Mikael Jóhann með 7 vinninga af 7 mögulegum

Nú er nýlokið Íslandsmóti framhaldsskóla í skák með sigri Verslunarskóla Íslands en MR varð í 2. sæti. Sjá nánar á http://skak.blog.is/blog/skak/entry/1235212/#comment3307028 og http://www.dv.is/blogg/skaklandid/2012/4/19/viva-la-verzlo/ Engin sveit var send frá Akureyri á þetta mót en það kom ekki í veg fyrir að við ættum mann í keppninni. Mikael Jóhann Karlsson, sem tefldi á 2. borði hjá MR, hlaut borðaverðlaun. Hann hlaut 7 vinninga í 7 skákum. Til hamingju með árangurinn, Mikki.
Skákstjórar á mótinu voru Stefán Bergsson og Björn Ívar Karlsson.

Gleðilegt sumar!

Í tilefni sumarkomu verður Skákfélag Akureyrar með fyrirlestur í húsakynnum sínum í íþróttahöllinni í kvöld kl. 20.00. Fyrirlesturinn verður um peðafylkingar á miðborði og kosti og galla við slíkar keðjur. Hugað verður að hvernig árangursríkast er að tefla með slíkar fylkingar og hvernig bregðast skal við þeim.  Aðeins neðar á síðunni má sjá 15 skákir sem koma inn á þessar stöðutýpur og verða sumar þeirra skoðaðar í kvöld. Að auki er líklegt að ein eða tvær skákir af Íslandsmótinu fylgi með.

Aðgangur er ókeypis og öllum heimill.

Skólaskákmót Akureyrar á laugardag

Skólaskákmót Akureyrar fer fram laugardaginn 21. apríl. Teflt er í tveimur flokkum, yngri flokki 1-7. bekk og eldri flokki 8-10. bekk. Hámarksfjöldi er 24 keppendur í hvorum flokki. Í skólum þar sem skólamót hafa farið fram eiga 2 efstu menn í hvorum flokki sjálkrafa keppnisrétt, en fulltrúar annarra skóla eru velkomnir, svo og aðrir áhugasamir keppendur þar til hámarksfjölda er náð.

Mótið hefst kl. 13.00 í skákheimilinu í Íþróttahöllinni. Þeir sem ekki eru þegar skráðir í mótið skulu gera vart við sig á skáksatð ekki síðar en 10 fyrir upphaf móts.

Umhugsunartími er 7 mínútur á skák og verða tefldar 7 umferðir í hvorum flokki, en fjöldi umferð getur þó ráðist af þátttöku.

Tveir efstu menn í hvorum flokki vinna sér keppnisrétt á kjördæmismóti og keppendur í 3-4. eru þar varamenn.