Skákvísur

Skákvísur

mánudagur 31.des.07 22:10

Þegar Skákfélag Akureyrar var stofnað 1919 varð snar þáttur í starfsemi þess að tefla símskákir við taflfélög vítt og breytt um landið. Hin fyrsta var þreytt aðfararnótt sunnudags á milli jóla og nýárs 1919 við skákmenn úr

Taflfélagi Reykjavíkur. Nær fullvíst má telja að þetta sé fyrsta keppni sinnar gerðar sem fram hefur farið hér á landi.

Fyrir 70-80 árum voru símaskákir eða radíoskákir eins og þær voru kallaðar mjög vinsælar. Þá tóku skákmenn hina nýju tækni í lið með sér og tefldu skákir eftir öldum ljósvakas. Þetta voru yfirleitt bæjarkeppnir og fóru þær oftast fram síðla kvölds og langt fram á nótt. Þá var oft glatt á hjalla og óspart látið fjúka í kviðlingum.

 

Þessi var send þegar Akureyringar og Húsvíkingar átust við.

 

Þú hefur lengi þvælst við mát

þér til lítils sóma

hefur ekki á höndum gát

höfuðkúpan tóma.

 

Þó fjandinn leggi ykkur lið

Og leiki fyrir alla.

Hér erum ekki hræddir við

Húsavíkur lalla.

 

Sveinn Þorvaldsson fyrrum skákmeistari Norðlendinga (1935) var hagyrtur og hafði gaman að því að setja saman vísur. Eitthvert sinn fylgdist hann með tveimur mönnum sem sátu að tafli og mælti þá.

 

Ekki er að spyrja að aflinu.

Óðum hrókum slengdi.

Tímanlega í taflinu

tók hann frúna og hengdi.

 

Að lokum koma hér nokkrar vísur.

 

Sátu tvö að tafli þar

tafls-óvön í sóknum

aftur á bak og áfram var

einum leikið hróknum!

 

Tafls í árum ein við háð

Ein átt voru af snilli.

Bornar sjár um síma þráð

segja fór á milli.

 

Taflið búið bráðum er

býsna þú ert klókur.

Burtu er nú af borði hér

biskup, frú og hrókur.

 

Guðjón klár á beðju bauga

braust í háraskemmu inn.

Felldi tár með einu auga

á honum nárabiskupinn

 

Lengi mátti ei á milli sjá

hvor maðurinn væri betri.

Uns Sveinbjörn með heiðri lá

en heiðurinn var hjá Jóni.

 

Tálið margt þótt teflum við

tjáir vart að flýja.

veiku hjarta veitir frið

vorið bjarta og hlýja.

 

Fleiri skákvísur eru hjá Skákfélagi Akureyrar, en læt þetta nægja í bili.