Undanrásir haustmótsins; Markús og Áskell í forystu

Nú er lokið fjórum umferðum af sex í undanrásum haustmóts SA. Alls eru tefldar sex atskákir.
Þeir Áskell Örn og Markús Orri gerðu jafntefli sín á milli í fjórðu umferð og halda forystunni með 3,5 vinninga. Næstu menn:
Smári Ólafsson                3
Karl Egill Steingrímsson      2,5
Sigþór Árni, Viacheslav Kramarenko, Guðmundur Geir Jónsson, Sigurður Eiríksson, Eymundur Eymundsson og Harpa Hrafney Karlsdóttir hafa öll 2 vinninga. 

Alls hafa 17 keppendur tekið þátt í mótinu til þessa; þar af hafa 12 teflt allar skákirnar fjórar.

Lokaumferðirnar tvær verða tefldar á morgun, laugardag og hefst taflið kl. 13. Þeir sex sem fá flesta vinninga tefla svo til úrslita um meistaratitil félagsins síðar í mánuðinum. 

Haustmótið að hefjast

Haustmót Skákfélags Akureyrar er eitt af föstu mótum félagsins og hefur verið haldið á þessum árstíma um áratugaskeið. Það er um leið meistaramót félagsins. 
Í þetta sinn verður mótið haldið mmeð nokkuð nýstárlegum hætti.

Undanrásir verða með atskáksniði, alls sex umferðir (tvær á dag):
12. september kl. 18.00 
13. september kl. 18.00 
14. september kl. 13.00 
Hér er fyrirkomulag nokkuð frjálslegt og geta keppendur valið um það að tefla allar umferðirnar eða bara hluta þeirra. Þeir sem það vilja (og geta) tefla sem flestar skákir en þeir sem aðeins vilja spreyta sig einn dag eða tvo eru líka velkomnir. Umhugsunartími verður 15 mín með 10 sek viðbótartíma fyrir hverja skák.

Úrslit: Þeir sex keppendur sem fá flesta vinninga í undanrásunum tefla svo til úrslita um meistaratitil félagsins, alls fimm kappskákir. Úrslitakeppnin hefst fimmtudaginn 19. september kl. 18.00.  Ef þátttaka (og áhugi) er fyrir hendi verður öðrum keppendum boðið til b-úrslita. 

Þátttaka er öllum heimil, en aðeins félagsmaður getur hampað skákmeistaratitlinum. Ekki verður innheimt þátttökugjald fyrir undanrásirnar, en í úrslitum er gjaldið kr. 4000 fyrir félagsmenn en kr. 5000 fyrir aðra.  

Æfingatímar og haustdagskrá

Nú líður að lokum sumarleyfis skákmanna og starfsemin í Skákheimilinu að hefjast af fullum krafti.
Startmótið er að venju fyrsti viðurðurinn og er blásið til þess sunnudaginn 1. september kl. 13.00.
Næsti viðburður verður haustmótið, sem er meistaramót félagsins.  Mótið verður með nokkuð óvenjulegu sniði í þetta sinn og hefst með atskákum dagana 12-14. september, en lýkur síðar í mánuðinum með stuttu kappskákmóti. Fyrirkomulagið mun taka eitthvað mið af því hversu margir koma til leiks, en allt verður þetta auglýst nánar þegar nær dregur.

Fyrstu helgina í október munum við svo að venju taka þátt í Íslandsmóti skákfélaga og vonumst til að geta mannað a.m.k. þrjár sveitir að þessu sinni.

 

Þá liggur fyrir dagskrá barna- og unglingaæfinga.
Mánudagar kl. 16:45-18:00  Almennur flokkur
Þriðjudagar kl. 14:30-16:00  Framhaldsflokkur (sjá þó hér á eftir)
Fimmtudagar kl. 14:30-16:00 Opinn æfingatími

Til frekari skýringa:
Almenni flokkurinn er fyrir yngri börn og skemmra komna, en framhaldsflokkurinn fyrir þau sem þegar eru komin með nokkur grunn. Aldursskiptingin er ekki hárnákvæm, en að jafnaði má gera ráð fyrir að almenni flokkurinn henti betur börnum 11 ára og yngri.

Fimmtudagstíminn er svo opinn öllum eins og nafnið ber með sér og í raun ekkert því til fyrirstöðu að þau áhugasömustu mæti í alla þrjá tímana.
Almenni flokkurinn hefst 26. ágúst.  Daginn eftir verður skráning í framhaldsflokk. Iðkendur eru velkomnir kl. 14.30, en við gerum líka ráð fyrir að hafa tíma fyrir foreldraspjall alveg framundir kl. 17. Framhaldsflokkurinn hefst svo fyrir alvöru þann 10. september og fyrsti opni æfingatíminn verður einnig í þeirri viku.

Ekki er ólíklegt að reynt verði að bjóða upp á fleiri opna æfingatíma og er foreldrum bent á að fylgjast með tilkynningum frá Sportabler og á facebook-síðu félagsins. En við byrjum svona og sjáum svo til.

Þetta misseri verður innheimt eitt æfingagjald fyrir alla iðkendur, kr. 10.000. Gegn því gjaldi geta þau sótt allar æfingar sem í boði verða, auk móta á vegum félagsins, hvort sem um er að ræða almenn mót eða barnamót.

Þau Elsa María Kristínardóttir og Hilmir Vilhjálmsson munu áfram sjá um þjálfunina í almennaflokknum, en umsjón með framhaldsflokknum verður í höndum Áskels Arnar Kárasonar. Aðrir leiðbeinendur koma til skjalanna eftir þörfum.