Íslandsmót yngri flokka á Akureyri

Óliver Aron unglingameistari, Jón Kristinn og Vignir unnu sína flokka.

Nú var að ljúka Íslandsmóti yngri flokka hér á Akureyri. Keppnin var bæði spennandi og jöfn og uppskera okkar manna vel viðunandi. Á Unglingameistaramóti Íslands (20 ára og yngri) reyndist stigahæsti keppandinn, Óliver Aron Jóhannsson, drýgstur á lokasprettinum. Keppendur voru átts talsins og tefldu innbyrðis, allir við alla. Óliver vann í morgun skákina við helsta keppinaut sinn, Örn Leó Jóhannesson; tók þá forystuna og lét hana ekki af hendi síðan. Hann fékk 6 vinninga úr 7 skákum; Örn Leó varð annar og Jóhanna Björg Jóhannesdóttir þriðja. Okkar menn, þeir Andri Freyr og Logi Rúnar, höfnuðu í neðri helmingnum, en árangur þeirra beggja var þó viðunandi. 

Teflt var í einum flokki um Íslandsmeistaratitil 15 ára og yngri og 13 ára og yngri. Þar tók hinn bráðefnilegi Vignir Vatnar Stefánsson (f. 2003) úr TR forystuna snemma móts og virtist ætla að vinna báða titlana sem í boði voru. Hann var efstur fyrir síðustu umferð en mátti þá lúta í lægra haldi fyrir SA-manninum Óliver Ísak Ólasyni, en um 700 stig skilja þá félaga að á stigalistanum. Þetta voru tvímælalaust óvæntustu úrslit mótsins og skiptu sköpum í toppbaráttunni. Við tapið hrökk Vignir niður í annað sætið í 15 ára flokknum en sigur hans í 13 ára flokknum var ekki í hættu. Hinsvegar naut félagi Ólivers, Jón Kristinn Þorgeirsson góðs af þessum úrslitum og skaust upp fyrir Vigni Vatnar.  Efstir eftir þessar sviptingar voru því þessir (29 keppendur tefldu 9 umferðir):

15 ára og yngri:

Jón Kristinn Þorgeirsson, SA      8

Vignir Vatnar Stefánsson, TR     7,5

Símon Þórhallsson, SA               7

13 ára og yngri:

Vignir Vatnar Stefánsson, TR    7,5

Björn Hólm Birkisson, TR           6

Óliver Ísak Ólason, SA              6

 

Öll úrslit og lokastaða á Chess-results, fyrir Unglingameistaramótið hér og hina flokkana hér.