Jón Kristinn páskameistari

Núorðið lýkur fáum skákmótum hér á Akureyri án þess að Jón Kristinn Þorgeirsson, alias Jokko, beri þar sigur úr býtum.   Vann hann bæði mótin sem fram fóru um páskahátíðina. Á skírdag og föstudaginn langa var telft hið árlega bikarmót. Það er útsláttarkeppni þar sem menn fallla út eftir þrjú töp, teflsar atskákir. Jón missti aðeins niður hálfan vinning í mótinu.  Lengst stóð í honum Haraldur Haraldsson, sem varð annar, en þriðji varð Óskar Long Einarsson.

Á páskahraðskákmótinu sem teflt var annan páskadag mættu 11 keppendur. Þar vann Jón enn, fékk 9 vinninga, hálfum meira en Sigurður Eiríksson, sem reyndar var í forystu fram að síðustu umferð.  Þriðji varð svo Áskell Örn Kárason með 7 1/2 vinning.

Skák um páska

Páskarnir eru tími margvíslegra iðkana. Sumir hafa notað lausar stundir um þessa hátíðisdaga til að dufla við skákgyðjuna og hér forðum tíð var Skákþing Íslands jafnan haldið um páska. Það er liðin tíð en þó ekki allur vindur úr skákmönnum þessa daga. Hér norðan heiða efnum við til bikarmóts um þessar mundir.

Bikarmótið hefst á skírdag kl. 13. Mótið er útsláttarmót og tefldar atskákir. Ekki eru menn þó reknir heim fyrr en eftir þrjú töp (jafntefli er hálft tap), þannig að flestir ná að klára fyrsta keppnisdag og hefja þann næsta. Framhald er sumsé á föstudaginn kl. 13 og ef hann dugar ekki þótt langur sé hafa menn laugardaginn upp á að hlaupa. Á þessu móti er vitaskuld teflt um bikar og líklega verður súkkulaðibragð af honum í þetta sinn. Þátttökugjald í þetta mót er kr. 1000.

Páskahraðskákmótið er einnig hefðbundið á annan páskadag og hefst kl. 13. 

Landsbankinn vann fyrstu syrpu

Fyrsti undanrásarriðill Firmakeppninar var tefldur á sunnudag. Fámennt var í Skákheimilinu þennan dag og reyndar ljóslaust. Það kom þó ekki að sök og er talið að keppendur hafi flestir séð peða sinna skil á borðinu. Afleikir voru ekki fleiri en venjulega.

Tefld var þreföld um ferð og lauk sem hér segir:

Landsbankinn (Jón Kristinn)        10,5

Securitas (Áskell)                         9,5

Íslensk verðbréf (Sigurður E)        6,5

Brimborg (Logi)                           3

KEA (Einar G.)                             0,5

Þar með eru Landsbankinn, Securitas og Íslensk verðbréf komin áfram í keppninni.

Næsta mót hjá félaginu verður Bikarmótið og hefst það kl. 13 á skírdag. Teflt verður næstu daga eftir þörfum, en þar sem um útsláttarmót er að ræða er ekki vitað hversu lengt mótið verður, en líklega verða úrslitin tefld á laugardag.