Jón Kristinn jólasveinn SA

Jólahraðskákmótið var í þetta sinn háð á Lyst í Lystigarðinum, því magnaða sælu- og samkomuhúsi. Þátttaka var með besta móti; bæði mættu félagar sem annars tefla meira sunnan heiða, svo og nokkrir heimamenn sem ekki hafa sést á mótum um einhverja hríð. Úr varð hið skemmtilegasta mót og sterkasta hraðskákmót sem hér hefur verið haldið im langa hríð, keppendur 20 talsins.  Einn þessara kappa, FM Jón Kristinn Þorgeirsson (a.k.a. Jokko hinn ógurlegi), mætti vel vígbúinn til leiks og lagði alla andstæðinga sína að velli, níu að tölu. Aðrir komu nokkuð langt á eftir honum, FM R. Sigurpálsson varð annar og í þriðja sæti rétt á hæla honum, CM H.B. Halldórsson og FM S.Þórhallsson.

Lokastöðuna og úrslit einstakra skáka má finna á chess-results.

Næst er það svo hin sívinsæla Hverfakeppni, haldin á morgun 29. des. kl. 13.00. 

Síðustu mót

Boðsmótinu lauk í síðustu viku.  Við erum ekki að tíunda úrslitin á mótinu eða lokastöðuna þar sem afar misjafnt hversu margar skakir einstakir keppendur tefldu. Markús Orri fékk þó óvéfengjanlega flesta vinninga, en hann tefldi fimm skákir af sjö og vann þær allar. Næstu menn voru allir í einum hnapp, en vinningatalan segir fátt þar sem mismargar skákir eru að baki. Það meginmarkmið með mótinu að gefa ungum og upprennandi iðkendum tækifæri til að tefla við reyndari menn og eiga möguleika á að öðlast alþjóðleg skákstig (fyrir kappskák), gekk hinsvegar prýðilega upp. Þannig munu þau Nökkvi Már og Harpa væntanlega koma inn á stigalistann nú um áramótin og Baldur Thoroddsen á aðeins eftir örfáar skákir til að fá sína stigatölu birta. Fleiri öðluðumst dýrmæta reynslu og allir höfðu gaman af. Alls tefldu 23 skákmenn eina eða fleiri skákir á mótinu. Það út af fyrir sig er frábær árangur!

Svo minnumst við á tvö nýleg hraðskákmót. Fyrra mótið fór fram fimmtudaginn 12. des. Tímamörk 4-2 og sjö mættu til leiks. Þar sigraði Sigurður Eiríksson með 5,5 vinninga af 6; Elsa María Kristinardóttir fékk 5 og Smári Ólafsson 4. 
Síðara mótið var háð í dag, 15. desember með 10 mínútna umhugsunartíma. Þar voru keppendur 10 talsins og tefldu sex umferðir. Enn kom Sigurður fyrstur í mark; vann allar sínar skákir. Áskell varð annar með 5 og Stefán G Jónsson fékk 4. 

Þátttaka í almennum mótum félagsins er aðeins að glæðast á ný og munar þar mestu að unga fólkið er nú duglegra að mæta; virðist ekki óttast það lengur að kljást við þá eldri og reyndari. Það veit á gott. 

Boðsmótið; Markús Orri með fullt hús eftir fjórar umferðir

Boðsmótið er nú rúmlega hálfnað. Nú hafa verið tefldar fjórar umferðir og aðeins misjafnt hversu margir mæta til leiks í hverri umferð; þó aldrei færri en tólf og 18 þegar flest var. Næst verður teflt á laugardaginn kl. 13.
Stöðuna nú má sjá hér: