Skyrgámar unnu hverfakeppnina

Hin árlega hverfakeppni var háð í gær, 29. desember. Í stað þess að skipa í lið eftir búsetu, eins og áður hefur verið gert, var nú brugðið á nýtt ráð og liðin valin af hverfakeppniseinvaldi, sem er nýtt embætti hjá félaginu. Fengu liðin nafn sem minna átti á uppáhaldsfæðu liðsmanna. Skiptingin var þessi:

Skyrgámar voru þeir Andri Freyr Björgvinsson, Mikael Jóhann Karlsson, Sigurður Eiríksson, Karl Steingrímsson, Stefán G Jónsson og Þóroddur Þóroddsson.

Í sveit Ketkróka völdust þeir Rúnar Sigurpálsson, Áskell Örn Kárason, Smári Ólafsson, Stefán Arnalds, Sigþóri Árni Sigurgeirsson og Damian Kondracki.

Tefld var bændaglíma, tvöföld umferð, alls tólf skákir á mann. Gámarnir tóku forystu í byrjun, slökuðu síðan svolítið á, en unnu síðustu umferðina sannfærandi og keppnina í heild 39-33. 

Bestum árangri Skyrgáma náðu þeir Andri Freyr (11 vinningar) og Mikael Jóhann (10 v.). Aflasælastir Ketkróka voru Rúnar með 9 og Áskell með 8 vinninga. 

Næsta stórmót á vegum félagsins verður nýjársmótið sem hefst kl. 14.00 - á nýjársdag að sjálfsögðu.

Símon jólasveinn SA

Hið árlega jólahraðskákmót Skákfélagsins var haldið í gær, 27. desember við glæsilegar aðstæður á því fallega veitingahúsi LYST í Lystigarðinum. Alls mættu 18 keppendur til leiks og fór mótið allt fram í sönnum jólaanda þótt hart væri barist. Kynslóðirnar létu sig ekki heldur vanta og skildu rúm sjötíu ár að elsta og yngsta keppandann. 

Eins og á öðrum hraðskákmótum nú í haust fékk Hörgsveitungurinn Símon Þórhallsson flesta vinninga, eða átta í níu skákum.  Jafnt var í toppbaráttunni lengi framanaf og það var ekki fyrr en í lokaumferðunum sem sigur Símonar fór að blasa við. Hann bætir nú þessum titli við sigur í startmótinu og hausthraðskákmótinu. Heildarúrslit má sjá hér:

1	FM	Thorhallsson Simon	2137	8
2	FM	Sigurpalsson Runar	2210	7
3		Karlsson Mikael Johann	2024	6
4	IM	Karason Askell O	2015	5½
5		Olafsson Smari	1847	5½
6		Bjorgvinsson Andri Freyr	2113	5½
7	CM	Halldorsson Halldor	2176	5
8		Oskarsson Markus Orri	1399	5
9		Kristinardottir Elsa Maria	1921	4½
10		Eiriksson Sigurdur	1809	4½
11		Hedinsson Godi	1413	4½
12		Arnalds Stefan	1786	4
13		Vilhjalmsson Hilmir	1207	4
14		Jonsson Stefan G	1677	4
15		Theodoropoulos Dimitri	0	3½
16		Steingrimsson Karl Egill	1677	3½
17		Asgrimsson Valur Darri	1329	1
18		Theodoropoulos Iraklis Hrafn	0	0

Mótahald á næstunni.

Nú fer jólahátíðin í hönd og nýtt ár handan við hornið. Mót og æfingar á vegum félagsins draga dám af þessu. Síðasta æfingin í framhaldsflokki verður nú 18. desember og eftir það hlé á æfingum framyfir áramót. Þær hefjast svo að nýju þann 5. janúar, bæði í almennum og framhaldsflokki. Mót á næstunni verða þessi:

27. desember kl. 18.00 Jólahraðskákmót, haldið á LYST!
29. desember kl. 18.00 Hverfakeppnin víðfræga.
1. janúar kl. 14.00    Nýjársmótið nafntogaða.
11. janúar kl. 20.00   Opið hús/hraðskák
14. janúar kl. 13.00   Skákþing Akureyrar, 1. umferð.
Áformað er að Skákþingið verði sjö umferðir og teflt á sunnudögum kl. 13 og fimmtudögum kl. 18. Mótinu ætti því að ljúka þann 4. febrúar. Ákveðnir fyrirvarar eru þó á þessari dagskrá og ekki hægt að ákveða hana endanlega fyrr en fjöldi keppenda liggur fyrir.