Íslandsmót grunnskólasveita:

Góður árangur Glerárskóla

Íslandsmót grunnskólasveita var háð í Rimaskóla í Reykjavík nú um helgina. Alls tóku 26 sveitir þátt í mótinu og sigraði A-sveit Rimaskóla með miklum yfirburðum og varð b-sveit skólans í öðru sæti. Sveit Glerárskóla tók þátt í mótinu, ein sveita utan höfuðborgarsvæðisins og stóð sig með stakri prýði.  Sveitina skipuð þeir Logi Rúnar Jónsson, Hersteinn Bjarki Heiðarsson, Hjörtur Snær Jónsson og Birkir Freyr Hauksson.  Þeir tefldu við allar sterkustu sveitirnar og voru allan tímann í baráttu um verðlaunasæti, en máttu þola 0-4 tap fyrir sigursveitinni í síðustu umferð. Þeir fengu 19 vinninga í 9 umferðum og enduðu í 8. sæti af 26 sveitum. Bestum árangri náði Hjörtur Snær á 3. borði, fékk 5,5 vinning. 

Dregur til tíðinda í TM-mótaröðinni

Sjöunda og næstsíðasta mótið í TM-mótaröðinni fer fram nk. fimmtudagskvöld. Hart er barist um verðlaunasætin í syrpunni og má búast við grimmilegum bardögum á tveimur síðustu mótunum. Staða efstu manna er nú sem hér segir:

 

1. Tómas Veigar Sigurðarson       50

2. Jón Kristinn Þorgeirsson          46

3. Sigurður Eiríksson                    41,5

4. Sigurður Arnarson                    31,5

5. Haki Jóhannesson                    29

6. Smári Ólafsson                         18

    Karl E Steingrímsson                18

8. Áskell Örn Kárason                   16

9. Atli Benediktsson                      11,5

Andri Freyr skákmeistari Brekkuskóla

Skólaskákmót Brekkuskóla var háð í gær. Keppendur voru fáir, en þeim mun drengilegar barist. Að líkum hafði Andri Freyr Björgvinsson nokkra yfirburði á mótinu, nýkominn af Alþjóðlega Reykjavíkurskákmótinu þar sem hann náði frábærum árangri. Andri, sem er í 9. bekk,  vann allar skákir sínar, 5 að tölu. Næstur kom Magnús Mar Võljaots, 9. bekk með 4 vinninga, Oliver Ísak Ólason 3. bekk fékk 3, Stefán Máni Ólafsson 8 bekk 2, Ægir Jónas Jensson 9. bekk 1 vinning og Þorgeir Sólveigar Gunnarsson 3 bekk O.

Þeir Andri Freyr og Magnús unnu sér með þessum árangri rétt til þátttöku í eldri flokki á skólaskákmóti Akureyrar sem háð verður þann 21. apríl nk.  Sem sigurvegari í yngri flokki (1-7. bekk) vinnur Oliver sér einnig rétt til þátttöku á mótinu, sem og Þorgeir Sólveigar Gunnarsson. Allir hafa þessir strákar næmt auga fyrir skák, en þurfa sumir að komast í betri æfingu.