Mótaröð í 7. sinn

Á morgun, fimmtudaginn 12. desember heyjum við sjöundu lotu mótaraðarinnar góðkunnu. Þeir sem hyggja á frama á vettvangi hennar þurfa því að bretta upp ermar, jafnvel skálmar líka. Áttunda lota bíður svo næstu viku. Að venju eru allir velkomnir til mótsins sem hefst stundvíslega kl. 20.

Að svo búnu efnum við til okkar marglofuðu UPPSKERUHÁTÍÐAR nk. sunnudag, sem er 15. dagur desembermánaðar. Við hefjum hátíðina kl. 13 í trausti þess að þá hafi

 ÞVÖRUSLEIKIR lokið helstu skylduverkum og geti komið við hjá okkur á leið sinni heim til fjalla. Ef af verður mun hann þá aðstoða við VERÐLAUNAAFHENDINGU. Vegna mikilla anna færist hann hinsvegar undan því að taka þátt í skemmtidagskrá að lokinni afhendingunni, svo óvíst er hvort hann verður meðal keppenda í HUGUR og HÖND sem blásið verður til ef gestir hátíðarinnar leggjast ekki gegn því. 

Allt kemur þetta í ljós þegar nær dregur. 

 

Mótaröðin

Á morgun fer fram 7. og næstsíðasta lotan í Mótaröðinni 2013. Keppnin fer að vanda fram í salarkynnum Skákfélagsins og hefst kl. 20.00. Sigurvegarinn verður sá sem hlýtur flesta vinninga samtals úr sex bestu mótunum. Hér að neðan er staðan eins og hún er í dag. Aftasti dálkurinn segir til um stöðuna úr fimm bestu mótunum af sex.

	12.9.	19.9.	17.10.	31. 10.	14.11.	samt	Bestu
Jón Kr. Þorgeirsson	6	6,5	4	13,5	9,5	39,5	35,5
Símon Þórhallsson	5	6	1	7,5	7,5	27	26
Áskell Örn Kárason		6,5	5	15		26,5	26,5
Sigurður Arnarson	6,5		4,5	11,5		22,5	22,5
Sigurður Eiríksson	5	5	4,5		8	22,5	22,5
Haraldur Haraldsson	6			8,5		14,5	14,5
Andri Freyr Björgvinsson	3	5		6		14	14
Smári Ólafsson	3,5		3		5	11,5	11,5
Logi Rúnar Jónsson	1	1	1	2	4	9	5
Hjörleifur Halldórsson		3,5			5	8,5	8,5
Sveinbjörn Sigurðsson		3			3	6	6
Karl Egill Steingrímsson				5,5		5,5	5,5
Ólafur Kristjánsson			5			5	5
Rúnar Ísleifsson				2,5		2,5	2,5
Dimitrios	0	0				0	0

 

 

Okkar menn sunnan heiða

Þótt frísklega sé teflt hér í Eyjafirði má ekki gleymast að margir okkar ágætu félagsmanna hafa (a.m.k. um hríð) valið sér að heyja orrustur sínar annarsstaðar, einkum á því margumtalaða höfurborgarsvæði. Þar sýna þeir andstæðingum sínum oftar en ekki í tvo heimana. Nýlega lauk Skákþingi Garðabæjar í þvísa bæjarfélagi og var annar sigurvegara mótsins gamall félagi okkar og nýr, Loftur Baldvinsson. Loftur hefur verið manna virkastur undanfarna mánuði og greinilega í mikilli framför. Nánar má skoða árangur hans HÉR. Eins og menn rekur augun í náði hann einmitt að leggja fyrrverandi formenn félagsins okkar og höfuðpaur þess til margra ára, Gylfa Þórhallsson, að velli. Það sýnir betur en nokkuð annað hvaða framförum Loftur hefur tekið.

En þótt Gylfi hafi mátt játa sig sigraðan í lokaumferð Skákþings Garðabæjar verður að telja harla ólíklegt að hann láti það gerast í öðru móti þar sem hann hefur staðið í fremstu víglínu, Vetrarmóti öðlinga hjá TR. Þar er Gylfi í baráttunni um efsta sætið (eins og HÉR má sjá) og lýkur henni nú á miðvikudag. Ef allt gengur eftur munu Skákfélagsmenn því hampa tveimur gullum í mótum þar syðra á nokkrum dögum! Við sendum þeim félögum, svo og öðrum sunnanmönnum í SA okkar bestu baráttukveðjur!