Aðalfundur Skáksambandsins:

Tvær sveitir Skákfélagsins flytjast upp um deild!

Aðalfundur Skáksambands Íslands fór fram í gær og bar þar margt til tíðinda. Væntanlega koma fréttir af því helsta á skak.is innan skamms. Forseti sambandsins var endurkjörinn og allir stjórnarmenn sem gáfu kost á sér, m.a. okkar menn Stefán Bergsson í aðalstjórn og Óskar Long sem 2. varamaður. Allmargar lagabreytingatillögur lágu fyrir fundinum, m.a. sem vörðuðu Íslandsmót skákfélaga. M.a. var samþykkt að fjölga sveitum í 1. deild úr 8 í 10 og kemur sú breyting þegar til framkvæmda. Þetta fjölgar umferðum í 7 í 9 og mun nokkuð auka kostnað og fyrirhöfn félaga sem þurfa að fara milli landshluta til mótsins. Þannig mun fyrri hlutinn væntanlega hefjast á fimmtudagskvöldi, enda tefldar 5 umferðir. Á móti kemur að mótið verður nú áfangahæft.  Skákfélagið talaði gegn þessari breytingu, vegna aukins kostnaðar vandasamari skipulagningar eins og getið er um að framan. 

Þessi breyting veldur því að A-sveit félagsins, sem hafnaði í 7. sæti deildarinnar nú í vor og hefði því átt að falla í 2. deild, heldur sæti sínu. Þá mun C-sveitin, sem náði 4. sæti í 4. deild, mun nú fá sæti í 3. deild. 

Félagsmenn geta því einnig glaðst við þessa breytingu og e.t.v. einnig við það að nú verður aðeins heimilt að hafa tvo útlendinga í hverri sveit í stað fjögurra (í 1. deild) eða þriggja (í öðrum deildum). Við höfum að jafnaði látið okkur tvo útlendinga nægja en oft átt undir högg að sækja gegn sveitum með fleiri erlenda meistara innanborðs. 

Að endingu minnum við svo á 15 mínútna mót í dag kl. 13!

Sérleyfisbílar á sigurbraut!

Fjórði og síðasti undanrásarriðill firmakeppninnar var tefldur í gærkvöldi og að venju varð glíman um þrjú sæti í úrslitum bæði hörð og löng. Sérleyfisbílar Akureyrar óku greitt og komu fyrstir í mark - þó á löglegum hraða. Fyllsta öryggis var gætt af Securitas sem hafnaði í öðru sæti og gamla stórveldið KEA sem á árum áður átti ósigrandi skáksveit virðist nú vera að ná vopnum sínum á ný og náði þriðja og síðasta sætinu sem gefur rétt til þátttöku í sjálfri úrslitakeppninni. Alls voru þátttakendur 12 í þessum riðli og lauk taflinu þannig:

 

SBA (Jón Kristinn Þorgeirsson)	9
Securitas (Smári Ólafsson)	8
KEA (Haki Jóhannesson)	7½
Blikk og tækniþj. (Sigurður Eiríksson)	7
Skíðaþjónustan (Logi Rúnar Jónsson)	6½
Samherji (Sveinbjörn Sigurðsson)	6½
Höldur (Símon Þórhallsson)	6
Grófargil (Karl Egill Steingrímsson)	5½
Rarik (Hreinn Hrafnsson)	4
Matur og mörk (Ari Friðfinnsson)	3
Akureyrarbær (Atli Benediktsson)	2½
Bústólpi (Bragi Pálmason)	½

Þá er ljóst hvaða 12 fyritæki keppa um sigurlaunin nk. fimmtudag. Nefnilega þessi:

 

Brimborg

Norðurorka 

Kristjánsbakarí

Gullsmiðir S&P

Heimilistæki

Kaffibrennslan

VÍS

TM

Krua Siam

SBA

Securitas

KEA

  Úrslitin næsta fimmtudag 16. maí kl. 20. Vonandi missir enginn af þeim.

Næsta stórmót er 15. mínútna mót nk. sunnudag og hefst kl. 13

Firmakeppnin í kvöld!

Undanrásum í firmakeppninni lýkur í kvöld. Eins og endranær vonast firmakeppnisnefnd Skákfélagsins eftir góðri mætingu.  Ef menn eru heppnir geta þeir dregið sér sitt uppáhaldsfélag!

Koma svo!