Mótaröð á fimmtudag

Sjöunda og síðasta mótið í mótaröðinni sívinsælu fer fram nú á fimmtudag 8. desember og hefst kl. 20.00.

Kertasníkir kíkir í heimsókn. Aðrir jólasveinar velkomnir.

Sigurður Arnarson sigraði á skylduleikjamóti

Í dag fór fram skylduleikjamót hjá Skákfélagi Akureyrar. Tefldar voru stöður úr 6. minningarmótinu um Tal sem lauk fyrir skemmstu í Moskvu. Í báðum mótunum voru 10 keppendur og tefldu allir við alla. Heldur færri jafntefli voru á Akureyri en í Moskvu en að öðru leyti var taflmennskan nokkuð svipuð. Í hverri umferð hér á Akureyri var byrjað á stöðu sem komið hafði upp í Moskvu og á milli umferða sagði Sigurður Arnarson frá gangi mótsins þar eystra og Sveinbjörn Óskar fjallaði um félagsgjöld og fleira. Þar sem áðurnefndur Sigurður hafði valið allar upphafsstöðurnar hafði hann nokkuð forskot sem hann nýtti sér af fullkomnu miskunnarleysi og vann mótið. Hlaut hann 7 vinninga af 9 mögulegum. Í 2.-3. sæti urðu þeir feðgar Sigurður Eiríksson og Tómas Veigar Sigurðarson með 6 vinninga.

Lokastaðan

1. Sigurður Arnarson                          7 vinningar af 9 mögulegum

2.-3. Tómas Veigar Sigurðarson        6

2.-3. Sigurður Eiríksson                     6

4. Jón Kristinn Þorgeirsson              5,5

5. Haki Jóhannesson                         5

6. Andri Freyr Björgvinsson             3,5

7.-10. Smári Ólafsson                       3

7.-10. Ari Friðfinnsson                      3

7.-10. Karl Steingrímsson                 3

7.-10. Sveinbjörn Sigurðsson            3

Skylduleikjamót

Á sunnudaginn fer fram skylduleikjamót í húsakynnum Skákfélagsins. Í hverri umferð hefst taflið á nýrri stöðu. Stöðurnar komu allar upp í minningarmóti um fyrrverandi heimsmeistara, Mikael Tal, sem haldið var nýlega í Moskvu. Það mun vera sterkasta skákmót sem nokkurn tíman hefur verið haldið í heiminum ef miðað er við alþjóðleg elóstig. 

Mótið hefst kl. 13.00 og fær hver keppandi 10 mínútna umhugsunartíma á skák. Á milli umferða verður sagt stuttlega frá minningarmótinu.