Jón Kristinn efstur eftir fyrri hluta atskákmótsins

Þrjár fyrstu umferðir Atskákmóts Akureyrar voru tefldar í gær. Eins og oft áður var Jón Kristinn Þorgeirsson þar á sigurbraut og vann allar sínar skákir. Næstir honum með tvo vinninga koma þeir Andri Freyr, Áskell, Smári og Tómas Veigar. Kristjan Hallberg hefur einn og lestina reka þeir Haraldur og Gabríel Freyr sem enn eiga eftir að komast á blað.  Mótinu verður fram haldið á sunnudaginn kl. 13 þegar fjórar síðustu umferðirnar verða tefldar.

Atskákmót Akureyrar

Hið árlega Atskákmót Akureyrar hefst á morgun, fimmtudaginn 30.október kl. 18.00 og verður fram haldið sunnudaginn 2. nóvember kl. 13.00.

Tefldar verða sjö umferðir eftir svissnesku kerfi og er umhugsunartími keppanda 25 mínútur á skák. Þrjár umferðir verða tefldar á fimmtudag og má búast við að þriðju umferð ljúki kl. 21.00. Á sunnudag verða svo tefldar fjórar umferðir og lýkur mótinu um kl. 17.00.

Þátttökugjald er kr. 1000, en að vanda ókeypis fyrir börn og unglinga sem greiða æfingagjöld.  Skráning er á staðnum frá kl. 17.30 og lýkur u.þ.b. fimm mínútum fyrir upphaf fyrstu umferðar.

Símon sýnir klærnar

Símon Þórhallsson, Skákfélagi Akureyrar, situr nú að tefli í EM ungmenna sem fram fer í Batumi í Georgíu eins og lesendur eflaust vita. Óhætt er að segja að kappinn standi sig vel. Þegar þetta er ritað eru úrslit kunn úr 7 umferðum. Í öllum umferðum hefur Símon teflt við andstæðinga sem eru töluvert stigahærri en hann sjálfur. Samkvæmt styrkleikaröðun mótsins var hann í 77. sæti með 1796 alþjóðleg skáksit. Nú vermir hann 49. sæti í sínum flokki með 50% vinningshlutfall. Árangur hans samsvarar 2113 skákstigum og ef mótinu lyki núna fengi hann 101 stig! Óhætt er að segja að það er magnaður árangur.

Hinir íslensku keppendurnir eru:

Dagur Ragnarsson í 59. sæti í sínum flokki með 2 vinninga

Oliver Jóhannesson í 32. sæti í sínum flokki með 3,5 vinninga

Gauti Páll Jónsson, sérlegur vinur SA, sem er í 74. sæti með 2,5 vinninga og 44,8 stig í plús.

 

Skákfélagið óskar öllum keppendum góðs gengis í lokaátökunum.