Haustmótið; Andri Freyr efstur fyrir síðustu umferð

Sjöttu og næstsíðustu umferð haustmótsins lauk í gærkveldi. Úrslit urðu þessi:
Andri-Gabríel      1-0
Eymundur-Sigurður  1-0
Markús-Arnar Smári 1-0
Hreinn-Valur Darri 1-0
Sigþór-Natan       1-0
Stefán-Goði        1/2
Jökull Máni-Damian 1-0

Af þessum úrslitum vekja mesta athygli annarsvegar sigur Markúsar gegn Arnari Smára, svo og jafntefli Goða og Stefáns. Markús er að hækka ört á stigum þessa dagana og sæyndi hvað í honum bjó með öruggum sigri. Goði er enn stigalaus en jafntefli við reyndan skákmann með yfir 1700 stig hlýtur að teljast mjög góður árangur. Reyndar virtist Goði hafa vinninginn í hendi sér rétt áður en skákinni lauk, en þegar Stefán fékk færi til að fórna manni fyrir samstlæð frípeð Goða var vinningurinn ekki lengur fyrir hendi. Önnur úrslit voru að mestu eftir bókinni, ef undan er skilinn sigur Eymundar, sem hefur átt mjög gott mót.

Andri er nú með pálmann í höndunum fyrir lokaumferðina. Hann er með fimm vinninga, hálfum meira en Eymundur, sem ekki teflir síðustu skákina og fær hálfan vinning fyrir yfirsetu.  Allmargir keppendur eru jafnir í þriðja sæti með fjóra vinninga, þeir Markús Orri, Arnar Smári, Sigurður og Hreinn. 

Öll úrslit og stöðuna má að venju nálgast á chess-results. Röðun í lokaumferðinni liggur enn ekki fyrir en verður birt á morgun.

Íslandsmót skákfélaga - stuttur pistill

Í Rimaskóla í Reykjavík fór um helgina fram Íslandsmót skákfélaga 2023-24, fyrri hluti. Þetta mót er hið stærsta og fjölmennasta sem haldið er á landinu á hverju ári. Fjöldi félaga sendir lið til keppni á mótinu og má ætla að u.þ.b. 300 manns taki þátt í mótinu á hverju ári. Teflt er í fimm deildum, úrvalsdeild og svo deildum 1-4.  Keppnin er tvískipt; fyrri hlutinn fer fram að hausti og síðari hlutinn síðla vetrar, yfirleitt í mars.

Skákfélagið sendi að þessu sinni þrjár sveitir til keppni. Ætlunin var að senda fjögur lið, en vegna forfalla þurfti að fækka þeim í þrjú. Skemmt er frá því að segja að allar sveitirnar náðu góðum árangri og berjast um sigur, hver í sinni deild.

A-sveit félagsins teflir í 1. deild (þeirri næstefstu). Sveitin vann þrjár viðureignir af fjórum og gerði jafnt í einni; er í öðru sæti á hælunum af forystusveitinni frá Breiðabliki. Líklegt er að viðureign þessara sveita í síðari hlutanum í vor skeri úr um það hvor sveitin fær að tefla í úrvalsdeild á næsta tímabili.

B-sveitin teflir í annarri deild og hefur tekið forystuna þar, unnið þrjár viðureignir og gert jafnt í einni. Flestir sigrar mjög öruggir og bar hæst sigur á b-sveit KR-inga í fjórðru umferðinni. Hér eru góðir möguleikar á sigri, eða a.m.k. öðru af tveimur efstu sætunum og þá stökk upp í fyrstu deild að ári. B-sveit SA hefur löngum verið mjög öflug og vann meira að segja A-sveitina einusinni í deildakeppninni!

C-sveitin var að mestu skipuð ungum iðkendum, en þó tefldi nestor Sigurður Eiríksson tvisvar á fyrsta borði með góðum árangri. Sveitin vann þrjár fyrstu viðureignir sínar en laut í lægra haldi fyrir langlangsterkustu sveit deildarinna, Dímoni, í fjórðu umferð.  Náði þó að vinna eina skák af Dímonunum (Markús Orri!), sem annars unnu allar aðrar skákir sínar á mótinu.  

Í þeim deildum sem hér ræðir um eru sveitir skipaðar sex mönnum í hverri umferð og þarf 3,5 vinninga til sigurs í hverri viðureign, sem þá gefur tvö stig.

Allnokkur stigagróði rann inn í akureyrska stigahagkerfið um helgina; flest komu hjá C-sveitarmönnum. Af sigursælustu liðsmönnum má nefna þá Markús Orra Óskarsson, sem vann allar fjórar skákir sínar og þá Andra Frey Björgvinsson, Harald Haraldsson og Sigurð Eiríksson, sem fengu þrjá og hálfan vinning af fjórum.  Björn Ívar Karlsson tefldi þrjár skákir og vann allar og Jón Kristinn Þorgeirsson fékk þrjá vinninga af fjórum. Þórleifur Karlsson vann tvær skákir og hlaut þriðja vinninginn þegar andstæðingur hans mætti ekki til leiks. Þessir allir eru taplausir (og reyndar nokkrir fleiri). Drýgst var stigaöflunin hjá Markúsi Orra sem hækkar um rúm 50 stig fyrir frammistöðuna.  

Að venju verður síðari hlutinn háður á vormánuðum 2024. Við bíðum öll spennt eftir síðustu þremur umferðunum!

Haustmótið heldur áfram!

Eftir hlé sem gert var á haustmóti félagsins vegna Evrópumóts skákfélaga og svo Íslandsmóts skákfélaga sem var háð um nýliðna helgi, tökum við nú til við mótið á nýjan leik. Fimm umferðum af sjö er lokið og verða tvær síðustu umferðirnar tefldar á næstu dögum. Sjötta umferðin er á dagskrá á miðvikudag 18. október og hefst kl. 18. 
Stöðuna á mótinu má finna á chess-results, en mjög jafnt er á toppnum að tveimur umferðum óloknum. 
Þeir Andri Freyr Björgvinsson, Arnar Smári Signýjarson og Sigurður Eiríksson hafa náð í fjóra vinninga í fimm skákum, Eymundur Eymundsson hefur þrjá og hálfan og Markús Orri Óskarsson, Hreinn Hrafnsson og Gabríel Freyr Björnsson hafa þrjá vinninga. Einhver af þessum mun hampa meistaratitlinum að mótinu loknu. 

Í sjöttu umferð tefla þessir saman:
Eymundur og Sigurður (þessi skák er þegar tefld og lauk með sigri Eymundar).
Gabríel og Andri
Markús og Arnar Smári
Hreinn og Valur Darri
Natan og Sigþór
Stefán og Goði
Damian og Jökull Máni
Helgi Valur situr hjá.

Lokaumferðin verður svo tefld á sunnudag.