Tvö stelpuskákmót

Skák er kennd reglulega í þremur grunnskólum á Akureyri og stundum brugðið á leik og haldin skákmót. 

Þann 15. janúar sl. var haldið skákmót fyrir stelpur í Lundarskóla, 4-7. bekk. Alls mættu 19 stelpur til leiks og tefldu hraðskák, fjórar umferðir. Harpa Hrafney Karlsdóttir úr 6. bekk vann allar sínar skákir og þar með mótið. Elín Stefanía Sigurðardóttir úr 4. bekk varð önnur og jafnar í þriðja sæti Unnur Birna Valdez (6.bk), Selma Rós Hjálmarsdóttir (5.bk) og Þórkatla Andradóttir (4. bk). 

Þann 20. janúar var svo haldið mót fyrir stelpur í 5-7. bekk Brekkuskóla með sama fyrirkomulagi. Þar mættu 16 stelpur til leiks. Yrsa Sif Hinriksdóttir úr 7. bekk vanna allar sínar skákir og þar með mótið. Jafnar í öðru sæti urðu Sóldögg Jökla Stefánsdóttir og Ragnheiður Valgarðsdóttir.

Í framhaldinu er svo stefnt að því að halda sameiginlegt mót þar sem stelpur úr báðum þessum skólum leiða fram hesta sína (og biskupa). Það verður haldið í Skákheimilinu á skákdaginn sjálfan, 26. janúar og hefst kl. 13. 

Þriðja umferð; Sigurður vann toppslaginn

Þriðja umferð, sem tefld var í dag, 19. janúar, var með daufasta móti. Að hluta til má rekja það til forfalla vegna veikinda, en fresta varð skákum Markúsar og Vals Darra, svo og skák Goða og Sigþórs.  
Á efstu borðum áttust nú við reyndustu keppendurnir, sem flestir eiga áratuga skáksögu að baki. Hugsanlega bar reynslan þá Karl og Smára ofurliði, eða friðareðlið náði tökum á þeim, því þeir sömdu um skiptan hlut eftir aðeins 19 leiki, að sönnu í hnífjafnri stöðu. Hin reynsluboltaskák var milli Sigurðar fyrrum sýslumannsfulltrúa og eðlisfræðingsins Stefáns, sem unnuð hafði báðar skákir sínar til þessa. Þarna var að sönnu þungt lagst á árar og virtst Stefán, sem hafði svart ná að jafna taflið fremur auðveldlega. Krækti hann í peð í miðtaflinu og brást Sigurður við með því að flækja taflið sem mest hann mátti. Saxaðist nú á tíma beggja, einkum Stefáns. Flækjurnar dugðu Sigurði til að endurheimta peðið og svo var kóngur Stefáns orðinn heldur berskjaldaður. Í tímahrakinu lék hann svo af sér frípeðinu sem hann hafði sett allt sitt traust á og eftir það mátti hann sín lítils gegn málafylgju lögfræðinsinssem hafði sigur í málinu með tveimur samstæðum frípeðum. Þar með skaust hann fram úr eðlisfræðingnum og náði efsta sætinu.
Meðan á þessu gekk tefli æskan hratt og ónákvæmt í skák Björgvins og Baldurs. Fyrst lék Baldur af sé manni og stóð þá afar höllum fæti. Það kom þó ekki að sök, því skömmu síðar lék Björgvin af sér heilum hrók og eftir það varð tafli hans ekki bjargað. Þeim lá mikið á, ungu mönnunum og stóð klukka beggja nálægt 1:30 að loknum 62 leikjum sem það tók þá að ljúka skákinni. Fengu þeir föðurlegar ákúrur skákstjóra eftir skákina fyrir þetta óðagot. 
Öllu rólegra var yfirbragðið í skák þeirra Eymundar og Benedikts. Sá síðarnefnd mátti brjótast til byggða innan úr Hörgárdal í snjókomu og þæfingsfærð, en lét það þó ekki hindra sig í því að bregða fyrir sig franskri vörn. Fékk hann prýðisgóða stöðu og lengi vel virtist skákin í jafnvægi; mönnunum fækkaði smátt og smátt á birðinu og upp kom endatafl þar sem báðir höfðu tvo hróka; Bensi valdað frípeð en Mundi einu opnu línuna á borðinu. Eftir 35 leiki sáu þeir félagar enga lausn á vanda stöunnar en að semja jafntefli. Það var þó kannski heldur vafasöm heldur vafasöm ákvörðun þar sem E. Lúther (sem stýrði hvítu mönnunum) átti þvingað mát í lokastöðunni og það í aðeins tveimur leikjum. Svona getur nú friðsemdin farið með menn!

Þar sem þriðju umferð er ekki að fullu lokið er staðan í mótinu ekki alveg ljós. Þó vitum við að Sigurður Eiríksson er einn í efsta sæti með 2,5 vinninga en þeir Stefán, Karl og Smári hafa 2 og gæti a.m.k. einn til viðbótar bæst í þann hóp. Röðun í 4. umferð, sem tefld verður miðvikudaginn 22. janúar kl 18, liggur líklega ekki fyrir fyrr en síðdegis á morgun, þann 21. 

Skákþingið: Stefán einn í forystu.

Aðeins fjórar skákir voru tefldar í 2. umferð í kvöld. Bæði komu til yfirsetur og hin margfræga ekkjufrú Skotta (sem gerir jafntefli í sínum skákum í þessu móti), auk þess sem einn keppandi forfallaðist á síðustu stundu og mætti því ekki til leiks. 

Af hinum tefldu skákum er það helst að frétta að báran var stigin afar þunglega í skák Smára og Sigurðar. Sá síðarnefndi setti snemma upp ísfirskan biskup á b7 sem virtist óviðráðanlegur, jafnvel fyrir marghertan leigubílstjóra. Þvældist sá eyfirski um hríð í aðeins lakari stöðu og brátt ruddust hinir þungu menn Sigurðar með hjálp af biskupnum inn á kóngsstöðu taxidræversins úr Staðarbyggðinni. En kóngur hans slapp á hlaupum suður allan fjörð og nú fóru ísfirsku kallarnir að grípa í tómt. Snörist þá taflið við og Smári (sá eyfirski) virtist hafa taflið í hendi sér. En þegar honum förlaðist náði ísfirski guðsmaðurinn aftur að láta til sín taka og um síðir fundu menn ekki önnur ráð en að þrátefla. Stóðu þá báðir laklega eins og stundum er sagt.  Stóð þessi skák lengst allra og var stórbrotin. 
Sigþór missté sig snemma í skákinni við Markús og mátti gefa mann í upphafi miðtafls. Eftir það var ekki að sökum að spyrja og Akureyrarmeistarinn knúði fram sigur af öryggi þótt það tæki sinn tíma. 
Stefán átti harma að hefna gegn Benedikt frá því í boðsmótinu. Hér mættust því aftur fulltrúar hinna merku þveráa Eyjafjarðardala (Munka- og Bægis-); miklir andans menn sem draga dám af sínum fæðingarstöðum. Enda bar taflmennskan andríki þeirra greinilegan vott. Báðir tefldu af krafti, en skyndilega skellti svört munkadrottning (ekki nunna samt) sér inn í Bægisárstöðuna og svo fylgdu tveir hrókar. Þegar öðrum þeirra var fórnað og hinn bjó sig undir sömu örlög var Paradísarmissir Benedikts fullkomnaður og hann mátti gefast upp. Var þá hefnt fyrir umrætt tap á boðsmótinu.
Af Kussungsstaðaætt var svo mættur Valur Darri (stundum nefndur Val-dari) og atti kappi við hálfnafna siðbótarklerksins alkunna, Eymund Lúther. Sá fyrrnefndi tefldi hvasst með hvítu mönnunum og fórnaði peði snemma tafls. Lúther svaraði því af yfirvegun og gætti þess að veikja ekki stöðu sína. Upp kom endatafl þar sem svartur (E. Lúther) hafi klárt frumkvæði og hættulegan frelsingja, en Kussungstaðakappinn kunni sína lexíu (virkja kónginn!) og þegar þjóðhöfðinginn kom á vettvang voru dagar frelsingjans taldir. Þá bauð Eymundur jafntefli sem var þegið. 

Smári-Sigurður       1/2
Benedikt-Stefán      0-1
Valur Darri-Eymundur  1/2
Sigþór-Markús        0-1
Goði-Karl            0-1 (hvítur mætti ekki) 

Stefán því einn efstur með fullt hús að tveimur umferðum loknum, en Smári, Sigurður og Karl hafa einn og hálfan. Aðrir hafa færri vinninga.  
Næst verður teflt á sunnudag. 

Þá eigast þessir við:
Sigurður og Stefán
Karl og Smári
Markús og Valur
Eymundur og Benedikt
Björgvin og Baldur
Goði og Sigþór
Tobias situr yfir

Chess-results.comhttps://chess-results.com/tnr1098985.aspx?lan=1&art=2&rd=3