Enn vinna Rúnar og Símon

Fimmta umferð Skákþings Akureyrar fór fram í dag og var hart barist á öllum borðum.

Fyrstir til að ljúka sinni skák voru þeir Benedikt og Andri. Benedikt rataði snemma í vandræði og gafst upp eftir 16 leiki. Var hann þá talsverðu liði undir.
0-1

Í skák Rúnars og Arnars varðist yngsti keppandi mótsins vel með svörtu mönnum lengi framan af. Nálægt 20 leik tókst Rúnari að vinna peð og nýtti alla sína reynslu til að sigla endataflinu heim
1-0

Mikil spenna var í skákinni Símon – Smári og mátti lengi vel vart á milli sjá hvor stóð betur. Símon hafði mun betri tíma og þegar tímahrak var framundan hrundi svarta staðan eftir ónákvæmni Smára.
1-0

Óvæntustu úrslit dagsins urðu í æsispennandi skák Sigurðar og Stefáns. Sigurður blés til sóknar en Stefán varðist af hörku. Svo fór að Sigurður lét peð af hendi en átti framsækið frípeð og biskupapar. Augnabliks ónákvæmni varð til þess að hann lék af sér frípeðinu og þar með skákinni. Þar fékk Stefán sinn fyrsta vinning, vonum seinna. Sigurður hefur verið óheppinn það sem af er og er enn án vinnings.
0-1
Staðan eftir fimm umferðir er sem hér segir.

1.-2. Símon og Rúnar 4,5 vinningar
3. Andri 4
4. Smári 3
5. Benedikt 2
6.-7. Stefán og Arnar 1
8. Sigurður 0

 

Næsta umferð fer fram á fimmtudag. Þá leiða saman hesta sína:

Andri – Smári
Stefán – Símon
Arnar – Sigurður
Benedikt – Rúnar.

Sjá einnig Chess-results

Skákþingið: Símon í forystu

Fjórða umferð Skákþings Akureyrar var tefld í gær - 24. janúar. Úrslit:

Arnar Smári-Benedikt  0-1

Smári-Sigurður        1-0

Andri-Símon           0-1

Stefán-Rúnar          verður tefld 28. jan.

Mest spennandi var viðureign efstu manna, Andra og Símonar. Sá síðarnefndi kom á óvart með því að beita hollenskri vörn og náði snemma að jafna taflið.  Í miðtaflinu tók svartur svo öll völd og vann snaggaralega. 

Smári fékk snemma heldur vænlegra taflæ gegn Sigurði sem fékk ekki varist snarpri kóngssókn þess fyrrnefnda.

Yngissveinar Arnar og Benedikt tefldu tvísýna skák þar sem sá síðarnefndi gaf tvo menn fyrir hrók og tvö peð. Arnar geystist í kóngssókn sem þó skilaði litlu og þegar hann á örlaga stundu gat tryggt sér jafna stöðu eftir drottningakaup, sá hann hróksvinning í hillingum sem varð honum að falli. 

Símon er nú einn efstur með 3,5 vinninga eftir fjórar skákir, en Rúnar fráfarandi meistari getur þó náð honum að vinningum með sigri í frestaðri skák. Á hæla Símonar koma svo þeir Andri og Smári með þrjá vinninga. Vafalaust mun baráttan um titilinn standa milli þessara fjögurra. 

Í fimmtu umferð sem tefld verður á sunnudaginn eigast þessir við:

1	3	1297		Stefansson Benedikt			Bjorgvinsson Andri Freyr	2003	8
2	4	2266	FM	Sigurpalsson Runar			Signyjarson Arnar Smari	1351	2
3	5	1845		Eiriksson Sigurdur			Jonsson Stefan G	0	1
4	6	2064		Thorhallsson Simon			Olafsson Smari	1940	7

öll úrslit, sjá chess-results

Skákdagsmótið 26. janúar - stórmót fyrir börn!

Tilefnið getur ekki verið merkilegra - þann 26. janúar á fyrsti stórmeistari okkar íslendinga. Friðrik Ólafsson, afmæli. Hann verður 84 ára gamall og er lifandi vitnisburður um það að skákmenn bera aldurinn yfirleitt vel - sérstaklega ef þeir byrja ungir að tefla. Annar öldungur á líka afmæli á næstu dögum - nefnilega Skákfélag Akureyrar sem verður 100 ára þann 10. febrúar nk. Við erum því á sögulegum nótum, en ekki síður hugum við að nútímanum og unga fólkinu.

Stórmótið verður sumsé haldið laugardaginn 26. janúar í sal Brekkuskóla og hefst kl. 10.  Tefldar verða 7 umferðir með 7 mínútna umhugsunartíma. Fyrirhugað er að telft verði í tveimur flokkum:

a. börn fædd 2010 og síðar

b. börn fædd 2009 og fyrr

Veitt verða verðlaun í eftirfarandi aldursflokkum:

Börn fædd 2011 og síðar (yngsti flokkur)

Börn fædd 2010

Börn fædd 2009

Börn fædd 2006-2008 (eldri flokkur)

Börn fædd 2003-2005 (unglingaflokkur)

Allir þátttakendur fá viðurkenningu. 

Gott er að mæta tímanlega; skráning hefst á skákstað kl. 9.30

Stjórnin