Forgjöf með ofanígjöf

Venju fremur var góðmennt á sunnudagsmóti Skákfélagsins að þessu sinni. Sex heiðursmenn mættu til leiks í forgjafar móti og var þar ekkert gefið eftir. Á klukkum sem stilltar voru sérstaklega fyrir þessar viðureignir sáust einkum tímamörkin 7-7, 8-6, 9-5 og 11-3! Samanlagður tími var sumsé 14 mínútur en skiptist misjafnlega eftir meintum styrkleika þátttakenda. Heiðursfélaginn Karl Egill byrjaði öðrum betur í þetta sinn og vann þrjár fyrstu en slakaði á eftir það og leyfði andstæðingum sínum að fá stig.

Alls voru sumsé tefldar fimm umferðir í sex manna móti og þegar upp var staðið mátti lesa þetta af tölfunni:

Áskell Örn Kárason        3,5

Karl Egill Steingrímsson  3

Sigurður Eiríksson

Sigurður Arnarson

Haki Jóhannesson      2.5

Einar Garðar Hjaltason 1

Þannig fór um sjóferð þá

Forgjafarmót á sunnudag

Enn bryddum við Skákfélagsmenn upp á nýjungum og vonum í hjarta okkar að það veki áhuga þeirra sem hafa gaman af manntafli.

Nú á sunnudag verður efnt til forgjafarmóts með þeim hætti að forgjöfin gefst á klukkunni (áhald sem var samviskusamlega kynnt hér fyrir nokkrum færslum).

Aðferðin er þessi:

Samanlagður umhugsunartími er 14 mínútur, sem þýðir að báðir hafa 7 mínútur ef þeir eru jafnsettir, en eftir því sem stigamunur eykst er umhugsunartímanum breytt þeim í hag sem er stigalægri. Svona verður þetta gert:

Stigamunur                        Tímaskipting í mínútum

0-150                                              7-7

151-300                                          8-6

301-450                                          9-5

451-600                                        10-4

601 og meiri munur                       11-3

Stuðst verður við íslenski skákstig og reiknast stigalausir með 1500 stig, ef þeir mæta.  Menn eru beðnir um að brýna kuta sína hóflega og mæta tímanlega. Helst er búist við að 7 umferðir verði tefldar, ef þær verða fleiri ná þær í mesta lagi 9.  Í það minnsta vonumst við eftir að fá sem flesta og nú fá hinir stigalægri einstætt tækifæri til að klekkja á hinum skelfilegu stigamönnum í röðum félagsins.

Við hefjum leik kl. 13 á sunnudag og aðgangseyrir er að venju kr. 500. 

Félagsfundur með drottningu og hrók. Léttur maður á staðnum

Eins og sjá má á síðustu færslu mun einkavinur Skyrgáms fræða okkur um afbrigðileg mannakaup nú á fimmtudagskvöldið og má segja að þar sé léttur maður á léttum stað. Áður en fyrirlestur hans hefst stendur til að fjalla stuttlega með fundarmönnum um útlit fyrir vorumferðir Íslandsmóts Skákfélaga, m.a. um það hversu mikilli aðstoð útlendra meistara við eigum að sækjast eftir. Eru þeir sem vilja hafa áhrif á þau mál hvattir ákaflega til að mæta.