Tap í Færeyjum

Landskeppnin við Færeyinga var háð um síðustu helgi og var teflt í Klaksvík í þetta sinn.  Mun þetta vera í 20. sinn sem landskeppnin er háð.  Frá árinu 1978 hafa skákmenn af Norður- og Austurlandi að mestu skipað íslensku sveitina, og var svo einnig í þetta sinn. Af 10 liðsmönnum komu sex frá Skákfélagi Akureyrar, tveir frá Goðanum-Mátum og einn frá Skáksambandi Austurlands. Flokkinn fyllti svo Gunnar Björnsson, Hellismaður, sem var staddur í Færeyjum á þessum tíma. Íslenska sveitin var allvel skipuð og áttu menn von á hörkukeppni þótt Færeyingar væri heldur hærri að meðalstigum. Okkar menn guldu hinsvegar afhroð í fyrri umferðinni og þótt þeir réttu úr kútnum í þeirri síðari vað tap ekki umflúið. Einn okkar manna,  Halldór Brynjar Halldórsson, lýsti keppninni svo á Skákhorninu:

 

„ Um helgina fór fram landskeppni Íslendinga og Færeyinga í Klaksvik í Færeyjum. Eins og hefð er fyrir var lið Íslendinga einkum skipað skákmönnum með tengsl við Norður- og Austurland. Þó mætti forseti vor, Gunnar Björnsson, til leiks, en mann vantaði með skömmum fyrirvara og hann hafði þegar ákveðið fund með skáksambandi Færeyja í haust. Það voru því hæg heimatökin, og tvær flugur slegnar í einu höggi.

Hluti liðsins fór með Norrænu en rúmur helmingur með flugi. Fyrri umferðin fór síðan fram sl. föstudagskvöld, tæpri klukkustund eftir að sá hluti sem kom með flugi kom til Klaksvikur.
Fyrir lá að lið Færeyinga yrði mun sterkara í fyrri umferðinni en í þeirri síðari, vegna ýmissa ástæðna. Því reið á að haldið yrði sem mest í horfinu á föstudeginum. Því miður fór því sem næst allt úrskeiðis sem hugsast gat. Sem dæmi léku bæði undirritaður og Viðar Jónsson niður unninni stöðu. Staðreyndin er þó einfaldlega sú að Færeyingar tefldu mun betur heilt yfir og áttu sigurinn þar fyllilega skilinn. Hann var þó helst til stór, jafnvel miðað við taflmennskuna. 6,5-3,5 hefðu e.t.v verið sanngjarnari úrslit.

Síðari umferðin fór fram í morgun og höfðu þá Íslendingar betur, 6-4. Sá sigur var síst of stór, og hefði með smá heppni getað orðið stærri. Staðreyndin er þó sú að sigur Færeyingar í viðureigninni var á þessum tíma aldrei í hættu.

Færeyingar eru miklir höfðingjar heim að sækja og var öll gestrisni til mikillar fyrirmyndar. Hins vegar má segja að við höfum endurgoldið þá gestrisni alltof dýru gjaldi. Það er ljóst að liðsmenn eru afar ósáttir með niðurstöðuna og geta ekki annað en litið í eigin barm, e.t.v. ef frá er talinn Haraldur Haraldsson sem fékk 1,5 vinning. Á þessum úrslitum bæði berum við og tökum fulla ábyrgð.“

 

Úrslitin í heild sinni voru sem hér segir:

 

Fyrri umferð, 15. ágúst:

IM Helgi Dam Ziska       2474      -              FM Einar Hjalti Jensson 2305      1 - 0

Rögvi Egilstoft Nielsen   2243      -              Hlíðar Þór Hreinsson     2238      1 - 0

FM Carl Eli Samuelsen   2194      -              Rúnar Sigurpálsson       2230      ½ - ½

Högni Egilstoft Nielsen  2102      -              Halldór B. Halldórsson   2228      1 - 0

Torkil Nielsen                2113      -              Stefán Bergsson          2157      1 - 0

Torbjörn Thomsen        2143      -              Gunnar Björnsson       2102      ½ - ½

Herluf Hansen              2028      -              Haraldur Haraldsson     (2005)    ½ - ½

Terji Petersen               2037      -              Sigurður Eiríksson        1946      1 - 0

Martin Brekká               2028      -              Viðar Jónsson               1997      1 - 0

Súni Jacobsen              1865      -              Óskar Long Einarsson    1605      1 – 0

 

Síðari umferð, 17. ágúst:

FM Einar Hjalti Jensson  2305      -              IM John Rødgaard          2366      ½ - ½

Hlíðar Þór Hreinsson      2238      -              FM Carl Eli Samuelsen     2194      1 - 0

Rúnar Sigurpálsson       2230      -              Torkil Nielsen                 2113      ½ - ½

Halldór B. Halldórsson   2228      -              Torbjörn Thomsen         2143      ½ - ½

Stefán Bergsson          2157      -              Finnbjørn Vang              2051      1 - 0

Gunnar Björnsson        2102      -              Herluf Hansen                2028      ½ - ½

Haraldur Haraldsson     (2005)    -              Terji Petersen                2037      1 - 0

Sigurður Eiríksson        1946      -              Tummas M.Solsker,         1927      0 - 1

Viðar Jónsson              1997      -              Súni Jacobsen                1865      1 - 0

Óskar Long Einarsson   1605      -              Jóannes Guttesen                        0 – 1

            

Eins og áður voru Færeyingar höfðingjar heim að sækja og róma okkar menn móttökurnar, eins og sjá má hér að framan.  Keppnin vakti mikla athygli þar ytra og var t.d. ítarleg frétt um hana í kvöldfréttum færeyska sjónvarpsins í gærkvöldi, mánudag. Þar var m.a. viðtal við liðsstjórann Stefán Bergsson, sem svaraði spurningum fréttamanns skorinort á norrænni tungu.    Fréttina má sjá hér (byrjar u.þ.b. 17:30).  Þar má m.a. sjá að John Rødgaard tefldi sína 200 skák fyrir Færeyjar gegn Einari Hjalta. Var hann heiðraður fyrir þann áfanga af skáksambandinu, svo og Helgi Ziska, sem nýlega náði áfanga að stórmeistaratitli, fyrstur Færeyinga.  

Frekari umfjöllun má sjá hér:

Heimasíða færeyska sjónvarpsins

Færeyska skáksambandið

Skak.is (I)

Skak.is (II)

Chess-Results

 

Næsta landskeppni er fyrirhuguð á Íslandi eftir tvö ár.

Teflt við Færeyinga á morgun

Eins og greint er frá á heimasíðu Goðans er nú í vændum landskeppni við Færeyjar og fara þar í broddi fylkingar liðsmenn Skákfélagsins í félagi við Goðann og Skáksamband Austurlands. Teflt er á 10 borðum og af okkar hálfu skipa liðið þeir Rúnar Sigurpálsson, Halldór B Halldórsson, Stefán Bergsson, Haraldur Haraldsson, Sigurður Eiríkisson og Óskar Long Einarsson.  

Fyrri umferð landskeppningar fer fram annaðkvöld og hin síðari á sunnudag. Eins og fyrr segir má finna frekari upplýsingar á heimasíðu þingeyskra skákmanna.

Rumsk

Nú hallar sumri og heimasíða Skákfélagsins okkar rumskar. Ýmis tiðindi eru í vændum eftir því sem líður á ágústmánuð, en nýjast er að okkar menn höfðu nauman sigur á Fjölni í fyrstu umferð hraðskákmóts taflfélaga. Að venju var teflt á 6 borðum. Af okkar hálfu fóru þeir Halldór Brynjar og Stefán St. Bergsson fyrir liðinu og þeim til fulltingis voru tveir ungir sveinar, Jón "Jokko" Kr. Þorgeirsson og Símon "Simanovic" Þórhallsson. Riddaraliðið var svo skipað þeim professor Jóni Þ. Þór, Karli Agli hinum djúpvitra og Óskari Langa Einarssyni. Þetta hreif á þá Fjölnismenn sem söknuðu Jónasar og Baldvins m.a. og fengu því aðeins 35 vinninga gegn 37 okkar Eyfirðinga. Við erum því komnir áfram í næstu umferð. Nánar er um þetta fjallað hér.