Skemmtileg stelpuhelgi. Harpa stúlknameistari.

Dagana 17. og 18. maí efndum við til "stelpuhelgi" í Skákheimilinu og fengum Jóhönnu Björgu Jóhannsdóttur varaforseta SÍ og kennara við Skákskólann í lið með okkur. Á laugardeginum var haldin vegleg æfing og mættu 12 stúlkur á aldrinum 9-12 ára. Þær létu vel af æfingunni og ekki skemmdi fyrir að fá gómsæta pizzuveislu í lokin. Daginn eftir var svo haldið "Stúlknameistaramót Akureyrar" með 8 þátttakendum. Þar reyndist hin margherta Harpa Hrafney Karlsdóttir hlutskörpust og vann allar sínar skákir, sjö að tölu og er þar með fyrsta stúlkan um langt árabil sem hampar þessum titli. Næst henni kom Sóldögg Jökla Stefánsdóttir með sex vinninga og þriðja varð Ragnheiður Valgarðsdóttir með fimm. Allar eru þessa telpur fæddar árið 2013 og bara nokkuð iðnar við kolann. Vonandi tekst okkur að halda merki kvennaskákar áfram á lofti hér fyrir norðan og var heimsókn Jóhönnu mikil hvatning í þá átt

 

Starfsemin framundan

Æfingar og mót það sem lifir maímánaðar:

Æfingar í almennum flokki kl. 16:45-18:00 12. maí og 19. maí. Vormótið verður svo 26. maí.
Æfingar í framhaldsflokki kl. 14:30-16:00 13. maí, 22. maí og 27. maí. 
Sérstök stelpuæfing með Jóhönnu Björgu Jóhannsdóttur verður 17. maí kl. 13:00 
Opnar æfingar sem verið hafa á fimmtudögum eru komnar í sumarfrí.

Mót sem hér segir:
Miðvikudaginn 14. maí kl. 18:00, atskák 8-3
Sunnudaginn 18. maí kl. 13:00, stúlknameistaramót Akureyrar.
Mánudaginn 19. maí kl. 20:00, hraðskákmót 4-2. Reiknað til stiga.
Miðvikudaginn 21. maí kl. 18:00, atskák 8-3. Reiknað til stiga.
Mánudaginn 26. maí kl. 16:45, vormót barna.
Þriðjudaginn 27. maí kl. 20:00, BSO-mótið, hraðskák 4-2. Reiknað til stiga. 

Svo viljum við minna okkar fólk á hið einstæða 100 ára Afmælismót Skáksambands Íslands á Blnduósi dagana 15-21. júní. Skákfélagið hefur þegar tekið frá gistipláss í tveimur fjögurra manna skálum í Glaðheimum.  Þetta mót verður allt í senn, alþjóðlegt skákmót og Íslandsmót í ýmsum flokkum, ungra og gamalla. 

Svo má segja frá því að nú um helgina, 10-11. maí munu öldungar úr SA (með liðsstyrk nokkurra öldunga frá öðrum landsbyggðum) etja kappi við jafnaldra sína úr Reykjavík á Hótel Laugarbakka í Miðfirði. Þar er liðsstjóri okkar sem fyrr Karl Egill Steingrímsson. 

 

Markús páskameistari

Hið árlega páskahraðskákmót félagsins var haldið í dag, annandag páska. Alls mættu fimmtán keppendur til leiks, ungir sem aldnir, eins og venja er til á mótum félagsins. Tefldar voru 9 umferðir eftir svissnesku kerfi. Þrír keppendur skáru sig nokkuð úr á mótinu; innbyrðis úrslit í skákum þeirra réðu öllu um niðurstöðuna þar sem þeir unnu allar skákir gegn öðrum þátttakendum. Markús og Rúnar gerðu jafntefli, Markús vann Áskel og Áskell lagði Rúnar að velli. 
Heildarstaðan: