Jólajóla!

Skákfélagssíðan óskar öllum félagsmönnum svo og öðrum skákunnendum fjær og nær gleðilegra jóla. Eins og oftast verður nóg um að vera hjá skákáhugamönnum um jólin. Næst á dagskrá er hin árlega hverfakeppni sem háð verður þriðja í jólum, 27. desember og hefst kl. 20.  Eins og í fyrra gerum við ráð fyrir tveimur sveitum, noðran og sunnan Glerár. Tefldar verða ein eða tvær 15 mínútna skákir í upphafi og að því loknu bændaglíma í hraðskák. Áhugamenn eru hvattir til að fjölmenna; allir fá að vera með meðan húsrúm leyfir. Liðstjórar eru Áskell Örn Kárason (sunnan) og Smári Ólafsson (norðan).

 

Næst á dagskrá verður svo sjálft jólahraðskákmótið. Það hefur verið auglýst 29. desember en nú hefur verið ákveðið að flýta því um einn dag, vegna Íslandsmótsins í netskák, sem er á dagskrá þann 29. Sumsé, jólahraðskákmót 28. desember kl. 20!

Þá viljum við líka minna á hið arfavinsæla nýjársmót félagsins, sem akkúrat fer fram á nýjársdag og hefst í síðasta lagi kl. 14. Þeir sem reynt hafa vita að betir er ekki hægt að fagna nýju ári en að láta máta sig á þessu móti! Eftir það liggur leiðin klárlega upp á við!

Skáksíða

Vakin er athygli á að tengill inn á síðu sem Smári Rafn Teitsson heldur úti er nú kominn á síðuna hér neðarlega til vinstri. http://chessproducts.co.uk/ Þar má finna ýmsar skákvörur, daglegar skákþrautir í þremur þyngdarflokkum og fleira. Skákáhugamenn eru hvattir til að skoða þessa síðu og dreifa henni sem víðast.

Tómas og Bragi tvískákmeistarar!

Í gær sunnudag var háð Íslandsmót í akureyrartvískák, hið fyrsta sinnar tegundar um árabil. Reyndar vill heimildarmaður okkar halda því fram eftir að hafa gluggað í Heimsmetabók Guinness að hér hafi í raun verið á ferðinni óopinbert heimsmeistaramót. Enn á þó eftir að fá staðfestingu á þessu hjá til þess bærum yfirvöldum, (og því miður eru þeir FIDE-bræður oft seinir að taka við sér). Keppnisreglum á mótinu er lýst hér framar á síðunni, en stuttu máli þá tefla menn tveir í liði og leika til skiptis. Er þá mikilvægt að samhæfa skákhugsun sem mest má, en í þetta sinn var þó enginn tími gefinn til slíks undirbúnings. Í skipan liðanna var höfð sú regla að paraðir voru saman fulltíða maður og unglingur. Svo jafnt væri í báðum flokkum, gekk elsti keppandinn, Bragi Pálmason, í barndóm og gerðist unglingur í annað sinn. Hófst svo taflið og lauk sem hér segir, eftir að allir höfðu telft sex skákir með því að leika annan hvorn leik:

1. Tómas Veigar Sigurðarson/Bragi Pálmason 4,5

2-4. Sigurður Eiríksson/Andri Freyr Björgvinsson, Jón Kristinn Þorgeirsson/Þorgeir Smári Jónsson("Fumlausir feðgar") og Sigurður Arnarson/Hjörtur Snær Jónsson 3,5

5. Benedikt Smári Ólafsson og Benedikt Stefánsson ("Nafnar") 3

6. Gunnar Aðalgeir Arason/Ari Gunnar Óskarsson("fræknir feðgar") 2

7. Hersteinn Bjarki Heiðarsson/Haki Jóhannesson  1

Nú fara skákmenn örstutt jólafrí en koma næst saman í hinni árlegu hverfakeppni sem háð verður 27. desember nk.