Skákþingið; Markús orðinn efstur

Eftir tap í fyrstu umferð 89. Skákþings Akureyrar hefur Akureyrarmeistarinn frá 2024 nú spýtt í lófana og unnið fjórar skákir í röð og náð forystunni. Hún er þó naum, aðeins hálfur vinningur þegar tvær umferðir eru eftir af mótinu. 

Úrslitin í 5. umferð:
Markús-Smári       1-0
Tobias-Stefán      0-1
Karl-Sigurður      0-1
Sigþór-Eymundur    0-1
Benedikt-Valur     1-0
Baldur og Björgvin sátu hjá. 

Í skák efstu manna hallaði smenna nokkuð á Smára, en hann beit frá sér og hélt jafnteflismöguleikum á lífi þar til hann tapaði peði þegar miðtaflið var á leið út í endatafl. Með öflugum frelsingja á a-línunni ásamt ónotalegum hótunum gegn kónsstöðu Smára tókst honum að koma heilum vinningi í hús.
Tobias fékk snemma heldur lakara tafl eftir með hvítu eftir strategísk mistök gegn Caro-Kann vörninni. Hann mátti því þjást nokkuð lengi með lakara tafli, en var aldrei líklegur til að snúa því við gegn fv. unglingasmeitara Skákfélagsins (1968!). Reynslan sagði sumsé til sín. 
Sigurður vann nokkuð öruggan sigur gegn Karli, að því sagnir herma. Pistilsritari sá hinsvegar aldrei skákina og segir því fátt um hana. Hið sama má segja um skák Benedikts gegn Val Darra. Ef honum fara engar sögur, aðrar en þær að hér var farið eftir bókinni. 
Sigþór beitt Grand-Prix árásinni gegn Sikileyjarvörn Eymundar, en fékk litlu áorkað: lenti í vörn og smám saman í töpuðu peðsendatafli.  Hér kom því reynslan enn við sögu. 

Nú fer að líða að lokum skákþingsins og snýst þá allt um það hvort Markús nái að verja meistaratitil sinn. Þeirri spurningu kann að vera svarað strax í næstu umferð, en við sjáum hvað setur. 

Þessir tefla:
Stefán og Markús
Sigurður og Eymundur
Smári og Benedikt
Tobias og Karl
Baldur og Sigþór
Valur Darri og Björgvin

Staðan og allt annað á chess-results

Næstsíðasta umferð verður telfd nk. miðvikudagskvöld kl. 18 og lokaumferðin fer svo fram sunnudaginn 2. febrúar

Stelpuskákmót á skákdaginn

Skákdagurinn er á morgun, 26. janúar, á afmælisdegi Friðriks Ólafssonar, sem einmitt verður níræður á morgun. 
Honum til heiðurs, svo og skákgyðjunni Caissu og öllum duglegum skákstelpum, ætlum við að halda stelpuskákmót í Skákheimilinu sem byrjar kl. 13. 
Til stendur að efna til keppni milli stelpna úr Lundarskóla og Brekkuskóla, en um leið verður um einstaklingskeppni að ræða. Því eru allar áhugasamar stelpur á grunnskólaaldri velkomnar og fá að spreyta sig við taflborðið þótt þær séu ekki nemendur í þessum skólum. 

Skákþingið; jafnt á toppnum eftir fjórar umferðir

Fjórða umferð Skákþingsins var tefld í gær, 22. janúar. Til leiks mætti tíu skákmenn, en þrír sátu hjá. 
Úrslit:
Sigurður-Markús     0-1
Stefán-Karl         1/2
Benedikt-Tobias     0-1
Smári-Baldur        1-0
Björgvin-Sigþór     0-1

Tveimur skákum lauk snemm, þar sem bæði Björgvini og Baldri varð fótaskortur í byrjuninni og sáu ekki til sólar eftir það. Stefán og Karl tefldu þunga stöðuskák þar sem undiraldan var þung en yfirborðið kyrrlátt. Má segja að jafnvægið hafi aldrei raskast og nánast allir menn áfram á borðinu þegar samið var. 
Tobias tefldi nú sína fyrstu skák á mótinu; beitti Pirc-vörn gegn Benedikt og fékk heldur þrengri stöðu. Hann náði þó mótspili sem andstæðingur hans hugðist kæfa með því að gefa báða hróka sína en fá drottningu í staðinn. Þetta reyndist misráðið og frekari ónákvæmni gaf Tobiasi færi á listilegum dansi riddara og hróks í kring um kóng Benedikts sem gat ekki haldið krúnunni eftir þau vopnaviðskipti. 
Lengsta skákin var háð á efsta borði, þar sem Markús gerði harða hríð að forystusauðnum Sigurði. Í miðtaflinu fékk hann örlítið frumkvæði með svörtu gegn afar varkárri taflmennsku Sigurðar. Þrátt fyrir mannakaup hélt hann frumkvæðinu sem endaði með því að hann vann peð og þegar annað peð virtist dauðans matur gafst Sigurður upp. 

Akureyrarmeistarinn frá í fyrra hefur því náð efsta sætinu eftir fjórar umferðir ásamt Smára, en þeir eigast einmitt við í næstu umferð. Þeir félagar hafa þrjá vinninga, en hálfum vinningi á eftir þeim koma þeir Sigurður, Stefán, Karl og Tobias. Það er því þéttskipað í baráttu efstu manna þegar mótið er rúmlega hálfnað. 

Í fimmtu umferð, sem tefld verður laugardaginn 25.janúar kl. 13 eigast þessir við:
Markús og Smári
Tobias og Stefán
Karl og Sigurður
Sigþór og Eymundur
Benedikt og Valur Darri 

chess-results