Flottur árangur Brekkuskóla

Íslandsmóti barnaskólasveita (4-7. bekkur) er nýlokið í Rimaskóla í Reykjavík. Sveit fjögurra pilta úr 5. bekk Brekkuskóla var meðal þátttakenda og stóð sig með prýði. Sveitin var allan tímann að tefla við sterkustu sveitirnar í mótinu og mætti m.a. bæði Vatnsendaskóla og Landakotsskóla, sem voru tvær sterkustu sveitirnar. Í heildarkeppninni varð sveitin í 11. sæti (af 26) og varð efst sveita af landsbyggðinni. Hér má sjá piltana hampa verðlaununum. Sveitina skipuðu þeir Tobias Þórarinn Matharel, Gunnar Logi Guðrúnarson, Emil Andri Davíðsson og Baldur Thoroddsen. Þeir voru allir sínum skóla og sinni heimabyggð til sóma. 

Lok skáktíðar

Á þessum tíma árs er oft nóg að gera í skákinni - en styttist um leið í að reglubundnu skákstarfi ljúki fyrir sumarið. Undanfarinr tveir-þrír mánuðir hafa vissulega verið óvenjulegir - í skákheimum sem annarsstaðar. 

Skákæfingar fyrir börn og unglinga hófust á ný eftir að slakað var á samkomubanni og verður fram haldið út maí. Síðustu æfingar verða þannig mánudaginn 25. maí og miðvikudaginn 27. maí. Við hvetjum sérstaklega öll börn sem hafa verið að æfa hjá okkur að láta sjá sig þennan síðasta dag; við munum þá afhenda verðlaun fyrir vormisseri og reyna að ljúka skáktíðinni á líflegan hátt. 

Í samkomubanni hefur skákin heldur betur lifnað við á Netinu. Í þetta sinn hefur verið ákveðið að halda Skólaskákmót Íslands á Netinu nú á fimmtudaginn 21. maí, uppstigningadag kl. 11. Teflt verður á chess.com og öllum grunnskólanemum heimil þátttaka. Nánari upplýsingar um mótið og skráningu er að finna á skak.is: https://skak.is/2020/05/18/landsmotid-i-skolaskak-fer-fram-a-fimmtudaginn/

Vegleg verðlaun eru í boði, m.a. fyrir efsta sætið í hverju umdæmi (við erum á Norðurlandi eystra - gamla kjördæmið frá Tröllaskaga austur á Langanes). Við hvetjum okkar skákkrakka til að tefla í þessu móti.