Haustmótið: Þeir stigahæstu í forystu eftir þrjár umferðir.

Þriðja umferð haustmótsins var tefld í dag. Skák Andra og Áskels lauk með jafntefli eftir harða baráttu þar sem Andri hafði peði meira í hróksendatafli en náði ekki að knýja fram sigur. Þá vann Elsa María Sigurð í tvísýnni skák. Önnur úrslit voru nokkurnveginn eftir bókinni. 

Úrslit 3. umferðar:

Áskell-Andri       1/2
Sigurður-Elsa      0-1
Stefán-Sigþór      1-0
Brimir-Tobias      0-1
Valur Darri-Hilmir 0-1
Alexía-Damian      0-1

Andri og Áskell eru nnú efstir með 2,5 vinning, en Elsa, Sigurður, Stefán, Hilmir og Tobias hafa tvo vinninga. 
Á morgun verða tefldat tvær umferðir og hefst sú fyrri kl. 13. Þá leiða þessi saman hesta sína:
Tobias og Áskell
Andri og Sigurður
Elsa og Hilmir
Brimir og Stefán
Sigþór og Damian
Valur Darri og Alexía.

Öll úrslit og staðan á Chess-results.
 

Haustmótið hafið!

Haustmót Skákfélagsins hófst í kvöld. Beðið var með ákvörðun um nákvæma dagskrá og útfærslu þar til endanleg þátttaka lá fyrir. Að lokum skráðu sig 12 keppendur og munu tefla sex umferðir eftir svissnesku kerfi. Mótið tekur fjóra daga og lýkur á sunnudag.

Fyrsta daginn, fimmtudags 22.september voru tefldar tvær atskákir. Að þeim loknum hafa þrír keppendur fullt hús með tvo vinninga, Áskell Örn Kárason, Andri Freyr Björgvinsson og Sigurður Eríksson. 
Mótinu lýkur svo með fjórum kappskákum. Dagskrá sem hér segir:

3. umferð föstudag 23.sept. kl. 18.00
4. umferð laudardag 24. sept. kl. 13.00
5. umferð laugardag 24. sept. kl. 17.00 (eða þar um bil)
6. umferð sunnudag 25. sept. kl. 13.00

Öll úrslit og stöðuna má finna hér:

Haustmótið hefst í næstu viku

Haustmót Skákfélags Akureyrar 2022 hefst fimmtudaginn 22. september. 

Mótið er meistaramót Skákfélagsins, en það er opið öllum. Fyrirhugað er að tefla sjö umferðir eftir svissneska kerfinu, en þó er hafður fyrirvari á dagskrá og fjölda umferða þar til fjöldi keppenda liggur fyrir. 
Þetta mót er tilvalið æfingamót fyrir þá sem hafa lítið teflt að undanförnu og vilja nú spreyta sig. 

Gert er ráð fyrir því að mótið hefjist á fimmtudegi kl. 18.00 og verði þá tefldar atskákir.

Síðan taka við kappskákir, ein á föstudegi, tvær á laugardegi og loks lokaumferðin á sunnudegi. 

Skráning er hjá formanni félagsins í [e-mail], með skilaboðum á Facebook síðu félagsins eða á skákstað, í síðasta lagi 15. mínútum fyrir upphaf fyrstu umferðar. 

Þátttökugjald á mótið er kr. 3.000 fyrir félagsmenn, kr. 4.000 fyrir aðra. Eins og áður eru börn á grunnskólaaldri undanþegin þátttökugjaldi.

Mótið reiknast til alþjóðlegra skákstiga.