Frábær árangur í Rimaskóla!

Eins og vel er kunnugt fór fyrri hluti Íslandsmóts skákfélaga fram í Rimaskóla um sl. helgi. Að þessu sinni mætti Skákfélagið til leiks með fjórar sveitir og tefldi A-sveitin í 1. deild, B-sveitin í 3. deild og C- og D-sveitirnar í 4. deild.  Allar sveitirnar náðu mjög góðum árangri í þetta sinn og hefur staða félagsins á þessum vettvangi sjaldan verið betri en nú að loknum fyrri hluta mótsins. Meirihluti liðsmanna var að bæta sig verulega og stigahækkun umtalsverð.   

Um árangur einstakra sveita er þetta að segja:

A-sveitin, sem hafnaði í næstneðsta sæti í 1. deild í fyrra og hefði þurft að tefla í 2. deild ef ekki væri fyrir fjölgun í 1. deildinni, vann nú fjórar viðureignir af fimm (alls verða tefldar 9 umferðir í 1. deild). Mótið hófst með tapi gegn Íslandsmeisturum Víkingaklúbbsins sem þó gat jafngilt sigri, því 2.5 vinningur kom í hús, sem er frábær árangur. Í hinum viðureignunum vannst sigur á  Fjölni og b-sveit GM Hellis með minnsta mun, óvenju stór sigur gegn TR (5-3) og loks 7-1 sigur gegn Vinaskákfélaginu, sem líklega er okkar stærsti sigur í 1. deild um mjög langt árabil.   Af liðsmönnum sveitarinnar náðu fimm menn frábærum árangri, Thorbjørn Bromann, Rúnar Sigurpálsson, Halldór B. Halldórsson, Gylfi Þórhallsson og Mikael J. Karlsson. Þeir fengu 3,5-4,5 vinninga í fimm skákum og hækka allir verulega á stigum fyrir árangurinn, Mikael mest, eða um 25 stig. Sveitin er nú í 5. sæti með 23,5 vinninga og 8 stig og á með sama áframhaldi möguleika á að hafna í fjórða sæti þegar mótinu lýkur 1. mars á næsta ári. Danski alþjóðameistarinn Bromann, sem hefur verið félaginu drjúgur liðsmaður til margra ára, stefnir hraðbyri að stórmeistaraáfanga á mótinu og Rúnar Sigurpálsson er í færum til að ná alþjóðlegum áfanga.  Það sama má reyndar segja um Halldór Brynjar. Öll einstaklingsúrslit má sjá hér.

B-sveitin er í öðru sæti í 3. deild og er árangur hennar að vonum, enda skipuð öflugum skákmeisturum, sem sumir hafa verið meðal helstu merkisbera félagsins um langt árabil. Sveitin hefur sex stig af átta mögulegum og 16,5 vinninga, meira en nokkur önnur sveit í deildinni. Flesta vinninga liðsmanna hefur hin gamalreynda kempa Ólafur Kristjánsson, 3,5 í fjórum skákum.  Þá var sérlega gleðilegt að sjá Akureyrarmeistarann Harald Haraldsson tefla nú sínar fyrstu skákir fyrir félagið í þessari keppni. Sveitin er í harðri baráttu um sæti í 2. deild að ári. Úrslit á öllum borðum má sjá hér.

C- og D-sveitirnar eru í 2. og 3. sæti í 4. deild  með sex stig af átta og eru því í hörkubaráttu um þriðjudeildarsæti, en eftir því sem næst verður komist flytjast fjórar sveitir upp um deild.  Vinningshlutfall beggja sveita er mjög hátt, eða 18 vinningar hjá D-sveitinni og 17,5 hjá C-sveitinni. Það eru ungu mennirnir sem fóru hamförum í vinningasöfnuninni,  þeir Jón Kristinn Þorgeirsson og Andri Freyr Björgvinsson fengur 3,5 vinning og Símon Þórhallsson 3, allir í fjórum skákum. Logi Rúnar Jónsson var þó með enn betra vinningshlutfall, en hann vann allar þær þrjár skákir sem hann tefldi og fjórði vinningurinn kom svo í hús þegar andstæðingur hans mætti ekki til leiks í síðustu umferðinni! Þá skiluðu tveir gamlir félagar sem í haust gengur aftur í raðir félagsins, Loftur Baldvinsson og Eymundur Eymundsson, góðu verki, sá fyrrnefndi 3,5 vinningi og sá síðarnefndi 2,5 (í þremur skákum).  Þessir tveir hafa áður gert garðinn frægan með félaginu, en alveg glænýr liðsmaður kom nú til liðs við d-sveitina, Einar Guðmundsson og stóð sig með mikilli prýði.  Öll úrslit hjá C-sveit hér og D-sveit hér.

Allt er þetta mjög ánægjulegt og eykur félagsmönnum bjartsýni. Eflaust eru ástæðurnar fyrir velgengninni fjölmargar, en víst er að margir skákfélagsmenn voru hreinlega í stuði um helgina. Ungu mennirnir eru í mikilli framför, þeir eldri halda vel sínum styrk og nýir liðsmenn reynast félaginu drjúgir.   Í samanburði við önnur félög munar okkur um að útlendingum hefur nú fækkað í keppninni og eru nú að hámarki tveir í hverri sveit. Þetta hefur ekki veikt okkur þar sem við höfum lagt minni áherslu á að skreyta okkar A-sveit með ofurstórmeisturum erlendis frá en flest önnur félög.

Formaðurinn óskar ykkur til hamingju með góðan árangur, félagar!

(Myndum með pistlinum var rænt úr myndaalbúmi mótsins. Þær tókHelgi Árnason skólastjóri Rimaskóla)