Spennan magnast fyrir lokaumferð Norðurorkumótsins

Á sunnudaginn fer fram lokaumferð í vel mönnuðu og skemmtilegu Norðurorkumóti, Skákþingi Akureyrar 2015. Því er rétt að fara aðeins yfir gang mála í toppbaráttunni.

Hinn ungi Jón Kristinn Þorgeirsson (2059) leiðir mótið eftir 6 umferðir. Hann hefur aðeins leyft eitt jafntefli og unnið hinar fimm skákirnar. Jafnteflið var við stigahæsta mann mótsins, formanninn Áskel Örn Kárason. Athygli hefur vakið að Jokkó hefur iðulega fengið heldur verra og stundum mikið verra út úr byrjununum. Styrkleiki hans liggur e.t.v. í mikilli baráttu og hörku sem og útsjónarsemi. Hann hefur teflt miðtöflin af miklu öryggi og metur stöðurnar rétt. Fyrir frammistöðu sína hefur hann grætt 72 skákstig og árangur hans samsvarar 2347 skákstigum. Í lokaumferðinni stýrir hann svörtu mönnunum gegn Smára.

Stigahæsti keppandi mótsins, Áskell Örn Kárason (2271) er í öðru sæti. Hann hefur hálfum vinningi minna en Jón Kristinn. Hann er enn taplaus í mótinu en hefur gert tvö jafntefli. Þau voru við hina ungu Jón og Símon. Aðrar skákir vann hann á sannfærandi hátt. Hann hefur aldrei lent í verulegri taphættu nema gegn Símoni. Að auki verður að telja að hann hafi haft unna stöðu um tíma gegn Jóni. Frammistaða formannsins jafngildir 2209 skákstigum og hefur hann tapað 3 skákstigum. Í lokaumferðinni mætir hann Ólafi og hefur hvítt.

Ólafur Kristjánsson (2118) er í þriðja sæti mótsins með 4,5 vinninga. Hann á enn möguleika á að vinna mótið ef hann vinnur síðustu skák sína og Jón tapar. Þetta er því allt innan fjölskyldunnar. Ólafur hefur teflt vel og skemmtilega í mótinu en orðið fyrir því að leika af sér. Það hefur kostað hann vinning á móti Jóni og hálfan vinning á móti Símoni. Þessir afleikir hafa kostað hann 9 skákstig. Eins og áður segir fær hann Áskel í síðustu umferðinni og stýrir svörtu mönnunum.

Símon Þórhallsson (1961), Haraldur Haraldsson (1957) og Smári Ólafsson (1972) eru jafnir í 4. til 6. sæti með 4 vinninga.

Símon hefur teflt gríðarlega vel í mótinu og fengið ljómandi góðar stöður. Óhætt er að segja að í öllum skákum mótsins hafi hann um tíma haft umtalsvert betri stöður. Stöðumat hans er gott og byrjunaþekking til fyrirmyndar. Stærsti gallinn hjá honum er að hann hefur misst af taktískum leikjum sem hefðu getað tryggt honum unnið tafl. Á móti Ólafi missti hann af hróksfórn í 29. leik (29. Hxh6) og á móti Áskeli missti hann af 28…Dd1. Aftur á móti lét hann ekki fara fram hjá sér skemmtilega fórn sem tryggði honum jafntefli á móti Ólafi. Framtíðin er björt hjá þessum unga skákmanni sem hefur grætt 28 skákstig á mótinu. Í lokaumferðinni mætir hann Haraldi og hefur svart.

Haraldur hefur tapað fyrir tveimur efstu mönnum mótsins en unnið aðrar viðureignir. Árangur hans er nokkuð á pari við skákstig hans. Hann var í 6. sæti styrkleikalistans og er með tæplega 1 skákstig í gróða. Lokaskákin skiptir hann því miklu máli. Þar hefur hann hvítt gegn Símoni.

Smári er, líkt og Haraldur, nánast á pari við styrkleikalistann fyrir mót. Hann fær verðugt verkefni í lokaumferðinni þegar hann mætir Jóni Kristni og stýrir hvítu mönnunum. Fyrir utan skákina í fyrstu umferð, þar sem hann lék illa af sér, hefur hann teflt vel í mótinu.

Ofangreindir sex skákmenn voru einnig í sex efstu sætum styrkleikalistans fyrir mótið og tefla innbyrðis í lokaumferðinni. Í 7. sæti mótsins, með 3,5 vinninga, er Ulker Gasanova (1616). Hún var í 14. sæti styrkleikalistans og má því segja að hún hafi komið manna og kvenna mest á óvart í mótinu. Hún er með 41 skákstig í gróða og hefur aðeins tapað einni skák. Skák hennar í 6. umferð gegn Sigurði er með þeim fjörugri í mótinu. Það er virkilega ánægjulegt að Ulker skuli hafa snúið aftur að skákborðinu.