Evrópumót skákfélaga; Tyrkirnir of sterkir

Skákfélagsmenn eru stórhuga og ákváðu í ár að senda sveit til keppni á Evrópumóti skákfélaga sem hófst í dag í Durrës í Albaníu. Hér eru mættir til að tefla (í borðaröð) Rúnar Sigurpálsson, Halldór Brynjar Halldórsson, Stefán Bergsson, Arnar Þorsteinsson, Andri Freyr Börgvinsson, Mikael Jóhann Karlsson, Áskell Örn Kárason og Haraldur Haraldsson, átta manna þétt sveit. Tefldar verða sjö umferðir og eru viðureignirnar á sex borðum, þannig að tveir skákmenn hvíla í hverri umferð. Hér eru margir sótraftar á sjó dregnir (ef svo má segja) og úrval bestu skákmeistara heimsins mætt til leiks hér við Adríahafsstrendur, þ.m.t. stigahæsti skákmaður sólkerfisins, Magnus Carlsen. Sveitirnar eru 82 og litla Akureyri ekki í hópi þeirra sigustranglegustu. Í fyrstu umferð beið okkar ein af sterkustu sveitum mótsins; eiginlega tyrkneska lendsliðið eins og það lagði sig. Stigamunur hartnær 400 á hverju borði. Sigur því ekki líklegur í viðureigninni, en eins og ávallt markmiðið að gera sitt besta. Þegar leið á viðureignina féllu vígi hvert af öðru, uns fyrstaborðsmaðurinn stóð einn eftir. Hann hafði byrjað taflið með hinum óvenjulega leik 1.a3 og hélt í framhaldinu vel í við andstæðing sinn. Jafntefli virtist harla líklegt um tíma en aðeins með hæarnæakvæmri taflmennsku. Í lokin gekk það ekki eftir og hreint 0-6 varð niðurstaðan, eins og reyndar flestir gátu búist við í upphafi. Þess má geta að níu -öðrum viðureignum í fyrstu umferð lyktaði á sama hátt og fjölmörgum til viðbótar 5,5-0,5. Þannig verða sauðirnir skildir frá höfrunum. 

Heldur verra að tapa svona stórt, en viðbúið eins og þegar hefur komið fram. Engin tár féllu eftir þessa viðureign, heldur sátu menn kyrrlátir í hlýju myrkri (28°C) við sundlaugarbakka og sleiktu sárin, (eiginlega bara smáskeinur)og hugðu að næstu viðureign. Þá munum við mæta skákfélagi frá Prilep í Norður-Makedóníu og virðast þeir á pappírnum svipaðir okkur að styrkleika. Því er allt útlit fyrir jafna og spennandi viðureign á morgun og ekki ómögulegt að Akureyringar nái í stig.

Við látum fljóta með þrjár myndir sem sýna umhverfið hér við skákstað. Hér erum við á sandölum og ermalausum bol, allt hlýtt og notalegt og aðstæður að öllu leyti hinar bestu.