefst sunnudaginn 31. janúar kl. 13.00, Teflt verður í Skákheimilinu í Íþróttahöllinni við Skólastíg.

 

Fyrirkomulag mótsins mun að nokkru leyti mótast af fjölda þátttakenda.  Fyrirhugað er að teflt verði í tveimur riðlum A- og B-riðil og verði þátttakendum raðað í riðla eftir skákstigum. Sigurvegari B-riðils á á síðasta skákþingi á þó sjálfkrafa rétt til þátttöku í A-riðli, þar sem teflt verður um sæmdarheitið „Skákmeistari Akureyrar 2021“.  

Þá verður telft um tvo meistaratitla í yngri flokkum, þ.e. „Skákmeistari Akureyrar í unglingaflokki“ (börn fædd 2005-2009) og „Skákmeistari Akureyrar í barnaflokki“ (börn fædd 2010 og síðar). Um þessa titla verður teflt í B-riðli.

Í A-riðli er gert ráð fyrir átta keppendum og munu þeir tefla innbyrðis allir-við-alla, sjö umferðir. Í B-riðli verður gripið til röðunar skv. svissnesku kerfi ef fjöldi keppenda leyfir ekki að þar tefli allir-við-alla.

Umhugsunartími í A-riðli verður 90 mínútur á skákina, auk þess sem 30 sekúndur bætast við tímann fyrir hvern leik (90+30).   Í B-riðli verður umhugsunartíminn 60-30. 

Þátttökugjald er kr. 3.000 fyrir skuldlausa félagsmenn, kr. 4.000 fyrir aðra. Þátttaka er ókeypis fyrir þá unglinga sem greitt hafa æfingagjald. 

Mótið verður reiknað til alþjóðlegra skákstiga.

Skráning er í netfangið [e-mail] eða á facebook síðu Skákfélags Akureyrar. Einnig er hægt að skrá sig á skákstað eigi síðar en 15 mínútum fyrir upphaf fyrstu umferðar.

Dagskrá verður sem hér segir:

1. umferð sunnudaginn 31. janúar    kl. 13.00     
2. umferð fimmtudaginn 4. febrúar   kl. 18.00
3. umferð sunnudaginn 7. febrúar    kl. 13.00
4. umferð fimmtudaginn 11. febrúar  kl. 18.00
5. umferð sunnudaginn 14. febrúar   kl. 13.00
6. umferð fimmtudaginn 18. febrúar  kl. 18.00
7. umferð sunnudaginn 21. febrúar   kl. 13.00

Þegar fjöldi keppenda liggur fyrir getur mótsstjóri gert minniháttar breytingar á dagskrá og fyrirkomulagi til að auðvelda framkvæmd mótsins.

Þátttaka í mótinu er öllum heimil en Skákmeistari Akureyrar getur aðeins sá orðið sem er búsettur á Akureyri og/eða er fullgildur félagi í Skákfélagi Akureyrar. 

Núverandi Skákmeistari Akureyrar er Andri Freyr Björgvinsson.