Frábær áragnur hjá Símoni

Í dag fór fram Atskákmót Skákklúbbs Icelandair - Íslandsmótið í atskák 2014. Samkvæmt venju var það félagi okkar, Óskar Long, sem bar hitann og þungann af mótinu.

Alls voru 87 skákmenn skráðir til leiks. Þar af voru 6 keppendur frá SA. Það voru Ólafur Kristjánsson, Stefán Bergsson, Mikael Jóhann Karlsson, Símon Þórhallsson, Haraldur Haraldsson og áðurnefndur Óskar Long. Allir stóðu þeir sig vel en óhætt er að segja að árangur hins unga Símonar hafi staðið upp úr. Hann var skráður í 33. sæti styrkleikalistans en gerði sér lítið fyrir og hafnaði í 4. sæti með sjö vinninga af níu mögulegum. Í síðustu tveimur umferðunum lagði hann FIDE-meistarana Sigurð Daða Sigfússon og Guðmund Gíslason sem báðir hafa yfir 2300 alþjóðleg skákstig.

Ólafur Kristjánsson er enn í framför. Hann var skráður í 17. sæti styrkleikalistans og endaði í 12. sæti með 6 vinninga. Hann fékk sérstök verðlaun í mótslok fyrir að verða efstur öldunga.

Stefán Bergsson var skráður í 19. sæti styrkleikalistans og endaði 15. með 6 vinninga eins og Ólafur.

Mikael Jóhann Karlsson var einu sæti neðar á styrkleikalistanum og fékk einum vinningi minna sem dugði honum aðeins í 31. sæti. Hann lagði meðal annars Pál Agnar Þórarinsson af velli en Páll er með 2220 skákstig.

Haraldur Haraldsson hefur verið duglegur að tefla að undanförnu og skilaði það sér í þessu móti. Hann var í 35. sæti styrkleikalistans en endaði í 28. sæti með 5 vinninga eins og Mikki.

Óskar Long stóð sig mjög vel í mótinu. Hann var skráður í 66. sæti styrkleikalistans og endaði í 43. sæti með 4,5 vinninga. Hann tefldi aðeins eina skák við skákmann sem var neðar en hann á styrkleikalistanum.

Skákfélagið óskar öllum þessum frábæru fulltrúum til hamingju með árangurinn.

Íslandsmeistari í Atskák varð stórmeistarinn Héðinn Steingrímsson með 8,5 vinninga.

Skákþing Akureyrar hefst 18. janúar

Skákþing Akureyrar - það 77. í röðinni hefst sunnudaginn 18. janúar. Fyrirhugað er að tefla sjö umferðir á mótinu - sex sunnudaga í röð og og verður lokaumferðin þann 22. febrúar. Auk þess verður teflt einn fimmtudag - 19. febrúar.

Fyrirhugað er að mótið verði riðlaskipt, 8 stigahæstu í a-riðli, aðrir keppendur í b-riðli.

Auglýsing um mótið hangir upp í Skákheimilinu. Skráning er í netfangið [e-mail].

 

Gleðileg jól

Um leið og Skákfélagið óskar öllum skákmönnum og velunnurum skáklistar gleðilegrar H-tíðar er rétt að minna á dagskrána yfir jólin

Sunnudaginn 28. des kl. 13     jólahraðskákmótið!

Þriðjudaginn 30. des kl. 20    hverfakeppnin

Fimmtudaginn 1. jan kl. 14     nýjársmótið