15 mín. mót

Á morgun, sunnudag, kl. 13 verður haldið 15 mínútna mót hjá Skákfélaginu. Viðbúið er að mótið taki nokkuð lengri tíma en fjórðung úr klukkustund þótt um kortermót sé að ræða. Hvernig á því stendur verður ekki upplýst fyrr en á mótstað. Rétt er þó að geta þess að 15 mínútur eru aðeins 1/96 úr sólarhring.

Allir áhugamenn um skáklist og/eða tímaeiningar eru velkomnir.

Haustmóti barna og unglinga frestað

Mótið upphaflega á dagskrá nú á laugardaginn. Ákveðið hefur verið að fresta því vegna ferðar nokkurra unglinga á Unglingameistaramót og Íslandsmót í pilta- og drengjaflokki í Reykjavík nú um helgina.  Mótið verður sett á innan tíðar.

Fimmtudagsfyrirlestur

Á fimmtudaginn verður opið hús hjá Skákfélaginu. Að þessu sinni mun Sigurður Arnarson fara yfir nokkur lærdómsrík hróksendatöfl og skoða í leiðinni fáein atriði sem hafa ber í huga. Samkvæmt venju munu áhorfendur koma með athugasemdir eftir þörfum.

Hróksendatöflin eru algengustu endatöflin sem upp koma í skák. Það er eðlilegt þegar haft er í huga að hrókarnir eru fjarri öllum átökum í flestum byrjunum og gjarnan að baki víglínunnar lengi framan af hverri skák. Því eru þeir oft seinir að blanda sér í baráttuna og því er algengt að þeim sé síðast skipt upp. Að sumra dómi eru hróksendatöflin einna erfiðust endatafla en í þeim skiptir þolinmæði og virkni einna mestu máli.

Fyrirlesturinn hefst kl. 20.00 og verður heitt á könnunni.